როგორც ვარძელაშვილის ადვოკატმა გიორგი გელხაურმა განაცხადა, ვარძელაშვილს ბრალი სისხლის სამართლის კოდექსის 236-ე მუხლის პირველი ნაწილით ედება, რაც 3 წლამდე თავისუფლების აღკვეთას ითვალისწინებს. იარაღის უკანონოდ გასხვისებისთვის ვახტანგ ბიჭაშვილს ბრალი წაეყენა სისხლის სამართლის კოდექსის 336-ე მუხლის მესამე ნაწილით, რომელიც 5-დან 8 წლამდე თავისუფლების აღკვეთას ითვალისწინებს.
დევი სირაძის მკვლელობაში ბრალდებულ ზვიად ქავთარაძეს ბრალი სისხლის სამართლის კოდექსის 116-ე მუხლის პირველი ნაწილით ედება და ის თავისუფლების აღკვეთას 2-დან 4 წლამდე ითვალისწინებს. როგორც ქავთარაძის ადვოკატმა კახაბერ შონიამ განაცხადა, მისი დაცვის ქვეშ მყოფი თავს დამნაშავედ ცნობს.
სასამართლო პროკურატურის მიერ დაყენებულ შუამდგომლობებს განიხილავს.
ადვოკატი გოგიტა გაბაიძე იმედოვნებს, რომ ბრალდებულებს სასამართლო დარბაზიდანვე გაათავისუფლებენ.
გოგიტა გაბაიძე (ადვოკატი): „ბრალდების მხარის მიერ დაყენებული იქნება შუამდგომლობა ნაკლებად მკაცრი ღონისძიების, გირაოს შეფარდების შესახებ, რადგან ვარძელაშვილის და ბიჭაშვილის მიმართ წაყენებული მუხლები მძიმე კატეგორიას არ მიეკუთვნება. ვფიქრობ, ქავთარაძის მიმართაც გირაოს მოითხოვენ, რადგან ყველამ ვიცით, რომ ეს იყო უბედური შემთხვევა. დაზარალებულის ოჯახს პრეტენზია არ გააჩნია. ბრალდების მხარემ ბიჭაშვილისა და ვარძელაშვილისთვის გირაოს შეფარდება მოითხოვა, ხოლო ქავთარაძისთვის პატიმრობის, თუმცა, ადვოკატი ქავთარაძისთვის 10 ათას ლარიან გირაოს ითხოვს და აცხადებს, რომ ბრალდებული გამოძიებასთან თანამშრომლობისთვის მზადაა. დაცვის მხარემ პროცესზე გარდაცვლილის მეუღლის წერილიც წარადგინა, რომელსაც პრეტენზიები არ აქვს.“
როგორც საზოგადოებისთვის ცნობილია, 22 თებერვალს დაკავებულები მეგობრებთან ერთად, ნუცუბიძის ქუჩაზე, ვლადიმერ ვარძელაშვილის საცხოვრებელ ბინაში სტუმრად იმყოფებოდნენ. ვარძელაშვილმა საკუთარი იარაღის კოლექციის დასათვალიერებლად მეგობრები გვერდით ოთახში გაიყვანა. ზვიად ქავთარაძეს კი, “ტეტე” -ს სისტემის პისტოლეტი გაუვარდა და ტყვია მოპირდაპირედ მდგარ დევი სირაძეს გულ-მკერდის არეში მოხვდა. დაჭრილი საავადმყოფოში მიყვანამდე გარდაიცვალა. გამოძიებით დადგინდა, რომ იარაღი რეგისტრირებული იყო ლადო ვარძელაშვილის ნათესავის სახელზე, რომელმაც 2010 წელს აღნიშნული პისტოლეტი სპორტისა და ახალგაზრდობის საქმეთა ყოფილ მინისტრს აჩუქა.
