_ სასურსათო ვაუჩერები ვიღაცეებმა კუპონიზაციას შეადარეს. ქართულ ვალუტას დღეს მყარი კურსი აქვს, განსხვავებით იმისგან, რაც 90-იან წლებში იყო _ ეს არის მყარი ვალუტა. ჩვენ ამ ვაუჩერს მოსახლეობას ვაძლევთ იმისთვის, რომ ცოტათი მაინც მოხდეს ანაზღაურება იმ შოკის, რომელიც მოიტანა სურსათის გაძვირებამ, _ განაცხადა სააკაშვილმა.
პრეზიდენტის ამ გამოსვლის შემდეგ, მუნიციპალიტეტის გამგებლებმა სოფლის რწმუნებულები დაიბარეს და დავალებები მისცეს _ ვაუჩერის მიმღებთა სიები სასწრაფოდ შეადგინეთო. თუმცა, მანამდე გარკვევით განუმარტეს, რომ ვაუჩერს მხოლოდ ისინი მიიღებდნენ, რომლებიც არჩევნების დროს ნაციონალებს უჭერდნენ მხარს: _ გთხოვთ, არ გამთქვათ. ასეთი იყო ბრძანება! _ გვითხრა ჩოხატაურის ერთ-ერთი სოფლის რწმუნებულმა.
ჩვენი წყაროს ინფორმაციით, ხელისუფლება ვადამდელი საპარლამენტო არჩევნებისთვის ემზადება და სწორედ ამიტომ რიგდება ვაუჩერები, გაადვილებულია სოციალურად შეჭირვებული ოჯახებისთვის ქულების მინიჭება, მინისტრები დადიან რეგიონებში და ნაციონალების საქმიანობის პიარს ეწევიან.
მართალია, ამ ინფორმაციას ოფიციოზი უარყოფს, მაგრამ ოპოზიციის მტკიცებით, ვაუჩერების დარიგება ხელისუფლების წინასაარჩევნო კამპანიის ნაწილია. თუ გავითვალისწინებთ იმას, რომ ვაუჩერები საარჩევნო სიების მიხედვით რიგდება, ოპოზიციის ეს ვარაუდი ლოგიკას მოკლებული არ უნდა იყოს. მით უმეტეს იმ დროს, როცა მუნიციპალიტეტების ხელმძღვანელობაც გააქტიურებულია და თითქმის ყოველდღე, გუბერნიის წარმომადგენლის თანხლებით სოფლიდან სოფელში დადის. უნდა ითქვას იცის, რომ როგორც წესი, ხალხი შეხვედრებზე მცირე რაოდენობით მოდის _ სოფლის რწმუნებულებს თუ დავუჯერებთ, მოუცლელობის გამო, სოფლის მაცხოვრებლების თქმით კი, ხელისუფლებას ინფორმაციის არქონის გამო ვერ ხვდება.
სოფლებში გასვლის შემთხვევებში ხელისუფლებას იმ ადამიანებს ახვედრებენ, რომლებმაც პრობლემები ძალიან ცოტა აქვთ(?!) და ისიც ზოგადი, თუმცა, ამ “უპრობლემოებს” შორისაც არიან ისეთები, რომლებიც ჩუმად გვეუბნებიან თავიანთი სატკივრის შესახებ, გვიყვებიან იმასაც, რომ ზედმეტის თქმა აკრძალული აქვთ. თუმცა, ამ აკრძალვაში ვერ მოხვდა ვაუჩერების დარიგების პროცესი:
_ ვაუჩერები კი დაგვირიგეს მაგრამ განაღდება ხომ უნდა? სოფლიდან რაიონში რომ ჩამოვიდე და მერე უკან დავბრუნდე, მგზავრობაში 6 ლარი უნდა გადავიხადო. თან, ბანკში რიგებია და ეს რა დახმარება გამოვიდა? არ შეიძლებოდა ეს ფული პენსიის დამტარებლისთვის გამოეტანებინათ? _ გვითხრეს ზემოხეთში სტუმრობისას.
_ ადამიანს, როცა 30-ლარიან დახმარების მიღების დროს თვალზე ცრემლი ადგება, ეს იმას ნიშნავს, რომ მოსახლეობა სიღატაკეში ცხოვრობს. მინისტრებს უნდა რცხვენოდეთ, როცა 30-ლარიან ვაუჩერს სოციალურად შეჭირვებულ და თვალზე ცრემლმომდგარ ადამიანს ტელეკამერების წინაშე აძლევენ, მის ადგილზე მისატანად კი მანქანაში 100 ლარის ბენზინს ასხამენ, _ თქვა პარლამენტის ოპოზიციონერმა დეპუტატმა ლევან ვეფხვაძემ.
სასურსათო ვაუჩერის დარიგება 10 მარტიდან დაიწყო. 8 მარტს გამართულ სპეციალურ ბრიფინგზე სოფლის მეურნეობის მინისტრმა ბაკურ კვეზერელმა აღნიშნა, რომ ვაუჩერების განაღდება “ლიბერთი ბანკის” ფილიალებში იქნებოდა შესაძლებელი: _ რაც შეეხება რეგიონებს, სოფლებში სპეციალური მოძრავი სერვისცენტრი ჩავა, რომელიც 11 მარტიდან ამოქმედდება, _ დააზუსტა კვეზერელმა.
