ყველაზე ღარიბი სოფელი _ ფოტორეპორტაჟი

ჩოხატაურის მუნიციპალიტეტი, სოფელი ზემოხეთი

ნატო გოგელიას ფოტორეპორტაჟი

ჩოხატაურის მუნიციპალიტეტის სოფელი ზემოხეთი, გურიის რეგიონის ერთ-ერთ ყველაზე ღარიბ სოფლად ითვლება _ აქაური მოსახლეობის უმრავლესობა სიღარიბის ზღვარს ქვემოთ მყოფია; დასახლება მჭიდრო არ არის და თანასოფლელებს ერთმანეთთან კილომეტრები აშორებს; არის ადგილები, სადაც ავტომანქანას არასდროს გაუვლია.

ზემოხეთის საჯარო სკოლაში მისასვლელად მოსწავლეებს დიდი მანძილის გავლა უწევთ _ ზოგიერთმა მოსწავლემ, ცოდნის მისაღებად, ყოველდღიურად 12 კილომეტრი უნდა გაიაროს.

ზემოხეთელები ამბობენ, რომ ეკონომიურად ძალიან უჭირთ. აქ ახალი ამბები “გურია ნიუსს” შეაქვს, რადგან ტელეგადაცემების ხარისხი ძალიან ცუდია, ხოლო სატელიტური თეფშის ყიდვის საშუალება არ გააჩნიათ. ყველაზე დიდი პრობლემა წყალი, გზა და ავარიული ელექტრობოძებია.

აღსანიშნავია ისიც, რომ ზემოხეთი მეწყერულ ზონაშია და ამ სოფელში სტიქიისგან დაზიანებული სახლებიც ბევრია.

მჟავიების ექვსსულიანი ოჯახი სოფლის ცენტრთან ახლოს ცხოვრობს. 3 არასრულწლოვან ბავშვს დაბზარულ კედლებში სძინავს. როგორც ოჯახის უფროსი დავით მჟავია ამბობს, დასახმარებელთა სიაში კარგა ხანია ჩაწერეს, თუმცა, შედეგი არ ჩანს:

_ ვის არ მივმართე დახმარებისთვის, მაგრამ არაფერი გამოვიდა. იმის შიშით ვათენებთ, ჭერი არ ჩამოინგრეს და ბავშვებს არაფერი დაემართოთ. არც წასასვლელი მაქვს სადმე და არც _ შემოსავალი. ინვალიდი ვარ, დახმარება მეძლევა და პენსია, თუმცა, ამ თანხით სახლის ყიდვას კი არა, თავის გატანას ძლივს ვახერხებ, _ ამბობს ბატონი დავითი.

გიორგი მჟავია სკოლაში წელს პირველად წავა. ამბობს, რომ კარგად უნდა ისწავლოს. ჩვენს კითხვაზე, თუ რაზე ოცნებობს, მორცხვად გვპასუხობს: _ ისეთ სახლზე, რომელშიც წვიმა ჩემს ლოგინს არ დაასველებს!

ჩოხატაურის მუნიციპალიტეტის გამგეობაში გვიდასტურებენ, რომ მჟავიების ოჯახი დასახმარებელთა სიაშია, თუმცა, არ იციან, დაეხმარებიან თუ არა ფინანსურად. დაზუსტებით მხოლოდ იმას ამბობენ, რომ მსგავს მდგომარეობაში ჩოხატაურში ძალიან ბევრი ოჯახია. გვეუბნებიან იმასაც, რომ მუნიციპალიტეტს უსახლკაროც მრავლად ჰყავს, მაგრამ ვერ ამბობენ, რა უნდა ჰქნან ამ მნიშვნელოვანი პრობლემების მოსაგვარებლად.