16 ივლისს, საქართველოს სტატისტიკის ეროვნული სამსახურმა, გურიის რეგიონში საინფორმაციო შეხვედრები მოეწყო. შეხვედრები გაიმართა, როგორც თვითმმართველობის, ისე ბიზნესსექტორის, არასამთავრობო ორგანიზაციების, საზოგადოების და მედიის წარმომადგენლებთან.
საქართველოს სტატისტიკის ეროვნული სამსახურის წარმომადგენლებმა ისაუბრეს საქსტატის მუშაობის სპეციფიკის, გამოყენებული მეთოდოლოგიების და ასევე, გურიის რეგიონის შესახებ. გააცნეს მათ საქსტატის მიერ წარმოებული მონაცემები.
ინოვაციების და ახალი ტექნოლოგიების ცენტრში შეხვედრისას, საქსტატის აღმასრულებელმა დირექტორმა გოგიტა თოდრაძემ ისაუბრა.
შეხვედრაზე მყოფ საზოგადოების წარმომადგენლებთან მან განაცხადა, რომ მსგავსი ტიპის საინფორმაციო შეხვედრები ძალიან მნიშვნელოვანია და ცნობიერების ამაღლებას უწყობს ხელს.
საქართველოში სტატისტიკის სისტემის განვითარების ძირითადი მიმართულებების, საქსტატის მიერ შემუშავებული პროდუქტების და განვითარების სერვისების შესახებ სლაიდები წარმოადგინეს.
არის თუ არა ზუსტი და სანდო საქსტატის მონაცემები? როგორ კეთდება ის? ხომ არ არის “შელამაზებული”? _ ამ კითხვის პასუხად, გულახდილად ითქვა, რომ ეს “შელამაზებული” სტატისტიკაც არ გამოიყურება კარგად.
ყველაზე საგანგაშო, რაც შეხვედრაზე გამოიკვეთა, არის დემოგრაფიული მდგომარეობის ზოგადი მაჩვენებელი.
მაგალითად, გასულ წელს გარდაცვლილთა რაოდენობა აჭარბებს ახალშობლთა რაოდენობას _ გარდაიცვალა 60 ათასი ადამიანი და დაიბადა _ 46 ათასი.
_ ეს არის ცუდი მაჩვენებელი, თუმცა, არსებობს ერთი გარემოებაც. ახლა მომავალ თაობას ქმნის ოთხმოცდაათიანი წლებში დაბადებულთა თაობა. მოგეხსენებათ, მაშინ რა მდგომარეობა იყო ქვეყანაში _ ბევრი ადამიანი წავიდა უცხოეთში. ბევრიც, ამ წლებში დაბადებული, მერე გავიდა ქვეყნიდან. ამიტომ ეს მიზეზიც რეალურია, _ თქვა გოგიტა თოდრაძემ.
გურიის რეგიონის სოციალურ-ეკონომიკური მდგომარეობის მიმოხილვისას, თოდრაძემ განაცხადა, რომ ამიერიდან საინფორმაციო შეხვედრები ყოველ კვარტალში იგეგმება.
მისივე განცხადებით, სტატისტიკის გამოყენების ხელშეწყობა უპირველესი ამოცანაა და აქვთ სურვილი, ხალხისგან მოისმინონ სხვადასხვა აზრი, რაც ხელს შეუწყობს სტატისტიკური კვლევების კარგად ჩატარებას.
რეგიონის სოციალურ-ეკონომიკური მიმოხილვისას ისაუბრეს პირდაპირ და უცხოურ ინვესტიციებზე. აღნიშნეს, რომ გურიიდან ყველაზე მეტი ვიზიტი აჭარაში ხორციელდება.
ისაუბრეს ბიზნესსექტორზე, დასაქმებასა და უმუშევრობაზე, პირდაპირი და უცხოური ინვესტიციების შედეგებზე. თუმცა, არაფერი თქმულა უმუშევრობის დონის განსაზღვრაზე.
