ოზურგეთში პირველ საკადრო ცვლილებას ახალი გამგებლის მოვალეობის შემსრულებლის დანიშვნა მოჰყვა და ეს ადგილი “ქართული ოცნების“ ოზურგეთის რაიონული ორგანიზაციის ერთ-ერთმა ლიდერმა კოტე შარაშენიძემ დაიკავა. მის მოადგილედ კი ასევე კოალიციის ახალგაზრდა სახე გიორგი ღურჯუმელიძე დაინიშნა. რაც შეეხება სხვა პარტიის ლიდერებს, ამ ეტაპზე მათი დასაქმების საკითხი დღის წესრიგში დგას, მაგრამ მათი დანიშვნა არ მომხდარა.
_ აგერ ტიფო მიქატაძეს (“რესპუბლიკული პარტიის” ოზურგეთის რაიონული ორგანიზაციის თავმჯდომარე. ავტ) შევთავაზე, მოდი, აგერ, მოადგილედ სოფლის მეურნეობის დარგში–თქო და უარი მითხრა. შოთა გოგიბერიძეს (“ეროვნული ფორუმის” ოზურგეთის რაიონული ორგანიზაციის თავმჯდომარე. ავტ) ვუთხარი _ უარი მითხრა და ასე არაა, რა! ეს სკამი ერთია და ქი დავჯექი ამ სკამზე ჩემი შრომით და ჩემი ხედვით…_ ეს სიტყვები კოტე შარაშენიძეს ეკუთვნის “გურია ნიუსისთვის” მიცემულ ინტერვიუში.
ტიფო მიქატაძე ამბობს, რომ კოტე შარაშენიძის განცხადება, თითქოს მოადგილეობა შესთავაზა სოფლის მეურნეობის დარგში, არ არის მართალი და ამ თემაზე საუბარი არ ყოფილა.
_ მუნიციპალიტეტის გამგებლის მოადგილის თანამდებობა, სოფლის მეურნეობის დარგში, დაუშვეს 3 წლის წინ, როდესაც სოფლის მეურნეობის სამინისტრომ კონკურსით შეარჩია და მოამზადა აგრარული განათლების სპეციალისტები. მუნიციპალიტეტებს კი დაევალათ მათი გამგებლის დამატებით მესამე მოადგილეებად დანიშვნა და დაფინანსება. შეგახსენებთ, რომ ამ პერიოდში, ოზურგეთის მუნიციპალიტეტის გამგეობაში ფუნქციონირებდა სოფლის მეურნეობის განვითარე ბის სამსახური და ა(ა)ი.პ სოფლის მეურნეობის განვითარებისა და დასაქმების ხელშემწყობი ცენტრი.
2013 წლიდან, სოფლის მეურნეობის სამინისტრო, ყველა მუნიციპალიტეტში ქმნის და აფინანსებს საინფორმაციო-საკონსულტაციო ცენტრებს, რომელთაც ძირითადად დაეკისრება სოფლის მეურნეობის განვითარების კოორდინაცია ცალკეული მუნიციპალიტეტის ფარგლებში. ისევ განაგრძნობს ფუნქციონირებას ზემოთ ხსენებული ა. (ა).ი.ა. ყოველივე ამის შემდეგ, რამდენად მიზანშეწონილი იქნება, ცალკე ამ მიმართულების გამგებლის მოადგილის თანამდებობის შენარჩუნება და დაფინანსება, ეს გასარკევია. გამგებლის მოსაზრება ამასთან დაკავშირებით, ჩემთვის უცნობია.
“გურია ნიუსის” საგაზეთო ინტერვიუდან მე ასე გავიგე, თითქოს, იმიტომ მითქვამს უარი გამგებლის მოადგილის თანამდებობაზე, რომ თურმე გამგებლობა მსურდა. ანუ, თითქოს, მე სკამს ვეცილებოდი. ეს მტკნარი სიცრუეა. როცა მითხრეს, დავუჭერდი თუ არა მხარს კოტე შარაშენიძის მუნიციპალიტეტის გამგებლის თანამდებობაზე წარდგენას, ვუპასუხე, რომ მას ამის უფლება ჰქონდა, წინააღმდეგი არ ვყოფილვარ.” – განაცხადა “გურია ნიუსთან” საუბრის დროს ტიფო მიქატაძემ.
რაც შეეხება შოთა გოგიბერიძეს, მან კოტე შარაშენიძისგან შემოთავაზება მიიღო, მაგრამ მოადგილეობაზე უარი თქვა:
_ შემოთავაზება იყო ნამდვილად, გამგებლის მოადგილეობასთან დაკავშირებით და ვთქვი უარი. _ აცხადებს ის “გურია ნიუსთან.”
_ რა იყო ამის მიზეზი?
_ აქ რამდენიმე მომენტია, პირველი _ “გურია ნიუსის” მკითხველმა იცის იმის შესახებ, რომ მე გახლდით პარტიული სიით საპარლამენტო არჩევნების დროს კოალიცია “ქართული ოცნების” სიაში და მცირედი როტაციაა საკმარისი იმისთვის, რომ სულაც არ არის გამორიცხული, პარლამენტის წევრი გავხდე, რაც მნიშვნელოვანია ჩემთვის და ჩემი პოლიტიკური გუნდისთვის. მთელი ჩემი ყმაწვილკაცობა და ახალგაზრდობა თვითმმართველობების ორგანოებში სხვადასხვა თანამდებობაზე ვიმუშავე და ჩათვალა ჩემმა პოლიტიკურმა გუნდმა, რომ ეს ეტაპი ჩემთვის გავლილია და ჩემი შესაძლებლობების გამოყენება სხვა მიმართულებით უნდა მოხდეს.
_ მაგალითად, გურიის გუბერნატორობა?
_ კოალიციიდან ჩემი ლიდერები და მეც ველოდები ღირსეულ შემოთავაზებას ჩემი შესაძლებლობების ოპტიმალურად გამოყენების და საზოგადოების სამსახურში ჩაყენების მიზნით. სამხარეო ადმინისტრაციის თემაზე საუბარი ნაადრევად მეჩვენება იმიტომ, რომ სანამ კანონში არ შევა ცვლილება და სანამდე პრემიერ-მინისტრი ვერ მიიღებს უფლებამოსილებას, მან ჩამოაყალიბოს სამხარეო ადმინისტრაციები, მანამდე ეს თემა არც დგას დღის წესრიგში.
