_ როგორც კი მოვა ჩვენგან შესაბამისი ინსტრუქცია, მაშინვე უნდა დაიგეგმოს შეხვედრები. ადრე, ეს უფრო მეტად რწმუნებულების ორგანიზებული, იყო, ზოგან ტარდებოდა, ზოგან კიდევ რა ხდებოდა, არ ვიცი. ეს ასე აღარ მოხდება. მოსახლეობამ უნდა გამოავლინოს ის პრიორიტეტი, რაც მათ უნდათ. _ განუცხადა გურიის სამივე მუნიციპალიტეტის პირველ პირებს მინისტრის მოადგილემ.
მისივე თქმით, აუცილებლად უნდა შედგეს კრების ოქმი, სადაც დაფიქსირებული იქნება, რომ იქ ადგილობრივმა მოსახლეობამ მიიღო მონაწილეობა და განისაზღვრა კონკრეტული პროექტის განხორციელება.
თენგიზ შერგელაშვილი: _ სოფლის განვითარების პროექტის პროცესს ჩვენ ძალიან სერიოზულ მონიტორინგს გავუწევთ. წინა წლებში, ძალიან ხშირად იყო ფორმალური ხასიათის. ხშირად, ეს პროირიტეტები მუნიციპალიტეტების გადაწყვეტილებით ირჩეოდა. ჩვენ გვაინტერესებს კონკრეტული ადამიანების აზრი ამასთან დაკავშირებით.
_ რაც შეეხება ადგილობრივი მთავრობის ჩართულობას ამ საქმიანობაში, რა დოზით იქნება მათი როლი განსაზღვრული?
_ ადგილობრივი ხელისუფლების ჩართულობა აქ უნდა იყოს მხოლოდ საორგანიზაციო, რათა მოქალაქეები გააფრთხილონ როდის და სად ტარდება კრება.
_ ბატონო თენგიზ, წინა წლების მონიტორინგი თუ ტარდება, როგორ ხორციელდებოდა ეს პროექტები? სამინისტროს აუდიტის სამსახური ხომ არ დაიწყებს მონიტორინგს?
_ ახლა, ამისთვის არც დრო და არც რესურსი გვაქვს. თუ ცალკეული შემთხვევები იქნება, აუცილებლად მოხდება საქმის შესწავლა, 3500 სოფელია და ყველას მონიტორინგს ვერ დაიწყებ.
_ არის თუ არა თქვენთვის ცნობილი, რომ ოზურგეთის პროკურატურაში სოფლის განვითარების პროექტების არამიზნობრივ ხარჯვებთან დაკავშირებით საჩივარი შეიტანეს?
_ ინფორმირებულები ვართ. თუ პროკურატურაში შევიდა საქმე, ე.ი. მონიტორინგზე უფრო მეტ გამოძიებას ჩაუტარებენ და ჩვენ აღარ ვარ საჭირო.
_ კონტროლის რა ზომებს მიმართავთ, რომ მსგავსი დარღვევები აღარ განხორციელდეს?
_ იცით რა, ადრე იყო ბევრი რამ არაფორმალური. ახლანდელმა მთავრობამ კი დეტალებში გაწერა, ვის რა როლის აქვს: ჩვენს სამინისტროს, გამგებელს, რწმუნებულებს და ასე შემდეგ. ეტაპები, ფუნქციები და პროცედურები დეტალურად გაიწერა და ამით მოხდება საქმის გაკეთება.
სტატია მომზადებულია ფონდის “ღია საზოგადოება _ საქართველოს” მიერ დაფინანსებული პროექტის _ “დათვალე საკუთარი ფული!”, ფარგლებში და მასში გამოთქმული მოსაზრება არ გამოხატავს ფონდის პოზიციას.
