“ფურიმის” დღესასწაული ძვ.წ მე-5 საუკუნეში, სპარსეთში მცხოვრები ებრაელების გადარჩენის აღსანიშნავად დაწესდა. “ფურიმი“ მხიარულების დღესასწაულია, რომლის დროსაც, ადამიანებს ღვინის განუსაზღვრელი რაოდენობით დალევის უფლება აქვთ.
დღესასწაულს უამრავი სტუმარი ესწრებოდა, რომელთა შორის საქართველოს სპორტისა და ახალგაზრდობის საქმეთა მინისტრი ლევან ყიფიანი იმყოფებოდა.
ლევან ყიფიანი: “ეს საღამო კიდევ ერთი გამოხატულებაა საქართველოსა და ისრაელის მეგობრობის. ეს დღესასწაული ძალიან მნიშვნელოვანი და საყვარელია იმიტომ, რომ ბავშვებს ეხება, ბავშვი კი ყველა ბავშვია და ყველგან – ბავშვი. ამიტომ სიმბოლურიცაა, რომ დღეს ჩვენი მასპინძელია მოსწავლე-ახალგაზრდობის სასახლე. ჩვენ მომავალშიც გავაგრძელებთ მხარი დავუჭიროთ ბავშვებს და ყველა იმ ღონისძიებას, რომლებიც მათ ეხება. მინდა ვისარგებლო შემთხვევით და კიდევ ერთხელ მივულოცო ეს დღე ებრაელ ხალხს.
დღესასწაულის ორგანიზატორმა მარინა მააზოვმა ყველა ებრაელს მიულოცა ეს დღე და გამოხატა სიყვარული იმ ქართველებისადმი, რომლებიც ებრაელების მეგობრები არიან.
მარინა მააზოვი: “დღეს არის უდიდესი დღესასწაული “ფურიმი” ეს არის გამარჯვების დღე და ყველაზე მხიარული დღესასწაულია. ძალიან მიხარია, რომ საქართველოში გვეძლევა საშუალება ეს დღესასწაული აღვნიშნოთ მეგობრებთან ერთად. “ფურიმი” ბავშვებისთვის განსაკუთრებით სასიხარულოა, რადგან მათ საჩუქრები, ტკბილეული და კოსტუმირებული მსვლელობა ელით.
