_ კინოთეატრ “ოზურგეთის” მიმდებარე ტერიტორიაზე, 21 მარტს, რეგიონული მედიის, ოპოზიციური პარტიების თითქმის ყველა წარმომადგენელი, საზოგადოების რამდენიმე აქტიური წევრი და არასამთავრობო ორგანიზაციის მხოლოდ ერთ-ერთი ლიდერი, “საქართველოს დემოკრატიული განვითარების კავშირის” აღმასრულებელი დირექტორი ლევან ხინთიბიძე, გაზეთ “ალიონის” მხარდასაჭერად შეიკრიბა.
“ალიონის” რედაქტორის ნუგზარ ასათიანის თქმით, გაზეთი გურიის ხელისუფლებისგან ზეწოლას განიცდის და საჯარო ინფორმაციის დროული მოძიების ნებისმიერი მცდელობა მარცხით მთავრდება:
_ საჯარო ინფორმაციის მიღებისას ათასნაირ ბარიერს გვიქმნიან. ერთ მაგალითს მოვიყვან: 2010 წლის 28 ოქტომბერს, ოზურგეთის მუნიციპალიტეტის გამგეობიდან მოვითხოვეთ ინფორმაცია სოციალური დახმარებების გაცემასთან დაკავშირებით. პასუხი 2011 წლის 12 იანვარს მივიღეთ; გარდა ამისა, გვიბლოკავენ ინფორმაციებს მნიშვნელოვანი ღონისძიებების შესახებ. ისეთი ფსიქოლოგიური წნეხი ხორციელდება, რომ რედაქციის მუშაობა პარალიზებულია. მარტში პრესსამსახურებიდან მხოლოდ იმ ღონისძიებების შესახებ შეგვატყობინეს, რომლებიც საპიაროდ იყო გათვლილი. სოფლის მეურნეობის მინისტრის სტუმრობისას, რომელზედაც, რეგიონის მუნიციპალიტეტებიდან, 100-ზე მეტი საჯარო მოხელე და ფერმერი იყო მობილიზებული “ალიონს” ინფორმაცია არ მიაწოდეს.
2010 წელს რეგიონული მედიის განვითარების ფონდში გაზეთმა შეიტანა პროექტი, რომელიც მიზნად ისახავდა “ალიონის” საგაზეთო ჯიხურის განთავსებას ქალაქ ოზურგეთში, გმირთა მოედნის მიმდებარე ტერიტორიაზე. აღნიშნული პროექტის განხორციელებით იქმნებოდა 2 სამუშაო ადგილი. ხელისუფლებამ პროექტი ჩაგვიდო. იგი ცდილობს რედაქციების დაპირისპირებას, ხელს გვიშლიან დისტრიბუციაში, იყო ჟურნალისტების გადაბირების შემთხვევები.
ნადგურდება გაზეთ “ალიონის” მნიშვნელოვანი არქივი, რომელშიც გასული საუკუნის 37-იანი წლების რეპრესიების მასალებიცაა.
არაერთ ორგანიზაციას აუკრძალეს ინფორმაციის გაცემა მათთვის არასასურველი გაზეთებისთვის, _ თქვა ნუგზარ ასათიანმა.
შოთა გოგიბერიძე, “ეროვნული ფორუმის” ერთ-ერთი ლიდერი: _ ბევრ ადამიანს ველოდი აქციაზე. საზოგადოება იმდენად არის დაშინებული, რომ თავისუფალი მედიის მხარდასაჭერად ვერ გამოდიან. ამ შეხვედრაზე ბატონმა ნუგზარ ასათიანმა 1937 წელთან გაავლო პარალელი. მეც მინდა, გავაგრძელო ეს თემა _ იმ წლების საქართველოს სისხლის სამართლის სტატისტიკა რომ აიღო და შეადარო დღევანდელ სტატისტიკას, გაოცდებით. 2010 წლის მონაცემებით 50 000 პატიმარია საქართველოში. ამით საზოგადოებას აშინებენ. 1937 წელს, 18 000 საქმიდან, რომელიც განიხილა მაშინდელმა სასამართლომ, 16%-ზე გამამართლებელი განაჩენი გამოიტანა, 2010 წელს, 12 000 სისხლის სამართლის საქმიდან “დამოუკიდებელმა” სასამართლომ მხოლოდ 7 საქმეზე! ეს საგანგაშო და შემზარავი სტატისტიკაა.
ოპოზიციონერი დეპუტატი ლელა ნაცვალაძე: _ მინდა, ქართული ჟურნალისტიკის დღე მივულოცო ყველა ღირსეულ ჟურნალისტს _ მათ, ვისთვისაც მნიშვნელოვანია ჟურნალისტის ეთიკის ნორმების დაცვა. მივულოცო მათ, ვისაც, მიუხედავად ხელისუფლების დიდი ზეწოლისა, არ დაუკარგავთ ღირსება, პრინციპულობა, მოსახლეობას აწვდიან ობიექტურ და რეალურ სურათს მიმდინარე მოვლენების შესახებ. სამწუხაროდ, ჩვენს სინამდვილეში ნაკლებად შემორჩნენ ასეთი ადამიანები, ამიტომაც მათ ათმაგად დაფასება და გვერდში დგომა სჭირდებათ. დღევანდელ აქციას ვუერთდები, როგორც მუნიციპალიტეტის საკრებულოს წევრი. მე არაერთგზის გამოვხმაურებივარ მასმედიაზე ზეწოლის ფაქტებს და ახლაც არ ვაპირებ გაჩუმებას, ოღონდაც უნდა შევისწავლო კონკრეტული ბრალდებები, რომელიც გაზეთ “ალიონის” რედაქციას აქვს ხელისუფლების მისამართით.
წასულია იმ ქვეყნის საქმე, სადაც მართალი სიტყვა არ ფასობს!
ნუგზარ ასათიანი: “ალიონი” ხელისუფლებისგან ზეწოლას განიცდის!” _ ვიდეო
