“ნისია კიტრობამდე და გადახდა _ კიტრობის შემდეგ”

მას ყველაზე სტრატეგიული ადგილი უჭირავს მუნიციპალიტეტში _ ის ზღვასთან, რკინიგზასთან და ფოთთან ახლოს მდებარეობს. სუფსის მოსახლეობის შემოსავლის ძირითადი წყარო მებოსტნეობა და მესაქონლეობაა. სუფსის რწმუნებულის ზვიად ლომაძის თქმით, სოფელ სუფსაში სულ 1700 კომლი ცხოვრობს, ძირითადი მცხოვრები კი 1445 ოჯახია. სუფსის მცხოვრებლებს საავადმყოფოს, წყლის, გარე განათების, პრობლემა აწუხებთ. მათი თქმით, აუცილებელია, რომ სუფსის საავტომობილო ტრასას ჰქონდეს ტროტუარები, რადგან ავარიების სიხშირე სწორედ ტროტუარების არქონითაა გამოწვეული.

_ ძალიან გვაწუხებს, რომ ასეთ მრავალრიცხოვან სოფელს არ აქვს საავადმყოფო. რაც იყო, ისიც გააუქმეს, დაშალეს, დაანგრიეს და მის წინ თანამედროვე სტანდარტების მქონე პოლიციის შენობა წამოჭიმეს. ისიც აუცილებელია, მაგრამ დანგრეული საავადმყოფო შეეკეთებინათ ჯერ. შორსაა აქედან ლანხუთის საავადმყოფო და ძალიან დიდი პრობლემები გვაქვს, _ ამბობს სუფსის მკვიდრი ნინო კუპრაძე. მისივე თქმით, ოჯახი სოფლის მეურნეობით და საკუთარი შრომით ირჩენს თავს.

მზია დარჩია “გურია ნიუსთან” საუბარში ამბობს, რომ მისი ოჯახის შემოსავლის წყარო ნერგების გამოყვანა და მებოსტნეობაა. გამოჰყავს ნერგები და ჰყავს ბევრი კამეჩი: _ მესაქონლეობა ჩვენთან კარგადაა განვითარებული, თუმცა, საქონლის ქურდობები ძალიან გვაშფოთებს. ჩვენი ფიზიკური შრომით ვირჩენთ თავს. ჯანმრთელობა რომ არ გვიწყობდეს ხელს, ალბათ, დავიხოცებოდით. ყველაფერი ძვირია. სიმინდის მოყვანის პრობლემა გვაქვს _ ჯერ საწვავის და მერე _ სასუქის. წლიდან წლამდე კიტრისა და ნერგების შემოსავლით გაგვაქვს თავი.

_ სოფლის პროგრამით სამი წელია წყალს აკეთებენ, მაგრამ ნორმალურად გაკეთებული არაა, წყლის მილები სულ ტალახშია ჩაყრილი. რამდენჯერ მივმართეთ ადგილობრივ ხელისუფლებას და ვითომც არაფერი, _ ამბობენ “გურია ნიუსთან” საუბარში ხიდმაღალას მცხოვრებლები.

_ ჩემსავით გაჭირვებული მეორე არ იქნება _ მე ინვალიდი ვარ, დედაჩემიც ინვალიდია. ფოთში ვცხოვრობდი და ფიზიკურად ვმუშაობდი. ახლა სუფსაში გადმოვედი საცხოვრებლად. ჩემი შვილი დახეული “ვალინკებით” დადის ფოთში, მუშად მუშაობს. ვწვალობთ, იატაკი არ მაქვს, არც მიწა, რომ რაიმე ვაწარმოოთ და თავი გავიტანოთ. ნახეთ რა მდგომარეობაში ვცხოვრობთ, თავი როგორ გაგვაქვს და თავად განსაჯეთ მეკუთვნის, თუ არა დახმარება, _ გვითხრა სუფსაში მცხოვრებმა შორენა ართანიამ.

ლანჩხუთის მუნიციპალიტეტის სოფელ სუფსის რწმუნებული ზვიად ლომაძე “გურია ნიუსთან” საუბარში ამბობს, რომ შორენა ართანიას ოჯახი ფოთში არის რეგისტრირებული: _ როგორც კი შემოვიდა მასზე ინფორმაცია, მაშინვე მივედი და გადავამოწმე. კი, ბატონო, იატაკი არ აქვს და არც მიწის ნაკვეთი, ინვალიდია თვითონაც და დედამისიც. მაგრამ მისი შვილი ხომ მუშაობს? რა მნიშვნელობა აქვს, მუშა იქნება თუ საჯარო მოხელე _ ხელფასს ხომ იღებს? ეს კი სარეიტინგო ქულებზე მოქმედებს. სოციალურ ფულად დახმარებას 185 ოჯახი იღებს, ხოლო პოლისით 150 ოჯახი სარგებლობს. ახლა რამდენიმე ოჯახს შეუჩერდა ფულადი დახმარება, მაგრამ მიმაჩნია, რომ მათ ნამდვილად ეკუთვნით და რეკომენდაციას აუცილებლად გავუწევ, რომ კვლავ დაენიშნოთ. მათ შორის, ართანიასაც, _ ამბობს ლომაძე.