თუმცა, არც მოძრავი და არც უძრავი სერვისცენტრი გურიაში ჯერ არ გამოჩენილა, რამაც მოსახლეობას სერიოზული პრობლემები შეუქმნა. ჩოხატაურელები სიტუაციის მოგვარებას ბანკის მმართველისგან ითხოვენ, თუმცა, უშედეგოდ. როგორც გავარკვიეთ, ყოველ დილით ადამიანები რიგში ეწერებიან _ 21 მარტს ამ სიაში 185 კაცი იყო. ამათ ისინიც დაემატათ, რომლებსაც ბანკში სხვადასხვა სახის მომსახურების გაწევა სურდათ. განსაკუთრებული პრობლემები ორგანიზაციის ბუღალტრებს შეექმნათ, რომლებიც საშემოსავლო გადასახადის გადახდას უკვე მერამდენე დღეა, ვერ ახერხებენ.
22 მარტი გადასახადის გადახდის ბოლო დღე იყო გაზის აბონენტებისთვის: _ “ჩოხატაურგაზში” დავრეკე და ვუთხარი, რომ თანხას გრძელი რიგის გამო ვერ ვიხდიდი. თქვენს გამო სხვა ბანკს ვერ გავხსნი და რაც გინდათ, ის ქენითო, _ მიპასუხა ხელმძღვანელმა, _ გვითხრა რიგში მდგომმა ერთ-ერთმა აბონენტმა.
_ სამწუხაროდ მე არაფრის გაკეთება არ შემიძლია. ამ პრობლემის შესახებ საქმის კურსში ჩავაყენე საკრებულოს თავმჯდომარე. როდის იყო, ვინმეს გაზი გამოვურთე, მაგრამ ახლა გადაუხდელთა სია ოზურგეთიდან მოდის და ჩვენ ვალდებულები ვართ, დაუყოვნებლივ გავთიშოთ. ხელზე ფულის აღება არ შეიძლება და ჩვენ, გარდა გათიშვისა, სხვა გამოსავალი არ გვაქვს, _ აღნიშნა ჩვენთან საუბრისას “ჩოხატაურგაზის” ხელმძღვანელმა ელიოტ ხაბეიშვილმა.
ჩოხატაურის მუნიციპალიტეტის საკრებულოს თავმჯდომარე ანტონ ხუნდაძე ამბობს რომ სიტუაციის მოგვარება ბანკის ხელმძღვანელობას სთხოვა:
_ ეს კერძო სტრუქტურაა და ჩარევის უფლება არ გვაქვს. ვიცი, რომ სერიოზული პრობლემები შეიქმნა. ბანკის მმართველს დავურეკე და სიტუაციის მოგვარება ვთხოვე _ ან თანამშრომელი დაამატონ, ან ვაუჩერის განაღდებისთვის საათები დააწესონ. ამ პრობლემის შესახებ საქმის კურსში ჩავაყენე ადგილობრივი ფილიალის ზემდგომებიც. სიტუაციის მოგვარებას დამპირდნენ და ვნახოთ, რა იქნება, _ გვითხრა ხუნდაძემ.
22 მარტს ჩოხატაურში, ბანკთან გრძელი რიგი ტროტუარიდან იწყებოდა და იქ მყოფი ხალხი გულისწყრომას არ მალავდა:
_ 30 ლარის მათხოვრად გვაქციეს. გამოვა მერე ვიღაც და იტყვის, დაგეხმარეთო. გული რომ რამდენიმეჯერ წაგივა, შიმშილისგან რომ ვეღარაფერს დაინახავ და 10 ლარის წამლები რომ გექნება საყიდელი, ამას ჰქვია დახმარება?! მართლა რომ არ მიჭირდეს, ამხელა რიგში არ დავდგებოდი! _ ცხარობდა ხანში შესული ქალბატონი.
_ ამათ რა ადარდებთ _ სხედან კაბინეტებში. პენსიების დამტარებლებისთვის გაეტანებინათ ეს ფული, ან სოფლის რწმუნებულებისთვის ჩაებარებინათ! ხალხის ასე გაწამება გაგონილა?! _ მხარი აუბა ქალბატონს გვერდით მდგომმა მამაკაცმა.
“ლიბერთი ბანკის” ჩოხატაურის ფილიალის მმართველი, ზაზა სვანიძე ჩვენს ზარებს არ პასუხობს. მისი ნახვა კი, რიგების გამო, შეუძლებელი აღმოჩნდა.
ჩვენ ერთგვარი ექსპერიმენტი ჩავატარეთ და მაღაზიაში იმის გასარკვევად წავედით, თუ რის ყიდვას შევძლებდით 30 ლარით. პროდუქტების მოკრძალებული ჩამონათვალი ასე გამოიყურება: 1 ბოთლი ზეთი, 1 კილოგრამი შაქარი, 3 კილოგრამი კარტოფილი, ერთი თავი კომპოსტო, 1 კილოგრამი ხახვი, 1 ქილა ტომატი, 1 შეკვრა მარილი, 1 კილოგრამი ბრინჯი, 1 შეკვრა მაკარონი და 200 გრამი კარაქი _ ამ ჩამონათვალის ღირებულებამ 22 ლარი და 40 თეთრი შეადგინა. ამას თუ დავუმატებთ სოფლიდან ჩამოსული ადამიანის მგზავრობის ხარჯს და ორი პურის ღირებულებას _ 1 ლარს და 40 თეთრსაც, 30 ლარიც დახარჯულია.
ამ რაოდენობის პროდუქტებით რომ ერთ კვირასაც ვერ გაიტანს თავს 5-სულიანი ოჯახი, ცხადია. როგორც ჩანს, ხელისუფლებას საარჩევნო ხმები ძალიან იაფად უღირს _ ალბათ, იმიტომ, რომ ცხოვრება უფრო და უფრო მძიმდება, ხოლო ხმების გამყიდველი, ღირსებაშელახული მოსახლეობის დიდი ნაწილი, შესაბამისად, მთავრობისგან გადმოგდებულ, უფრო და უფრო შემცირებულ ლუკმაზეც თანახმაა!
