ტიფო მიქატაძის განცხადებით, პარტია “ქართული ოცნება-დემოკრატიული საქართველოს” ოზურგეთის შტაბის ხელმძღვანელი კოტე შარაშენიძე ოზურგეთის მუნიციპალიტეტში საკადრო ცვლილებებს კოალიციის შეთანხმების გარეშე ახორციელებს და აბსოლიტურ იგნორს უკეთებს “რესპუბლიკურ” პარტიას. პრესკონფერენციაზე ნდობა და მხარდაჭერა გამოუცხადა ტიფო მიქატაძის მიერ გაკეთებულ განცხადებებს საკრებულოს დეპუტატმა ლელა ნაცვალაძემ.
“ოზურგეთის მუნიციპალიტეტში დაიწყო საკადრო ცვლილებები, უპირველეს ყოვლისა ეს ეხება სოფლად გამგებლის რწმუნებულებს, აპარატის თანამშრომლებს და მას ახორციელებს გამგებლის მოვალეობის შემსრულებელი კ. შარაშენიძე. საზოგადოებამ მინდა იცოდეს, რომ მიმდინარე საკადრო ცვლილებები არ არის შეთანხმებული კოალიციაში შემავალ პარტიებთან. ის გახლავთ, უმეტეს შემთხვევაში, ერთი კაცის კ. შარაშენიძის ან მისი პოლიტიკური გუნდის ერთპიროვნული გადაწყვეტილებები, ცალკეულ შემთხვევაში კი, სხვა პარტიის წარმომადგენლის დანიშვნისას, გათვალისწინებულია მის მიმართ კ. შარაშენიძის პერსონალური დამოკიდებულება ინდივიდუალურად და არა პარტიის საერთო პოზიცია.
მეტიც, მე გეტყვით ჩემს პარტიაზე. სრული პასუხისმგებლობით ვაცხადებ, კ.შარშენიძისა და მისი გუნდის მხრიდან მიმდინარეობს, არა თუ პოზიციების გაზიარება და თანამშროლობა, არამედ დაუფარავი აგრესია და ბრძოლა საქართველოს რესპუბლიკური პარტიის წევრებისა და მხარდამჭერების მისამართით.
კ. შარაშენიძის დანიშვნიდან დღემდე მხოლოდ და მხოლოდ ერთხელ მოხერხდა შეხვედრა, ისიც არასრული ფორმატით და იგი, როგორც შემდეგ აღმოჩნდა ემსახურებოდა ,”ბოლის გამოშვებას” და არარეალური შედეგების მიღწევის სურვილს. იგნორირება ისევ გრძელდება – როგორც ჩანს კ. შარაშენიძის შემოთავაზების, მისი სიტყვებით რომ ვთქვათ “რებიატა დავაიწე ჟიტ დრუჟნა”, ადრესატი არ ყოფილა ,”ქართულ ოცნებაში” შემავალი პარტიები, ის სხვა ჯგუფებს ეკუთვნოდა..
ოზურგეთის საზოგადოებამ ოქტომბრის არჩევნებისას დაამტკიცა, რომ ის ვერ შეეგუება ერთი კაცის ან ერთი გუნდის უკონტროლო მმართველობას რა სახელიც არ უნდა ერქვას მას. ჩვენ, კოალიციის წევრებს, არ გვაქვს შეცდომების დაშვების უფლება. ბატონი კ. შარაშენიძე იყო და რჩება ჩვენი გუნდის წევრად, ჩვენ დაინტერესებული ვართ მის წარმატებაში. მისი მხრიდან შეთავაზებული, შეთანხმებული პირობების კვლავდაკვლავ გაუთვალისწინებლობის შემთხვევაში ჩვენ მოგვიწევს ვიფიქროთ ექნება თუ არა კ. შარაშენიძეს მომავალში პოლიტიკური კოალიცია “ქართული ოცნების” სახელითა და მანდატით საქმიანობის გაგრძელების უფლება, _ განაცხადა პრესკონფერენციაზე ტიფო მიქატაძემ.
“გურია ნიუსთან” ოზურგეთის მუნიციპალიტეტის გამგებლის მოვალეობის შემსრულებელი კოტე შარაშენიძე ყველა იმ კითხვას პასუხობს, რაც მისი მისამართით ისმის.
_ ბატონო კოტე, რესპუბლიკური პარტიის ოზურგეთის ორგანიზაციის კომიტეტის თავმჯდომარე ტიფო მიქატაძე აცხადებს, რომ თქვენ იღებთ ერთპიროვნულ გადაწყვეტილებებს, საკადრო ცვლილებების გახორციელების დროს. სამართლიანად გედავებიან?