_ ხდება თუ არა შრომის ბაზრის კვლევა? _ ამას რეგიონულ და მუნიციპალურ ჭრილში იშვიათად ვხედავთ. გეხებათ თუ არა შრომის ბაზრის კვლევა და რა მოთხოვნებია? _ დასვა კითხვები სამოქალაქო საზოგადოების წარმომადგენელმა ოთარ რევიშვილმა.
გოგიტა თოდრაძემ პასუხად ისაუბრა, თუ ვინ ითვლება შრომის საერთაშორისო ორგანიზაციების მეთოდოლოგიით უმუშევრად:
_ უმუშევარი არის 15 წლის და ზედა ასაკის პირი, რომელიც გამოკითხვის მომენტში არ მუშაობდა წინა ერთი კვირის განმავლობაში საერთოდ და სამუშაოს ბოლო ოთხ კვირაში ეძებდა. ზოგადად, უმუშევრობის დონე გამოითვლება უმუშევართა რაოდენობის შეფარდებით, 15 წლის და უფროსი ასაკის აქტიური მოსახლეობის ნაწილთან. აქედან გამომდინარე, უმუშევრად ითვლებიან მხოლოდ ის ადამიანები, რომლებიც ეძებენ სამუშაოს და მზად არიან სამსახურის დასაწყებად, _ თქვა გოგიტა თოდრაძემ და ასევე, განმარტა, რომ ის ადამიანები, რომლებიც ეძებენ სამუშაოს ოთხი კვირის განმავლობაში, მაგრამ სამუშაოს მოძებნის შემთხვევაში არ იყვნენ მზად მუშაობის დასაწყებად, ასეთი ადამიანები ეკონომიკურად არააქტიურებს მიეკუთვნებიან.
რამდენად მართებულია მიდგომა, რომ ადამიანი, რომელიც მართალია, არ მუშაობს, არ ეძებდა სამუშაოს, მაგრამ ჰქონდა მიზეზი, რომ ვერ გავიდა სამუშაოს მოსაძებნად, რატომ უნდა ეკუთვნოდეს არააქტიურ კატეგორიას? ამ კითხვაზე პასუხი არავის აქვს. ან რატომ ითვლება თვითდასაქმებული ადამიანი მეთოდოლოგიურად დასაქმებულად, რომელიც შესაძლოა, ერთი კვირის განმავლობაში მუშაობდეს და იღებდეს გასამრჯელოს, მაგრამ მომდევნო კვირაში ან მომდევნო დღეს _ არა! ასეთ კითხვებზე პასუხი არ ჩანს.
დღესდღეობით, ქვეყანაში 400 ათასი თვითდასაქმებულია, რომლებსაც, შესაძლოა, მომდევნო დღეს ეს სამუშაო აღარ ექნეს! ეს კი საგანგაშო სტატისტიკის ნაწილია!
ოთარ რევიშვილმა, ასევე, განაცხადა, რომ კონკრეტულ შემთხვევაში რომ საჭირო გახდეს სტატისტიკა, რამდენი დაუსაქმებელია რეგიონში, მუნიციპალიტეტში, ზუსტი რიცხვი არ არსებობს.
მან ასევე თქვა, რომ მრავალი წლის მანძილზე, გურია არ იყო გამოყოფილი სხვა რეგიონებისგან თავისი სტატისტიკური მონაცემებით. ბოლო ხუთი წელია, რაც მოხდა განცალკევება და ეს პოზიტიური ნაბიჯია მონაცემთა უკეთ დასადგენად. თუმცა ზუსტი სტატისტიკა მაინც ჭირს ყველა სფეროში.
შეხვედრაზე დასახელდა რიცხვი, რომ ქვეყანაში ეკონომიკური სტრუქტურის მიმართულების 880 ათასი ორგანიზაციაა რეგისტრირებული. მათ შორის, 21 ათასი შპს ორგანიზაციაა. თუმცა, მოქმედია მხოლოდ 130 ათასი.
