რუსეთის ელჩს პოლონეთში, სერგეი ანდრეევს წითელი საღებავი შეასხეს. დიპლომატი ვარშავაში, მეორე მსოფლიო ომის მემორიალთან მივიდა, სადაც მას ადგილობრივები და სამოქალაქო აქტივისტები დახვდნენ საპროტესტო შეძახილებით. სერგეი ანდრეევის მისამართით ისმოდა შეძახილები _ “რაშისტები”. ამ ფორმით კიდევ ერთხელ გააპროტესტეს პოლონელებმა რუსული აგრესია უკრაინაში.
ინციდენტის შემდეგ ანდრეევი, პოლიციის თანხლებით, იძულებული გახდა დაეტოვებინა სასაფლაო.
მოგვიანებით ელჩმა განაცხადა, რომ ის არ დაშავებულა.
“არც კი ვიცი, რა ვუწოდო ამას. ეს არის ერთგვარი თამაში, რომელსაც არაფერი აქვს საერთო ცივილიზებული ქცევის წესებთან, რომლის სწავლებაც ჩვენს დასავლელ პარტნიორებს, მათ შორის, პოლონელებს, ძალიან უყვართ… ეს ყველაფერი, შეიძლება დაგეგმილი იყო, პოლიცია ბოლოს გამოჩნდა, მაგრამ ამ ვახანალიის გაშლის შემდეგ. ჩაგვიშალეს წმინდა დღესასწაული – გამარჯვების დღე.“ – თქვა რუსეთის ელჩმა.
როგორც RIA novosti წერს, ვარშავაში საელჩო, მისიის ხელმძღვანელზე თავდასხმასთან დაკავშირებით პროტესტის გამოხატვას აპირებს.
საგარეო საქმეთა სამინისტროს სპიკერმა მარია ზახაროვამ მომხდარზე კომენტარი საკუთარ Telegram-ში გააკეთა. მისი თქმით, „ნეონაციზმის თაყვანისმცემლებმა კიდევ ერთხელ გაიშიშვლეს სახე – და ეს სისხლიანია“.
„მეორე მსოფლიო ომის გმირების ძეგლების დანგრევა, საფლავების შეურაცხყოფა და ახლა ყოველი ღირსეული ადამიანის წმინდა დღეს ყვავილების დადების ცერემონიის ჩაშლა უკვე აშკარაა – დასავლეთმა გზა დაადგინა. ფაშიზმის რეინკარნაცია“, – წერს ზახაროვა.
რუსეთის დიპლომატიური მისია ასევე აპირებდა გამარჯვების დღეს უკვდავი პოლკის გამართვას, მაგრამ პოლონეთის საგარეო საქმეთა სამინისტრომ რეკომენდაცია არ გაუწია ღონისძიებების გამართვას, უკრაინაში რუსულ სპეცოპერაციასთან და ადგილობრივ კანონებთან „წინააღმდეგობის“ მოტივით. მოსკოვმა ამ პოზიციას აბსურდული უწოდა.
ავტორი
