ოფიციალური ინფორმაციით, “სოფლის მხარდაჭერის პროგრამით” თანხის გამოყოფა უშუალოდ სოფლისთვის ხდება. გამოყოფილი თანხის ოდენობა განისაზღვრება სპეციალური ფორმულის საფუძველზე, რომელიც გაიანგარიშება საკრებულოებში შემავალი დასახლებების, ოჯახებისა და მოსახლეობის რაოდენობის გათვალისწინებით.
კითხვაზე, როგორ ხდება “სოფლის მხარდაჭერის პროგრამით” გათვალისწინებული თანხის გამოყენების მიზნობრიობის განსაზღვრა, საქართველოს ხელისუფლების პასუხი ასეთია: “სოფლის მხარდაჭერის პროგრამით” გათვალისწინებული თანხის გამოყენების მიზნობრიობის განსაზღვრაზე პასუხისმგებელია შესაბამისი ადმინისტრაციული ერთეულის რწმუნებული, ამ ადმინისტრაციული ერთეულიდან არჩეული საკრებულოს წევრთან ერთად. თანხის გამოყენების მიზნობრიობა განისაზღვრება მხოლოდ შესაბამის სოფლის მოსახლეობასთან წინასწარი კონსულტაციის შემდეგ. გამგეობის რწმუნებული, საკრებულოს შესაბამის წევრთან ერთად, ვალდებულია ჩაატაროს სოფლის მოსახლეობის გამოკითხვა, საჭიროების შემთხვევაში ორგანიზება გაუწიოს სოფლის კრების მოწვევასა და ჩატარებას, მოაწყოს საჯარო განხილვები და შეათანხმოს მოსახლეობასთან “სოფლის მხარდაჭერის პროგრამით” სოფელზე გამოყოფილი თანხის გამოყენების მიზნობრიობა”.
თუმცა, “გურია ნიუსის” მიერ ჩატარებული მონიტორინგი საწინააღმდეგოს მეტყველებს _ სოფლის მცხოვრებლების გამოკითხვის თანახმად, ცხადი ხდება, რომ პრიორიტეტებს ხელისუფლება ადგენდა. უფრო მეტიც, ჩვენ მიერ ოფიციალურად გამოთხოვილი დოკუმენტები ნათელი დასტურია იმისა, თუ როგორ უდგებოდა ხელისუფლება ამ საკითხს. კრების ოქმებზე, უმრავლეს შემთხვევაში, არც თარიღია მითითებული და არც ნომერი. ბევრგან კი იდენტური ხელმოწერებია გაკეთებული, რაც იმის ლოგიკურ ეჭვს აჩენს, რომ კრების და გამოკითხვის ოქმები მოგვიანებით, მას შემდეგ გაკეთდა, რაც “გურია ნიუსმა” სოფლებში გახორციელებული პროგრამების მონიტორინგი დაიწყო.
ამას ისიც ემეტება, რომ სოფლად მცხოვრები ადამიანების უმრავლესობა ვერ იხსენებს კრებას, როცა მსგავსი საკითხები საჯაროდ განიხილეს.
ჩოხატაურის მუნიციპალიტეტის სოფელ ვანზომლეთში ორი თემი _ ვანი და ზომლეთი შედის. ორივე თემი 300 კომლზე მეტს აერთიანებს.
პრობლემები ბევრი აქვთ _ ავარიული ელექტრო ბოძები, მოუწესრიგებელი შიდა გზები.
სოფლის მთავარ პრიორიოტეტად ზომლეთში სკოლა მიაჩნიათ და ამბობენ, რომ ხელისუფლების მრავალწლიანი დაპირება დაპირებად რჩება. ვანზომლეთებელი ასევე დიდი ხანია საბავშვო ბაღის გახნას ითხოვენ: _ ეს სოფლისთვის აუცილებელია. ვის არ მივმართეთ, თუმცა, თავი არავინ შეიწუხა, _ გვეუბნებიან ვანზომლეთში.
ბაღის გახსნის საკითხი სოფლის დეპუტატმა, თემურ ხუხუნაიშვილმაც ბევრჯერ დააყენა საკრებულოს სხდომაზე, მაგრამ სხვა ბევრის მსგავსად ამ პრობლემის მოგვარება ამ დრომდე ვერ მოხერხდა.
სოფელი დიდი ხანია ბუნებრივ აირსაც ითხოვს. მით უმეტეს, რომ გაზსადენის ცენტრალური მილი სწორედ ვანზომლეთში გადის.