_ პირდაპირ გეტყვით, როდესაც გამგებელი გავხდი , მე შევთავაზე ბატონ ტიფო მიქატაძეს მოადგილის პოსტი, მინდოდა, რომ მას ჩაებარებინა ეს თანამდებობა, სოფლის მეურნეობის კუთხით, მაგრამ იგნორირება გამიკეთა.
_ამ ინფორმაციას არ ადასტურებს ტიფო მიქატაძე. . .
_მე არ ვიცი, თვითონ რას ადასტურებს და რას არა, მე გეუბნებით, რომ მე მას შევთავაზე ეს ადგილი. მან საჯაროდ განაცხადა პრესაში, რომ ის მხოლოდ გუბერნატორის პოსტს დათანხმდება და მხოლოდ ეს ადგილი უნდა, იბრძოლებს მხოლოდ გუბერნატორობისთვის. მე 6 დეკემბერს დამნიშნეს. 10 დეკემბრიდან შევუდექი უფლება-მოსილების საქმიანობის გახორციელებას, ფაქტიურად, ბიუჯეტი დამხვდა ცარიელი. ამ მხრივ პარალიზება ემუქრებოდა ყველაფერს და ასე თუ ისე, შევძელი ამ უზარმაზარი პრობლემის მოგვარება და უმოკლეს დროში გადაჭრა. ამის შემდეგ, მიმდინარე პროცესებს ვსწავლობდი. ამ ორთვენახევრის მანძილზე, ერთხელაც არ მოსულა ტიფო მიქატაძე ჩემთან ამბის საკითხავად, არ დაინტერესებულა ჩემი საქმიანობით. ეტყობა, სახლში უნდა მივაკითხოთუ რას ითხოვს?
_ბატონო კოტე, ბატონი ტიფო მიქატაძე აღნიშნავს, რომ მან არაერთხელ მოგმართათ თქვენ შეხვედრის მიზნით.
_მომწერა წერილობით, დავჯდეთ და ვისაუბროთო. შევიკრიბეთ მე, ზვიად კვაჭანტირაძე, შოთა გოგიბერიძე, ტიფო მიქატაძე და დავით დარჩია. აბსოლუტურად კოალიციურ რეჟიმში განვიხილეთ ის საკითხები, რაც მას აწუხებს. ამის შემდეგ, წამოვიდა და რა წამოვიდა ქალბატონ მარინა სუნგულიას (ტიფო მიქატაძის მეუღლე, ოზურგეთის მაჟორიტარის ბიუროს ხელმძღვანელი. ავტ) მხრიდან რაღაც უაზრო აგრესიები. ის უაზროდ და უხეშად ჩაერია ჩემს ფუნქციებში, მაჟორიტარი დეპუტატის ბიუროს სახელით უამრავ პრობლემებს მიქმნიდა
-კონკრეტულად რაში გამოიხატებოდა ეს?
_ კონკრეტულად თავს მახვევდა თავისსავე შერჩეულ კანდიდატურებს, ამას მოყვა რაღაც გაუგებრობები, ბატონ ტიფოს განცხადებები, ქალბატონ ლელა ნაცვალაძის განცხადებები, ბატონ ნუგზარ გიორგაძის განცხადებები, რომლებიც პირდაპირ ჩვენს დისკრედიტაციაზე არიან გადასული ჩასაფრებული თუ ღია პოზიციით. ნამდვილად არ ვაპირებ ამ ადამიანების საქციელზე და აბსურდულ განცხადებებზე ვაკეთო კომენტარები და გავცე კითხვებს პასუხი. მე მინდა, თქვენი გაზეთის საშუალებით განვაცხადო, რომ ამ თვის ბოლოს მოვაწყობ პრესკონფერენციას. ასი დღის ანგარიშს ჩავაბარებ საზოგადოებას და ნებისმიერ კითხვებს გავცემ პასუხს, ჟურნალისტებთან ერთად. მოვიწვევ პრესკონფერენციას, ბრიფინგს და საჯაროდ გავცემ პასუხს ყველა კითხვას. მათ შორის, იმ კითხვებსაც, რომ მე, თითქოს, არ ვმოქმედებ კოალიციურად, ამასაც დავასაბუთებ და გავცემ პასუხს.
_ ბატონო კოტე, საკადრო ცვლილებების გახორციელების შემდეგ, დანიშნულია თუ არა სადმე თანამდებობაზე რესპუბლიკური პარტიის წევრები?
_ რა თქმა უნდა. რესპუბლიკურ პარტიას არც ჰყავს ბევრი კანდიდატი და ათ სოფელში, შეცვლილ რწმუნებულებს შორის, არის რესპუბლიკური პარტიის სამი წევრი. შეიძლება ჩემი მხრიდან არც იყო ეს სწორი, მაგრამ გავითვალისწინე. მე პირადად არ მიმიღია კანდიდატები ისე, რომ არ გამეითვალისწინებინა კოალიციის აზრი. მე ვთხოვე ტიფოს, რომ მას წარმოედგინა ჩემთვის კანდიდატურები, მაგრამ მას არ წარმოუდგენია.
