_ მოგვეხმარეთ, გვიშველეთ, სახლს გვართმევენ, შეიცვალა ხელისუფლება და იქნება ახლა მაინც დადგეს სამართლის დრო. ქმარი მომიკლეს და ახლა მეშინია, იქნებ შვილიც მომიკლან, მაგათგან ყველაფერია მოსალოდნელი. ვითხოვთ დეპუტატთან შეხვედრას. აქციის დროს მზია ბოლქვაძე ცუდად გახდა და სასწრაფო სამედიცინო დახმარების მანქანა გამოიძახეს.
მზია ბოლქვაძის განცხადებით მეორე მხარე მათ სახლის დატოვების შემთხვევაში ალტერნატივას 700 კვადრატულ მიწის ნაკვეთსა და 1000 ლარს სთავაზობენ, რაზედაც ისინი თანახმა არ არიან.
სამოქალაქო დავის შესახებ, რომელიც ოზურგეთის მუნიციპალიტეტის სოფელ ლიხაურში მცხოვრებ, 80 წლის ჟენრო ლაცაბიძესა და შპს “ლიხაურის” საყვავილე მეურნეობის წარმომადგენლებს შორის მიმდინარეობს, “გურია ნიუსი” რამდენჯერმე წერდა. ლაცაბიძის ოჯახი მიიჩნევს, რომ უსამართლოდ ართმევენ მიწის ნაკვეთს და სახლს, რომელშიც ოჯახი ათეულობით წელია ცხოვრობს; მეურნეობის მფლობელები კი საცხოვრებელს მხოლოდ საგუშაგო ჯიხურად მიიჩნევენ და ლაცაბიძეებს მის დაცლას აიძულებენ.ამის შემდეგ, თვეები გავიდა და ჟენრო ლაცაბიძის შვილი _ ზური ღონღაძე 4 სექტემბერს გარდაიცვალა, ოჯახი კი გამოსახლების მოლოდინშია. ამასობაში, უზენაესმა სასამართლომ, რომლის გადაწყვეტილება საბოლოოა და გასაჩივრებას არ ექვემდებარება, სააპელაციო სასამართლოს გადაწყვეტილება ძალაში დატოვა.
“გურია ნიუსი” ზვიად კვაჭანტირაძეს დაუკავშირდა: “აუცილებლად შევხვდები ქალბატონ მზია ბოლქვაძეს და ყურადღებით მოვუსმენ. ამის შემდეგ გავარკვევთ, რის გაკეთება იქნება შესაძლებელი, რომ ეს ოჯახი იყოს მშვიდად და კმაყოფილი.
ერთი რამ მინდა გითხრათ, რომ დღევანდელი ხელისუფლების პრიორიტეტია სამართლიანი გამოძიება,” _ გვითხრა კვაჭანტირაძემ.
ჟენრო ლაცაბიძის რძალი, მზია ბოლქვაძე ამბობს, რომ ოჯახს ხელისუფლებასთან დაახლოებული პირები უსამართლოს ავიწროვებენ:
_ ამდენი სასამართლო წაგვაგებინეს იმის გამო, რომ ვართ უპატრონოები, ღარიბები, ისინი კი გავლენიანი ბიზნესმენები არიან, ხელისუფლებასთან დაახლოებულნი და სამართლიანობა როგორ გაიმარჯვებდა?! არ გავჩერდი, მივმართე პრეზიდენტის ადმინისტრაციას; როგორც იქნა, მივაღწიე იმას, რომ პრეზიდენტის ადმინისტრაციიდან პასუხი მოგვივიდა, რომ პროკურორს გადაეხედა ჩვენი საქმისთვის, მაგრამ ამაოდ _ ყველა გზა მათ სასიკეთოდ მიდის. ჩემი მეუღლე კი ამ საქმეს გადაჰყვა, წამდაუწუმ სამართალდამცავებთან სიარულში, სადაც ჰპირდებოდნენ, რომ რეაგირება მოჰყვებოდა აუცილებლად და დაიწყებოდა საქმის ხელახალი ძიება, მაგრამ _ არაფერი. მეუღლე ნერვიულობით გარდამეცვალა. ამ სახლიდანაც მალე გამოგვასახლებენ და ქუჩაში, უსახლკაროდ აღმოვჩნდებით; გვითხარით, ეს სამართალია?!