სტატისტიკა, 880 ათასიდან რომ მხოლოდ 130 ათასია აქტიური, ცუდზე ცუდია. რა არის ამის მიზეზი? _ ამ კითხვაზე გოგიტა თოდრაძემ ასეთი პასუხი გასცა:
_ ამას აქვს თვითახსნა. საკმაოდ მარტივია ბიზნესის დარეგისტრირება, თუმცა, ბიზნესის მართვა ჭირს და ძნელია (?).
აქვე შევნიშნავთ, რომ ასეთ მონაცემებს (რომელიც აშკარად ჩანს, რომ ფიქტურია) სხვადასხვა ტრიბუნებიდან ისევ სახელმწიფო მოხელეები იყენებენ, რომ ამდენი ეკონომიკური სტრუქტურა არსებობს, მუშაობს და საქმე კარგადაა!
შეხვედრაზე, ასევე, დაკონკრეტებით ისაუბრეს დაქირავებულებსა და თვითდასაქებულებზე, რომლისგანაც შედგება, ზოგადად, დასაქმებულთა კატეგორია.
თუ რა მდგომარეობაა რეგიონის სოფლის მეურნეობაში, კონკრეტულად, სოფლებში, რის მთქმელია სტატისტიკა, ამ საკითხზე არ უსაუბრიათ.
ყველაზე საგანგაშო სტატისტიკა კი ქართულ სოფელში (ამჯერად გურიაზე ვსაუბრობთ) ის არის, რომ ყოველ წელს ეკონომიკური მაჩვენებლის უკუსვლა მზარდია. არც არაფერი კეთდება სოფლის მეურნეობის გასაძლიერებლად.
კერძოდ, არაერთხელ არაერთი სტატიის თემა ყოფილა და გაგვიშუქებია, თუ როგორ უფრო და უფრო ნაკლებია თითოეულ სოფელში დახნულ-დათესილი სავარგულები, მსხვილფეხა რქოსანი პირუტყვი თუ შინაური ფრინველი და ასე შემდეგ.
საქართველოს სტატისტიკის ეროვნული სამსახურის წარმომადგენლებმა ამავე დღეს შეხვედრა გამართეს სამივე მუნიციპალიტეტის ხელისუფლების წარმომადგენლებთან.
_ საინტერესო შეხვედრა გვქონდა საქსტატის აღმასრულებელ დირექტორთან, გოგიტა თოდრაძესთან და საქართველოს სტატისტიკის ეროვნული სამსახურის წარმომადგენლებთან, სადაც განვიხილეთ მუნიციპალიტეტების საჭიროებები და ვისაუბრეთ სამომავლო გეგმებში მონაცემების ასახვის შესაძლებლობებზე.
სტატისტიკურ მონაცემებზე ხელმისაწვდომობა, დაგვეხმარება სწორად დავგეგმოთ მტკიცებულებებზე დაფუძნებული მუნიციპალური პოლიტიკა და მეტი ინფორმაცია მივაწოდოთ ჩვენს თანამოქალაქეებს, მათთვის მნიშვნელოვან საკითხებზე, _ აღნიშნა ოზურგეთის მერმა, ავთანდილ თალაკვაძემ.
საქსტატი გეგმავს წლის განმავლობაში კონსულტაციები გამართოს ყველა რეგიონის ადგილობრივ თვითმმართველობებთან, რაც გულისხმობს რეგიონულ, ასევე, მუნიციპალურ დონეზე, მოთხოვნებისა და საჭიროებების შესწავლას და აქტიურ დიალოგს თვითმმართველობის წარმომადგენლებთან, _ აცხადებენ ოზურგეთის მუნიციპალიტეტის მერიასა და სამხარეო ადმინისტრაციაში.
რამდენად საინტერესო იყო ეს შეხვედრა, მოხდება თუ არა დაპირებისამებრ, ყოველ კვარტალში სტატისტიკის ეროვნული სამსახურის მიერ, დაპირებული საინფორმაციო შეხვედრების ორგანიზება, სადაც მათივე თქმით, ელოდებიან, უშუალოდ ხალხისგან მოისმინონ, რა ხდება რეგიონში, ამას უახლოესი მომავალი გვიჩვენებს.
ავტორი
