სტატიაში კოალიცია „ქართული ოცნების“ წინასაარჩევნო შტაბის წევრი ზურაბ ნინუა ბოდიშს უხდის პარტია „ქართული ოცნება–დემოკრატიული საქართველოს“ აბაშის ორგანიზაციის თავმჯდომარეს, გიორგი გვილავას იმისთვის, რომ მედია საშუალებებით შეურაცხყოფა მიაყენა და შელახა მისი რეპუტაცია.
ამ დილით „გურია ნიუსმა“ კიდევ ერთი წერილი მიიღო, რომლის ავტორი კოალიციის შტაბის კოორდინატორი, ფიქრია ტყებუჩავაა. ეს ის ქალბატონია, რომელმაც პრემიერის რეზიდენციასთან გამართულ აქციაზე გააპროტესტა გვილავას პარტიის თავმჯდომარეობა და ბიძინა ივანიშვილთან შეხვედრა მოითხოვა აქციის სხვა წევრებთან ერთად. ჩვენ უცვლელად გთავაზობთ წერილს.
_ ნამდვილი „ქართული ოცნება“ ბოდიშს არასოდეს მოიხდის. ის ადამიანები, ვინც „ქართული ოცნების“ ნამდვილი გულშემატკივრები ვიყავით და ძალღონეს არ ვიშურებდით იმისთვის, რომ ქვეყნის მომავალი შეცვლილიყო უკეთესობისკენ, დღეისათვის არც ერთი არა ვართ პარტიის წევრები. აბაშაში გაწევრიანდა ადამიანები, ვისაც რაიონში „ქართული ოცნების“ არჩევნებში გამარჯვებისთვის არანაირი წვლილი არ მიუძღვით. ის ადამიანები ვინც დელეგატებად იყვნენ მიწვეულნი, როცა ქვეყანას სჭირდებოდა, სახლებში იჯდნენ და ოცნებობდნენ. აბაშის 24 საარჩევნო უბნიდან 4-მა უბანმა გაიმარჯვა და იმ 4 უბანში გამარჯვება ჩემი და ჩემი მეგობრების დამსახურებაა. პირადად ჩემი პარტიაში გაწევრიანების საკითხი პარტიის თავჯდომარის ბატონი გიორგი გვილავას მხრიდან იწვევს გაღიზიანებას, კერძოდ მას არ მოეწონა ჩვენი ვიზიტი ბატონ ბიძინა ივანიშვილთან. მე ვესაუბრე ბატონ გიორგი გვილავას და მისი პასუხი იყო: ‘თქვენ ეწინააღმდეგებით პარტიის ინტერესებს”.მე მივმართავ ბატონ გვილავას წერილობით დააკმაყოფილოს ჩემი მოთხოვნა იმის გამო, რისთვის მეუბნება ის უარს მიმიღოს პარტიაში.
კიდევ ერთი თანაგუნდელის, კერძოდ ზურაბ ნინუას, რომელიც ბოდიშს უხდის ბატონ გიორგი გვილავას კრიმინალის წოდებისთვის, მინდა განვმარტო, რომ ეს იყო მისი სუბიექტური გადაწყვეტილება. ნამდვილი „ქართული ოცნება“ დგას იქ სადაც უნდა იდგეს და გავხდები თუ არა ამ პარტიის წევრი, მაინც დავრჩები მისი მომხრე და მზად ვარ ნებისმიერი სამუშაო შევასრულო ამ პარტიის შემდგომი გამარჯვებებისათვის, რაშიც ღრმად ვარ დარწმუნებული, _ გვწერს ფიქრია ტყებუჩავა.
„გურია ნიუსი“ ამ წერილთან დაკავშირებით პარტიის თავმჯდომარეს, გიორგი გვილავას დაუკავშირდა.