რაც შეეხება უშუალოდ სოფლის პროგრამის ფარგლებში გახორციელებულ სამუშაოებს, ბოლო სამი წლის განმავლობაში ვანში და ზომლეთში რამდენიმე პროექტი შესრულდა.
2010 წელს ვანში 7 053 ლარი დაიხარჯა წყალსადენისთვის, 1 058 ლარი კი ომში დაღუპულთა მემორიალის შესაკეთებლად გამოიყო. ამავე წელს, 2 122 ლარი დაიხარჯა ზომლეთში წყლის სისტემის რეაბილიტაციისთვის და 5 673 ლარი _ სტადიონის მოწყობისთვის.
2010 წელს შესრულებული პროექტებიდან დღეს ყველაზე უსახურად სწორედ 5 673-ლარიანი სტადიონი გამოიყურება. ჭაობში შემოღობილი ფართი, რომელსაც ხის ჭიშკარი აქვს, ლურსმნით დაგვხვდა შეჭედილი.
სოფლის რწმუნებულის, როსტომ ხუხუნაიშვილის რეკომენდაციით, სტადიონის დათვალიერებისთვის “ალაგეზე” გადასვლა მოგვიწია.
დასათვალიერებელი კი არაფერი აღმოჩნდა _ თუ არ ჩავთვლით რკინის ბოძებს, რომელსაც, ბადე, თურმე არასოდეს ჰქონია და რამდენიმე ხის სახელდახელოდ შეჭედილ სკამს.
წყლის სისტემის 2010 წელს დაწყებული რეაბილიტაცია ვან-ზომლეთში 2011 წელსაც გაგრძელდა. ამისთვის ზომლეთში 7 784 ლარი დახარჯეს, ვანში კი _ 8 077 ლარი.
როგორც გავარკვიეთ წყლის პრობლემა სოფელში ყველაზე მძიმედ ზაფხულშია, განსაკუთრებით ვანში, თუმცა, ყველგან წყალი ახლაც არ მოდის, სავარაუდოდ იმის გამო, რომ აუზებიდან წამოსული მილები მიწაში არ ჩაუმარხავთ _ ბევრ ადგილზე მილები დახეთქილია და წყალი იღვრება.
მიუხედავად სოფლის რწმუნებულის მტკიცებისა, რომ ვან-ზომლეთში წყალი ყველა ოჯახს აქვს, ჩვენი იქ ყოფნის დროს ისეთი ადამიანებიც ვნახეთ, რომლებიც სასიცოცხლოდ აუცილებელ პროდუქტს “ვედროებით” მეზობლებიდან ეზიდებოდნენ.
ჩვენს კითხვაზე, რატომ არ შეეხოთ წყლის სისტემის რეაბილიტაცია, მხრების აჩეჩვით გვიპასუხეს და აღნიშნეს, რომ დიდი ხანია თავადაც ცდილობენ ამ საკითხის გარკვევას.
2012 წელს, ზომლეთში შიდა გზების რეაბილიტაცია 9 825 ლარი დაჯდა, ვანში კი _ 9335 ლარი. მიუხედავად იმისა, რომ ამ თანხით გზები მხოლოდ მოიხრეშა, სხვა სოფლებისგან განსხვავებით, სამუშაოები გაცილებით პატიოსნად არის შესრულებული და გზებს ნამუშევარი ნამდვილად ეტყობა.
აღსანიშნავია კიდევ ერთი დეტალი _ წინასაარჩევნო პერიოდში სოფელ ვანში წყლის სისტემის რეაბილიტაციაზე ჩოხატაურის პროკურორის სიმამრი, ჟორა თავაძე ზრუნავდა. როგორც გაირკვა, თავაძე სხვა სამუშაოსაც ასრულებდა, კონკრეტულად კი მოსახლეობაში “ნაციონალური მოძრაობის” აგიტაციასაც ეწეოდა.
ეს ამბავი ჩვენთან საუბრისას ვანის მცხოვრებმა, სიმონ ჯაშმა გაიხსენა და აღნიშნა, რომ არჩევნების წინ, სწორედ ჟორა თავაძე აძლევდა რჩევებს, ხმა “ნაციონალური მოძრაობისთვის” მიეცა.
სტატია მომზადებულია ფონდის “ღია საზოგადოება _ საქართველოს” მიერ დაფინანსებული პროექტის _ “დათვალე საკუთარი ფული!”, ფარგლებში და მასში გამოთქმული მოსაზრება არ გამოხატავს ფონდის პოზიციას.
