ჭორის დონეზე სახელდებოდა იმ ადამიანების ვინაობები, რომლებიც გამგებლის მოადგილეები გახდებოდნენ.
“გურია ნიუსი” დაინტერესდა თუ რა ხდებოდა გამგეობა-საკრებულოში და მართლა გახორციელდა თუ არა საკადრო ცვლილებები.
გამგებლის მოადგილის კაბინეტში შესულებს მართლაც ახალი კადრი დაგვხვდა და ზუსტად ის ქალბატონი, რომელზეც საზოგადოება ლაპარაკობდა _ მაია ბესელიასთან გავარკვიეთ, რომ საკადრო ცვლილებები გახორციელდა და ამის შესახებ ზუსტ ინფორმაციას გამგებლის კიდევ ერთი ახალი მოადგილე, გია სიმონია მოგვაწვდიდა, რომელიც ამიერიდან ითანამშრომლებს მედიასთან, მაგრამ პირველი შეხვედრა ვერ შედგა, რადგან კაბინეტი დაკეტილი დაგვხვდა და როგორც შემდეგ გავარკვიეთ, ორშაბათამდე ვერც ვერსად ვნახავდით. ამიტომ ისევ გამგეობის ადმინისტრაციული სამსახურის უფროსს, დიმიტრი ცანავას მივმართეთ.
დიმიტრი ცანავა: “12 თებერვალს, ოფიციალურად გახდა ცნობილი საკადრო ცვლილებების შესახებ, თუმცა აქვე უნდა აღვნიშნო, რომ ყველა ეს ადამიანები მოვალეობის შემსრულებლები არიან იმ დრომდე, სანამ კონკურსი გამოცხადდება. გამგებლის მოადგილეების შემსრულებლები არიან – მაია ბესელია, ზურაბ ლომია და გიორგი სიმონია. გამგებლის ყოფილი მოადგილე, ვახტანგ გაბელაია გადაყვანილია მუნიციპალური ქონების მართვისა და ადგილობრივი გადასახადების სამსახურის უფროსის მოვალეობის შემსრულებლად. ვახტანგ გაბელაია შეცვალა ზურაბ ლომიამ. გამგებლის კიდევ ერთი ყოფილი მოადგილე, იური იობაია დაინიშნა სპორტისა და ახალგაზრდობის სამსახურის უფროსის მოვალეობის შემსრულებლად. კიდევ ერთი ცვლილება, რომელიც გახორციელდა ისაა, რომ გიორგი დუნდუა, რომელიც სოფლის მეურნეობის სამსახურის უფროსი იყო, დაინიშნა ეკონომიკური განვითარების, სტატისტიკისა და ინვესტიციების სამსახურის უფროსის მოვალეობის შემსრულებლად. კარგად რომ იყოს გასაგები, გეტყვით, რომ ეკონომიკისა და ინფრასტრუქტურის განვითარების სამსახურის ფუნქციები სამად გაიყო და სწორედ ამ სამსახურების უფროსის მოვალეობის შემსრულებლად დაინიშნნენ ვახტანგ გაბელაია და გიორგი დუნდუა. კიდევ ერთხელ აღვნიშნავ, ყველა ზემოთ ჩამოთვლილი ადამიანი არის მოვალეობის დროებითი შემსრულებელი”.
საკადრო ცვლილებები განხორციელდა საკრებულოშიც, რაზეც საკრებულოს აპარატის უფროსი გოჩა ხურცილავა გვესაუბრა.
გოჩა ხურცილავა: “საკრებულოში გახორციელებული ცვლილებები დროებითია. როცა გამოცხადდება კონკურსი, მაშინ კონკურსის წესით დაინიშნებიან თანამდებობებზე ადამიანები. ახლა კი საკრებულოს იურიდიულ საკითხთა და საქმის წარმოების განყოფილების უფროსი მოვალეობის შემსრულებლად დაინიშნა ნინო ქორჩილავა, ყოფილი უფროსი გადაყვანილია გამგებლის მოადგილედ; მუნიციპალიტეტის საკრებულოს სოციალურ, განათლების და კულტურის საკითხთა კომისიის თავმჯდომარედ დაინიშნა ხვიჩა კელენჯერიძე, ყოფილი თავმჯდომარე გადაყვანილია გამგებლის მოადგილედ და სოციალურ საკითხთა განყოფილების უფროსად დაინიშნა აკაკი (კახა) კაჭარავა, რომელიც ადრე კულტურის სახლის დირექტორის მოადგილე იყო”.
ჩვენ ვისარგებლეთ შემთხვევით და გამგებლის ახალ მოადგილესაც და საკრებულოს აპარატის უფროსსაც ვკითხეთ, თუ რატომ არ ხდება ოფიციალური საიტების განახლება, რომ თუნდაც ვებგვერდის საშუალებით შეძლოს მოსახლეობამ ახალი ინფორმაციების მოპოვება, რაზეც საკრებულოს აპარატის უფროსმა, გოჩა ხურცილავამ გვიპასუხა, რომ ორშაბათს საიტი განახლებული იქნება და პირადად მიადევნებს თვალს ახალი ინფორმაციების განთავსებას.
