ვაშაძემ იუსტიციის მინისტრის გამოსვლას არარაციონალური უწოდა და სიამაყით განაცხადა, რომ იუსტიციის სამინისტროში წულუკიანს მან კვალიფიციური და მომზადებული კადრი დაახვედრა.
“თქვენი მიზანი “ნაციონალური მოძრაობის” განადგურებაა შეფასება რომ ყველა პროკურორი დასაჭერია, არ არის სწორი მიდგომა და სამართლებრივი შეფასება. ეს არ არის დემოკრატიაში იუსტიციის მინისტრის მიდგომა სხვადასხვა საკითხებთან დაკავშირებით. სამწუხაროდ, ჩვენ საქართველოში შევეჩვიეთ დაუსაბუთებელ განცხადებებს. იუსტიციის მინისტრის განცხადებები ხშირად რაციონალური არ არის,” _ განაცხადა გიორგი ვაშაძემ შეხვედრაზე, რომელსაც პრემიერ მინისტრი ბიძინა ივანიშვილიც ესწრებოდა.
კრიტიკის პასუხად იუსტიციის მინისტრმა პარლამენტარი ყალბი პასპორტის გაკეთებაში დაადანაშაულა. წულუკიანის თქმით, ის აქამდე თავს იკავებდა ფაქტის გახმაურებისგან , მაგრამ ვაშაძის გამოსვლამ აზრი შეაცვლევინა.
“თქვენ, სამოქალაქო რეესტრის ერთ-ერთ კომპეტენტურ კადრს მიეცით უკანონო ბრძანება , რომელმაც ხათრი ვერ გაგიტეხათ და თქვენ და ქალბატონ თინათინ ბოკუჩავას მოგცათ უკანონო პასპორტები. ამის მერე მე მომიხდა ამ კომპეტენტური კადრის გათავისუფლება. კაცი, რომელმაც ეს გააკეთა, ნუ მელაპარაკება სახელმწიფოებრივ აზროვნებაზე, შეწყვიტეთ უკანონო დავალებების მიცემა იუსტიციის სამინისტროს კომპეტენტური კადრებისათვის, რადგან მე ამ კადრებზე ვაგებ პასუხს. შორს ხელები ამ კადრებისგან _ ნუ იძლევით უკანონო ბრძანებებს!” _ განაცხადა იუსტიციის მინისტრმა.
მინისტრის განცხადებას გიორგი ვაშაძემ მუქარა, თავად წულუკიანს კი სამარცხვინო უწოდა: “ნუ მემუქრებით. თქვენ არ მომეცით დიპლომატიური პასპორტი, საქართველოში ყველამ იცის, რომ 15 წუთში შეიძლება პასპორტის აღება და თქვენ კი მე არ მომეცით პასპორტი. უნამუსოდ ნუ იქცევით, ნუ მემუქრებით და ვერც ვერასდროს დამემუქრებით, სამარცხვინო ხართ!”
იუსტიციის მინისტრმა თეა წულუკიანმა გიორგი ვაშაძეს “ერთი პრანჭია კაცი უწოდა “და განუცხადა, რომ მას უკანონოდ აღებული პასპორტი სამართლიანად ჩამოერთვა.
საპარლამენტო უმცირესობის წევრი თინათინ ბოკუჩავა აცხადებს რომ ყალბი პასპორტების შესახებ არაფერი იცის. დეპუტატმა, რომელიც თეა წულუკიანის და მისი მამის მისამართით გამოთქმული არა ერთი მწვავე განცხადების ავტორია, მინისტრის ეს ბრალდება მისი მძიმე ფსიქიური მდგომარეობით ახსნა.
