გამგებლის მოვალეობის შემსრულებელმა კოტე შარაშენიძემ მისი მოადგილეების ვლადიმერ ქვილორიას და ლაშა ღლონტის განცხადებები დააკმაყოფილა და ისინი უკვე ახალი სამსახურის ძიებაში არიან.
ქვილორიას და ღლონტის განთავისუფლების შესახებ ინფორმაციას “გურია ნიუსთან” ოზურგეთის მუნიციპალიტეტის გამგებლის მოვალეობის შემსრულებელი, კოტე შარაშენიძე ადასტურებს. ჯერჯერობით, უცნობია ვაკანტურ ადგილას როგორ დაინიშნებიან ახალი მოადგილეები. ეს მოხდება კონკურსის წესით თუ სამთვიანი გამოსაცდელი ვადით.
რაც შეეხება ყოფილ მოადგილეებს, ლაშა ღლონტი ახალ კონკურსში იღებს მონაწილეობას, რომელიც მუნიციპალიტეტებში სოფლის მეურნეობის ცენტრების გახსნას ეხება. ლაშა ღლონტს კონკურსებში უმართლებს და ის ხშირად გამხდარა სხვადასხვა კონკურსების გამარჯვებული. 2010-წელს მონაწილეობა მიიღო საქართველოს სოფლის მეურნეობის სამინისტროს მიერ გამოცხადებულ აგრონომების კონკურსში სადაც გაიმარჯვა და 2011 წლის 1 დეკემბერს დაინიშნა ოზურგეთის მუნიციპალიტეტის მთავარ აგრონომად და გამგებლის მოადგილედ აგრარულ საკითხებში.
რაც შეეხება ლადო ქვილორიას ახალ სამსახურის ისიც ელოდება. ლადო ქვილორიამ ოზურგეთის გამგეობაში მუშაობა 1991 წელს საფინანსო განყოფილებაში დაიწყო, 2004 წელს გამგებლის მოადგილედ დაინიშნა, 2008 წელს ოზურგეთის მუნიციპალიტეტის საკრებულოს სკოლამდელი სააღმზრდელო დაწესებულების მთავარ ბუღალტრად მუშაობდა, ამავე წელს დაინიშნა ოზურგეთის მუნიციპალიტეტის გამგებლის მოადგილის თანამდებობაზე. ამავე წლის სექტემბერში დაინიშნა გამგებლის პირველ მოადგილედ. მან განცხადება განთავისუფლების შესახებ ერთი თვის წინ დაწერა.
როგორც ჩვენთვისაა ცნობილი, ჯერჯერობით, გამგებლის მოადგილის სკამის დასაკავებლად მხოლოდ ერთ კანდიდატს აქვს შეტანილი განცხადება, “რესპუბლიკური” პარტიის წევრს, ნინო გოგუაძეს, რომელმაც კოტე შარაშენიძის სახელზე შემდეგი სახის განცხადება დაწერა: “ოზურგეთის მუნიციპალიტეტის გამგეობაში თქვენს მიერ დაგეგმილი, მოსალოდნელი ცვლილებებიდან გამომდინარე, გთხოვთ, განიხილოთ ჩემი კანდიდატურა, ოზურგეთის მუნიციპალიტეტის გამგებლის მოადგილის შემსრულებლის, თანამდებობაზე.”
მოადგილეების საკითხი უახლოეს მომავალში გადაწყდება.