გიორგი გვილავა: ძალიან მიკვირს ეს თემა კიდევ რომ ამოტივტივდა. მე არაერთხელ გავეცი პასუხი მათ კითხვებს როგორც ინტერვიუებში, ასევე პირადადაც, როცა ჩვენი შეხვედრა შედგა. დამიბარეს, მივედი და ძალიან კეთილ განწყობითაც დავშორდი კოალიციის ყველა კოორდინატორს. ნინუაც იყო იქ და ფიქრიაც. ნინუა ადრევე წავიდა, ფიქრიამ თავიდან კითხვები დამისვა, მერე ვისაუბრეთ ხალხის თანდასწრებით, წარმატებები მისურვა და აღმითქვა დახმარება. რა მოხდა მას შემდეგ, არ ვიცი, მეორე დღეს უკვე საპროტესტო აქციები დაიწყეს და ქალბატონი ფიქრია აცხადებდა, რომ მე ვარ თვითმარქვია და საკუთარი თავი თვითონ დავინიშნე, მაგრამ კიდევ ერთხელ მინდა ყველას გასაგონად ვთქვა, მე პარტიის მთავარი საბჭოს გადაწყვეტილებით მომენიჭა უფლებამოსილება საინიციატივო ჯგუფთან ერთად მომემზადებინა რაიონული ორგანიზაციის სადამფუძნებლო კონფერენცია. სწორედ ამ კონფერენციაზე ამირჩია თავმჯდომარედ 86 დელეგატმა. ეს დელეგატები აბაშისთვის საკმაოდ ნაცნობი და პატივსაცემი ადამიანები არიან. მე „ოცნების“ ყველა აქტივისტს დიდ პატივს ვცემ, ადრეც ვუთხარი მათ, რომ როგორც კი აბაშაში გაიხსნება ოფისი და დაიწყება პარტიაში გაწევრიანება, შეუძლია ყველას მოგვმართოს და ბიუროს გადაწყვეტილება როგორიც იქნება, ისე მოიქცევა თავმჯდომარეც. ქალბატონმა ფიქრიამ, ჩემთან საუბარშიც თქვა და წერილშიც დაუწერია, რომ ხმების მოტანა გამარჯვებული სოფლიდან, სწორედ მისი დამსახურებაა, რაზეც ჩემი პასუხი იყო _ ერთმა და ორმა კი არა, ყველამ ერთად, მთელმა ქართველმა ხალხმა იბრძოლა კოალიციის გამარჯვებისა და არსებული რეჟიმის შესაცვლელად, ხმების მოტანა კოალიციისთვის და გამარჯვება კი, პირველ რიგში ბიძინა ივანიშვილის დამსახურებაა. უბრალოდ არ მივცემ ჩემს თავს იმის უფლებას, რომ მისი პასუხი გითხრათ, იმედია თვითონაც კარგად ახსოვს. მოდით მისივე სიტყვები ვნახოთ, რაც წერილში წერია – „მე მივმართავ ბატონ გვილავას წერილობით დააკმაყოფილოს ჩემი მოთხოვნა იმის გამო, რისთვის მეუბნება ის უარს მიმიღოს პარტიაში.“ ხოდა, როგორც კი ოფისი გაიხსნება, მობრძანდეს ქალბატონი, მომმართოს წერილობით და პასუხსაც ამ ფორმით მიიღებს. რაც შეეხება ზურაბ ნინუას, ბოდიშის მოხდა სირცხვილი არ არის, მითუმეტეს ქრისტიანისთვის. მან ძალიან დიდი შეურაცხყოფა მომაყენა, ჩემი ოჯახი განადგურებული იყო, ამის ფონზე დედაჩემი ძალიან ცუდად გახდა, მაგრამ მიტევების უნარი ყველას უნდა გვქონდეს. კარგი იქნება, თუ მის მაგალითს სხვაც მიბაძავს და ცრუ ბრალდებებისგან თავს შეიკავებს. დასასრულს კიდევ ერთხელ გავიმეორებ, ყველამ კარგად რომ გაიგოს _ როგორც კი გაიხსნება ოფისი, დაიწყება გაწევრიანება, შეუძლია ნებისმიერ მსურველს შემოიტანოს განცხადება, ჩვენი კარი ღიაა ყველა იმ ადამიანისთვის, ვინც პარტიის მიზნებსა და ამოცანებს იზიარებს, _ გვითხრა გვილავამ.
