“ჩემზე არ იდარდო” _ საკრებულოს თავმჯდომარის რჩევა დეპუტატს

მამეშვილის  საკრებულოს  წევრებთან შეხვედრის პარალელურად,  საკრებულოს დეპუტატი, პარტია “თავისუფალი დემოკრატების” ლიდერი დიმიტრი კვერღელიძეც “მუშაობს”.  ჩვენი ინფორმაციით, ის მაჟორიტარ დეპუტატებს, ორი დღეა, დაჟინებით თხოვს, მხარი დაუჭირონ კვერღელიძის  კანდიდატურას საკრებულოს თავმჯდომარის პოსტზე. წინააღმდეგ შემთხვევაში კი, შესაძლოა, საკრებულოში პროკურატურის შესვლა  მოხდეს და დეპუტატების პროკურატურაში დაბარებით  გაგრძელდეს. „გურია ნიუსი“ ამ საკითხებზე საკრებულოს თავმჯდომარეს ალეკო მამეშვილს ესაუბრა.

_ ბატონო ალეკო, მართებულია თუ არა მითქმა-მოთქმა იმასთან დაკავშირებით, რომ ოზურგეთში  29 აიპი წინასაარჩევნოდ შეიქმნა და ფაქტობრივად, მასში დახარჯული თანხა როგორც ამბობენ,    წყალში გადაყრილად ითვლება?

_ აიპიების უმრავლესობა 2010 წელს, არჩევნების შემდეგ შეიქმნა . არა მგონია, 2010 წელს შექმნილი აიპიებს მიზნობრიობა ყოფილიყო 2012 წლის წინასაარჩევნო მზადება.  ამაში ვერ დაგეთანხმებით, მაშინ არ ყოფილა ამ თემაზე საუბარი. მეც და საზოგადოებაც თვლის, რომ  მაშინ შექმნილმა აიპიებმა თავისი საქმე გააკეთეს, ანუ მართებული იყო მისი შექმნა.

_ რამდენად მიზანშეწონილად მიგაჩნიათ ამა თუ იმ აიპში პარალელურად, მაჟორიტარი დეპუტატების დასაქმება? მაშინ როდესაც ძალიან ბევრი ადამიანია უმუშევარი?

_მერე რა, მაჟორიტარი დეპუტატებიც ჩვეულებრივად ადამიანები არიან. ქვეყანაში ისეთი ადამიანებიც არიან, რომლებსაც გაცილებით მაღალი ხელფასი აქვთ. თუკი ადამიანები ასრულებენ თავიანთ უფლებამოსილებას, რატომ არ უნდა ჰქონდეთ მაღალი ანაზღაურება და რატომ არ უნდა იყვნენ დასაქმებული? გასაგებია, რომ ერთი ადამიანის ანაზღაურება, სამი და ოთხი ადამიანისთვის არ იყოს  მისაღები, მაგრამ ამით ხომ არ განსაზღვრავ ხელფასის გაცემის საკითხს? ის დეპუტატიც დასაქმებულია.  შეზღუდული იმიტომ უნდა იყოს, რომ დეპუტატია?

_ როგორც ამბობენ, თქვენს ადგილს “თავისუფალი დემოკრატების” ლიდერი, დიმიტრი კვერღელიძე “უმიზნებს” და წინა მოსამზადებელი სამუშაოებიც დაწყებული აქვს…

_დიმიტრი კვერღელიძეს რომ საკრებულოს თავმჯდომარეობა უნდა, ეს არახალია. მოსული არ იყო, რომ უნდოდა უკვე, მაგრამ ეს ასე არ ხდება. რა გზით უნდა მოვიდეს? თუკი თავმჯდომარეობა უნდა იმით, რომ ის პროკურატურას გაიყვანს დეპუტატებთან გარიგებებით, შეუძლია, ჩემზე არ იდარდოს, ალბათ, აქვს ამის მექანიზმები.

_ ბატონო ალეკო, თქვენ კარგად იცით,  ყოფილი გამგებლის ილია ვაშაყმაძის ფაქტი, როგორ და რატომ დაიბარეს პროკურატურაში და რატომ დატოვა გამგებლის პოსტი. რამდენად შესაძლებელია, რომ თუ “მშვიდად” არ დატოვებთ ადგილს, გაგრძელდება  ძიება და ამჯერად, თქვენ დაგიბარებენ პროკურატურაში ?

_ არანაირად არ ვფიქრობ ამაზე. ერთადერთი, რითაც შეიძლება გადადგეს ალეკო მამეშვილი, ეს არის დამოკიდებული დეპუტატების ხმათა უმრავლესობაზე და შემდეგ იგივე უმრავლესობა აირჩევს საკრებულოს თავმჯდომარეს.

_ პროკურატურამ ოზურგეთის თითოეული სოფლის პროგრამის შესწავლა დაიწყო. რას გვეტყვით ამის შესახებ?

_ჯერ მოგვივიდა სასამართლო განჩინება, ყველა ინფორმაცია, რაც საჭირო იყო, გადავეცით. შემდეგ მოვიდნენ პროკურატურის წარმომადგენლები, მათ ჩამოწერეს ის ძირითადი დოკუმენტაცია, რაც  საკრებულოში იყო.  ჩვენ დავაწყვეთ და მათ წაიღეს, გაფორმდა აქტი, რომ ეს დოკუმენტები წაიღეს და ამის შემდეგ სხვა ინფორმაცია ჩემთვის ცნობილი არ არის.

_ ბატონო ალეკო, რას ელოდებით გამოძიებისგან? რა შედეგი, შეიძლება, დადგეს?

_ რა შეიძლება,  თქვენი აზრით? მე ჩვეულებრივ რეჟიმში ვაგრძელებ მუშაობას და გავაგრძელებ კიდევ. მე თუ არ ვიცი, რა ხდებოდა სოფლის პროექტებში, რას ვაკეთებდი და რა იყო ჩემი უფლებამოსილება, როგორ გავაკეთე თითოეული სამუშაო?  სხვამ როგორ უნდა გამოიძიოს? ჩემზე მეტად, ვინ იცის ეგ? არავინ!