როგორც მზია ბოლქვაძე ამბობს, ოჯახმა პრეზიდენტის ადმინისტრაციას მიმართა; პრეზიდენტის ადმინისტრაციიდან პროკურატურას წერილი გაეგზავნა, რომელშიც პროკურატურას მიუთითებდნენ, რომ მოდავე მხარის მიერ ყალბი დოკუმენტების შესაძლო გამოყენების ფაქტისთვის მიექცია ყურადღება _ 2012 წლის 26 ივლისს, შინაგან საქმეთა სამინისტროს რეგიონულ ტერიტორიულ ორგანოებში საპროკურორო საქმიანობაზე ზედამხედველობის სამმართველოს უფროსი ნათია მეზვრიშვილი ოზურგეთის რაიონულ პროკურორს, კახა კოჩივარს წერს: “გეგზავნებათ საქართველოს პრეზიდენტის ადმინისტრაციიდან მთავარ პროკურატურაში, 2012 წლის 3 ივლისს შემოსული ჟენრო ლაცაბიძისა და მზია ბოლქვაძის განცხადება, ავთანდილ ღლონტისა და ვასილ ტუღუშის მიერ, ყალბი დოკუმენტების გამოყენების შესახებ”.
როგორც ოჯახის ადვოკატი, გოჩა ძიმისტარიშვილი ამბობს, კანონიერ ძალაში შესული გადაწყვეტილებების გადასინჯვა შესაძლებელია, თუკი დადგინდება, რომ ის მტკიცებულებები, რომლებიც საფუძვლად ედო სასამართლო გადაწყვეტილებას, არის ყალბი: _ სწორედ ამიტომ, ჩემი მარწმუნებლების მიერ შეტანილი იქნა განცხადება პოლიციაში თხოვნით, დაწყებულიყო წინასწარი გამოძიება საბუთის სიყალბის დადგენის მიზნით; თუმცა, მიმდინარე წლის 10 სექტემბერს, პოლიციის გამომძიებელმა აბესალომ მგელაძემ, მზია ბოლქვაძეს ოფიციალურად მიწერა, რომ არ დაიწყება წინასწარი გამოძიება, რადგანაც არ არსებობს დანაშაულის ნიშნებიო, _ ამბობს ადვოკატი.
ლაცაბიძის ოჯახმა შეიტანა საჩივარი საქართველოს მთავარ პროკურატურაში ავთანდილ ღლონტისა და ვასილ ტუღუშის მიერ სასამართლოზე წარმოდგენილი ყალბი დოკუმენტების გამოყენებისთვის, თუმცა დღემდე როგორც თვითონ აცხადებენ საქმეზე რეაგირება კვლავ არ არის.
შპს “საყვავილე მეურნეობის” ერთ-ერთმა მეპატრონემ ავთანდილ ღლონტმა „გურია ნიუსთან“ ასეთი კომენტარი გააკეთა:
_ მე არავის არ ვაგდებ, ეს არის სამოქალაქო დავა; სასამართლომ დაადგინა, რომ ეს სახლი და მიწა ეკუთვნის შპს “ლიხაურის საყვავილე მურნეობას“. მერე მაგათ იჩივლეს, რომ ეს მიწა საყვავილე მეურნეობას კი არ ეკუთვნის, არამედ ჩვენიაო. სასამართლომ ეს განიხილა და დაამტკიცა, რომ ეს მიწა ეკუთვნის საყვავილე მეურნეობას. ვაპირებთ, რომ კიდევ ერთხელ, ადვოკატის საშუალებით, შევთავაზოთ ნებაყოფლობით დაცალონ აქაურობა. ის, რაც არის ჩვენი, დატოვონ და ჩვენ მივცემთ მიწის შესაბამისი ფართის თანხას. იქ მე მეურნეობა მაქვს, ხელი მეშლება, სათბური მინდა გავაკეთო და მეტად განვავითარო. ეს არის და მეტი არაფერი, _ აცხადებდა „გურია ნიუსთან“ ავთანდილ ღლონტი.
აღნიშნულ საქმეზე ოზურგეთის პროკურატურამ საქმის მოკვლევა დაიწყო, რის შემდეგაც საქმეში არ გამოიკვეთა დანაშაულის კვალი”: _ აღნიშნულ ოჯახს არ გააჩნია საკუთრების დამადასტურებელი დოკუმენტი; აქედან გამომდინარე, უზენაესმა სასამართლომ მისი მოთხოვნა არ დააკმაყოფილა. გამოსავალი არის ერთი, მხარეები უნდა მორიგდნენ. როგორც ჩვენთვის არის ცნობილი, ჟენრო ლაცაბიძეს მიწის მესაკუთრე სხვა ალტერნატივას სთავაზობს, _ ამბობდა პროკურატურის წარმომადგენელი „გურია ნიუსთან“.
ოზურგეთის მაჟორიტარი დეპუტატი ოზურგეთში არ იმყოფებოდა. როგორც ადვოკატმა განაცხადა, საქმის მასალებს აუცილებლად ქუთაისში გადასცემს ზვიად კვაჭანტირაძეს, რომელიც საქმის ხელახლა გამოძიებას კომპეტენტურ ორგანოებს კიდევ ერთხელ სთხოვს.