_ თქვენი აზრით, რას ითხოვს ტიფო მიქატაძეს თქვენგან?
_პირდაპირ გეტყვით ერთს. ქალბატონი მარინე სუნგულია და ბატონი ტიფო მიქატაძე საზოგადოებთვის მიმინდია შესაფასებლად. შეაფასოს საზოგადოებამ მათი ოპოზიციონერობა, აღმასრულებელ ხელისუფლებაში მათი როლი საერთოდ და მათი ხედვა.
_ბატონი ტიფო მიქატაძე აცხადებს, რომ თქვენი არჩევა მოხდა უკანონოდ.
_თავიდან ერთპიროვნულად რომ მიჭერდა მხარს ტიფო მიქატაძე და მარინა სუნგულია, ახლა რამ შეცვალა? ჩემს დანიშვნასთან დაკავშირებით, დასკვნა დადო საქართველოს დემოკრატიული განვითარების კავშირის იურისტმა ირაკლი პაპავამ და ბატონ ტიფოს ვურჩევ წაიკითხოს და ნახოს კანონი, თუ მას აქვს პრეტენზია და ამავე დროს შეუძლია, მიმართოს სასამართლოს, ამასთან დაკავშირებით.
_ბატონ ტიფო მიქატაძეს მხარი დაუჭირა ლელა ნაცვალაძემ…
_შეგახსენებთ, რას ამბობდა ბატონი ტიფო, ცოტა ხნის წინ, ლელა ნაცვალაძეზე. თქვენი გაზეთი ამოიღეთ. ერთ რამეს გეტყვით, რომ ერთადერთმა კაცმა შევძელი, ლელა ნაცვალაძე წინასაარჩევნოდ შტაბს სიახლოვეს არ გაკარებოდა. მას არ მივეცი იმის საშუალება, რომ თავისი წეს-ჩვეულებები გამოეყენებინა ამ პროცესებში. საზოგადოებამ ძალიან კარგად იცის, ვინ არის ლელა ნაცვალაძე და რა წარსული აქვს მას სხვადასხვა არჩევნების პერიოდში. ყველა დროში რასაც წარმოადგენდა. მისი ადგილი არ იყო “ქართულ ოცნებაში” და ამისთვის არის ის გაღიზიანებული. ახლა ჩემს წინააღმდეგ გაერთიანდნენ ბატონი ტიფო მიქატაძე და ლელა ნაცვალაძე? არაა სასაცილო? კი, ბატონო, თუ ვინმე გამოდის ჩემს წინააღმდეგ და რა თქმა უნდა, ასეთები არსებობენ, ეს ადამიანები დღევანდელი ხელისუფლების პროგრამას გაგებით ვერ ეკიდებიან. მათ ჰგონიათ, რომ მე ვარ დამოუკიდებელი ფიგურა, რომელიც მათთან შეუთანხმებლად წყვეტს საკითხებს. ბოდიში, მაგრამ მე ნამდვილად ვერ შევეკითხები აზრს ლელა ნაცვალაძეს, ნუგზარ გიორგაძეს და ახლა უკვე, თუნდაც, ტიფო მიქატაძეს. ტიფო მიქატაძეს ჰქონდა ძალიან დიდი დრო იმისა, რომ მას ჩემთან ერთად გამოენახა საერთო ენა და ერთად ვყოფილიყავით საქმეზე ორიენტირებულნი, თუმცა ვიღაც თუ რაღაც უშლის ხელს. აქედან გამომდინარე, ლელა ნაცვალაძეს სიამოვნებს თუ კი ვინმე ჩემს წინააღმდეგ ამოიღებს ხმას და მე მიკვირს ტიფო მიქატაძისგან, მან როგორ გაიერთიანა ჩემს წინააღმდეგ ლელა ნაცვალაძე? თვითონ არ წერდა, ლელას “გაშიფრვას” ასე ვახერხებდი, მოგონილ ამბებს მხოლოდ მას ვუზიარებდი და საღამოს უკვე ნაციონალებთან მიტანილი იყოო… კარგით, რა. თუკი მე კოალიციას წარმოვადგენ და რა თქმა უნდა, წარმოვადგენ, ამიტომ მისცა ტიფომ საკუთარ თავს უფლება და პრესკონფერენციაზე კოალიციის არაწევრებთან ერთად, ჩემს წინააღმდეგ გააკეთა განცხადებები? აქედან გამომდინარე, ტიფო მიქატაძე თავისი მეუღლითურთ, ჩემთვის გახდა იგივე, რაც ლელა ნაცვალაძე.
