გამოძიების პროცესში უკვე გამოიკვეთნენ ის თანამდებობის პირები, რომლებიც ამ სქემაში იყვნენ ჩართულები. ჩოხატაურის პოლიციის სამმართველოში “დასაქმებული” მოქალაქეების პარალელურად, სოფლის რწმუნებულები იკითხებიან.
ჩვენი ინფორმაციით, გამოძიების მიერ უკვე დაიკითხა 157 ადამიანი, რომელთა ჩვენებები იდენტურია. “გურია ნიუსთან” საუბრისას მათი უმრავლესობა ამბობს, რომ ხელფასის სანაცვლოდ, რომელიც 240 ლარს შეადგენდა, მხოლოდ “ხუთიანის” შემოხაზვა ევალებოდათ არჩევნებზე.
დაკითხვებმა ამ სქემაში მონაწილე თანამდებობის პირებიც გამოკვეთა. გასულ კვირას ჩოხატაურის პოლიციაში სოფლის რწმუნებულები დაიბარეს. როგორც გავარკვიეთ ყველა სოფლის რწმუნებულმა სოციალური მომსახურების სააგენტოს დასასაქმებელთა 6-კაციანი სია გადასცა.
სოფელ ბუკისციხის რწმუნებული, დავით სიხარულიძე ამბობს, რომ დასასაქმებელთა სიის ჩატანა სოციალური მომსახურების სააგენტოს ჩოხატაურის ფილიალის ხელმძღვანელმა, ზურაბ კალანდაძემ სთხოვა. მისივე თქმით, დასასაქმებელ პირთა ვინაობა თანაშემწესთან ერთად შეადგინა.
განსხვავებულ ინფორმაციას გვაწვდის სოფელ ქვენობნის რწმუნებული, ბონდო დოლიძე. მისი თქმით, დასასაქმებელთა სია, “ნაციონალური მოძრაობის” საარჩევნო შტაბში მოსთხოვეს.
_ შტაბში მთხოვეს, რომ სია მიმეტანა. ხალხს დავასაქმებთო.
_ კონკრეტულად, ვინ გთხოვათ?
_ ყველანი იყვნენ. სოციალური სამსახური, ლელა (საუბარია ჩოხატაურის ყოფილ გამგებელზე, ლელა იმედაშვილზე), დიმა (ყოფილი გამგებლის ყოფილი მოადგილე დიმიტრი კორიფაძე)… რა ვიცი, ბევრნი იყვნენ, _ დაგვიზუსტა დოლიძემ.
როგორც გავარკვიეთ, ჩვენებები მისცეს რწმუნებულების თანაშემწეებმაც. ჩვენ მიერ მოპოვებული, დაზუსტებული ინფორმაციით, ყველაზე სიტყვაუხვი სოფელ ბუკისციხის რწმუნებულის თანაშემწე, საბა კალანდაძე იყო.
ჩვენებაში კალანდაძე ყვება, რომ 6 ადამიანის შერჩევის მითითება რწმუნებულისგან მიიღო და შერჩეული ადამიანები საკუთარი მანქანით ჩაიყვანა სოციალური მომსახურების სააგენტოში:
_ შერჩეულებიდან ორი, დაზუსტებით ვიცოდი, რომ “ქართული ოცნების” მხარდამჭერი იყო, თუმცა, რწმუნებულთან ერთად, შტაბთან შეთანხმებით მივიღეთ გადაწყვეტილება, რომ ისინიც გაგვეფორმებინა, რადგან სხვებთან თუ არ გაწევდნენ აგიტაციას, თავიანთ ხმას მაინც მისცემდნენ “ნაციონალურ მოძრაობას”. ამ ადამიანებს 240 ლარის სანაცვლოდ, პარტიულ შეკრებებზე სიარული ევალებოდათ. ჩვენ ზონას, ყოფილი გამგებელი, მამუკა დოლიძე კურირებდა. ორჯერ თუ სამჯერ გამართა სოფელში შეხვედრა და ეს 6 კაცი დავახვედრეთ. ეს ადამიანები ბუკლეტების დარიგებაში, აგიტაციაში იღებდნენ ფულს, _ აღნიშნულია კალანდაძის ჩვენებაში.
ასეთივე ამომწურავი ჩვენება აქვს მიცემული კოხნარის რწმუნებულს, ჟიფო ცინცაძესაც. როგორც წყარომ გვითხრა, მან აღიარა, რომ სოციალური მომსახურების სააგენტოს მიერ დასაქმებულ ადამიანებს “ნაციონალური მოძრაობის” საარჩევნო კამპანიაში იყენებდა.
გამოძიების მიერ უკვე დაიკითხა ჩოხატაურის მუნიციპალიტეტის საკრებულოს თავმჯდომარის მოადგილე, მიხეილ უნგიაძე და დეპუტატი ერეკლე მრელაშვილი, რომელმაც არჩევნებიდან 10 დღეში დატოვა “ნაციონალური მოძრაობა” და ფრაქცია “ჩოხატაურის” წევრი გახდა. ამბობენ იმასაც, რომ მრელაშვილი “ოცნების” ნავში გადახტომას ცდილობს და საკრებულოს თავმჯდომარეობაზეც კი აქვს პრეტენზია.
წყაროს თქმით, უნგიაძის ჩვენებაში, რომელიც წინასაარჩევნო ამაღლება-შუა ამაღლება-სამების ხაზს კურირებდა, აღნიშნულია, რომ “დასაქმებულ” ადამიანებს შეხვედრებზე ხდებოდა და მათ გამზადებულ სიებს საარჩევნო შტაბი აწვდიდა.
“გურია ნიუსმა” გაარკვია, რომ დაკითხული ადამიანების ჩვენებებში ბევრი მოქმედი მაღალჩინოსნის გვარი ფიგურირებს. დავადგინეთ ისიც, რომ მათი დაკითხვის თანმიმდევრობას თბილისში ადგენენ; დაკითხულთა ჩვენებები სამინისტროსა და პროკურატურაში იგზავნება და დასაკითხთა სიაც ცენტრიდან იგზავნება.
ჩოხატაურის პოლიციის სამმართველოში ამ კვირაში ელიან მითითებას, რომ დაკითხვაზე ყოფილი გამგებელი _ ლელა იმედაშვილი, მისი მოადგილე დიმიტრი კორიფაძე (კორიფაძე ამჟამად “ნაციონალური მოძრაობის” ჩოხატაურის ორგანიზაციის ხელმძღვანელია) და საკრებულოს თავმჯდომარე ანტონ ხუნდაძე დაიბარონ. ჩვენი წყაროს ინფორმაციით, მათი ჩართულობა ამ სქემაში, რომელიც ჯერ კიდევ არ არის ბოლომდე გაშიფრული, სოფლის რწმუნებულების და დეპუტატების დაკითხვებმა გამოკვეთა.
ჯერჯერობით, უცნობია, როდის დასრულდება დაკითხვები. პროკურატურის ინფორმაციით, საქმის მოცულობიდან გამომდინარე, შესაძლოა, დაკითხვების პროცესს კიდევ რამდენიმე დღე დასჭირდეს.
_ დასაკითხ პირთა სია დღითიდღე იზრდება. ე. წ. დასაქმებული პირების გამოკითხვამ ბევრი მაღალჩინოსნის დაკითხვის აუცილებლობა გამოკვეთა. შესაბამისად, დაზუსტებით არ შეგვიძლია იმის თქმა, თუ როდის დასრულდება ეს პროცესები, _ გაგვიმარტეს პროკურატურაში.