_ ბატონო ზვიად, ხიდმაღალას მოსახლეობა უკმაყოფილოა სოფლის დახმარების პროგრამით გაწეული სამუშაოებით. ისინი ამბობენ, რომ ორი წელია, წყალგაყვანილობა კეთდება, თუმცა, სისტემა კვლავ მოუწესრიგებელია და მილები ტალახშია დაყრილი, წყალი გადმოდის და იტბორება ადგილები. ეს ჩვენმა ფოტოობიექტივმაც დააფიქსირა.

_ შარშანწინ, ბიუჯეტიდან სოფლის დახმარების პროგრამით, 39 000 ლარი იყო გამოყოფილი, რომელიც მთლიანად წყლის სისტემის მოწესრიგებას მოხმარდა _ გაკეთდა წყლის ტუმბოს მონტაჟი ხიდმაღალაზე და სოფელ ტაბანათში საწრეტი არხები გაიწმინდა. 2010 წელს გამოყვეს 78 000 ლარი _ პრიორიტეტი კვლავ წყლის გაყვანილობის მოწესრიგება იყო. ახალსოფელში გამოვიყვანეთ სასმელი წყალი, საწრეტი არხები მოვაწესრიგეთ, მილები შევცვალეთ. ასევე ტაბანათში მთლიანად გამოვცვალეთ წყლის მილები. ხიდმაღალას უბანში წყალი სამი წლის წინ გაკეთდა _ შევცვალეთ მილები, გაყვანილობა, სატუმბი ავზი, რეზერვუარი მთლიანად. ეს ჩვენი პრეროგატივა იყო, მილების მიწაში ჩამარხვა კი პროექტში არ შედიოდა, რადგან სათანადო თანხა პროექტში არ იდო და შესაბამისად, ვალდებულებაც არ გვქონდა გაგვეკეთებინა _ პასუხისმგებლობა მოსახლეობას ეკისრებოდა. გაანძრიონ ხელი და გააკეთონ! მოსახლეობამ მის წინ მდებარე ტერიტორია არ უნდა მოაწესრიგოს? შევთავაზეთ კიდეც გაკეთება, მაგრამ ბევრმა უარი იმის გამო განაცხადა, რომ ექსკავატორი სულ გადათხრის აქაურობას და გზა გაგვიფუჭდებაო. მერე ერთ მხარეს ავარია მოხდა და მილები გაფუჭდა. მივეცით სათადარიგო მილები და არ გადააბეს. მითხარით, ჩვენი ბრალია რამე? თავად მოსახლეობა არ უნდა იყოს დაინტერესებული? ახლა ჭაბურღილიც გაჩერებულია, რადგან მიმდინარეობს ინდივიდუალური გამრიცხველიანება. წელს პროექტი ითვალისწინებს აღნიშნული უბანში სისტემის მოწესრიგებას და პირველ რიგში მაგას გავაკეთებთ.

_ რა პრობლემებია სოფელში?

_ იმის გამო, რომ ტრასას არ აქვს ტროტუარი, ხშირია ავარიები. ასევე არ არის გარე განათება, რომელიც აუცილებელია. სუფსა ხელსაყრელი და სტრატეგიული ადგილია და ვფიქრობ, რომ ყოველ მხრივ უნდა იყოს ვითარება მოწესრიგებული. საყანე ფართობები შეუღობავია, შედის საქონლები და აფუჭებენ ნათესებს. ეს სოფლის ძალიან დიდი, გადაუჭრელი პრობლემაა. მისი მოწესრიგება საკმაო თანხებთან არის დაკავშირებული.

_ რა ხდება სუფსაში საგაზაფხულო სამუშაოებთან დაკავშირებით?

_ სოფელში გვყავს სამი ტრაქტორი. თუმცა, ხალხს ძალიან უჭირს ეკონომიკურად და საწვავს ვერ ყიდულობს. ვერ ნახავ ოჯახს, სიმინდი რომ ჰქონდეს შემორჩენილი. მოთხოვნა ამერიკულ სიმინდზე დიდია _ დაახლოებით, 100 ჰექტარზე. მართალია, უჭირთ _ წლიდან წლამდე ნისიას იღებენ კიტრობამდე და კიტრის მოსავლის აღების შემდეგ იხდიან. ციტრუსი და თხილი ძალიან ცოტაა, მაგრამ მაინც მდიდარი სოფელია სუფსა. ახლოა ზღვასთან, რკინიგზასთან, ფოთთან, რაც მოქალაქეებზე ხელსაყრელად აისახება.

_ ახალი პოლიციის შენობისა და დანგრეული საავადმყოფოს ფონზე, მოსახლეობა ისევ საავადმყოფოს ითხოვს.

_ საავადმყოფო, რომელიც 50 საწოლზე იყო გათვლილი, აღარ ფუნქციონირებს, თუმცა, რაც მთავარია, სოფელს აქვს ამბულატორია, გვყავს ორი ექიმი და სამი მედდა, რატომ არიან უკმაყოფილონი? რაც შეეხება კრიმინოგენურ სიტუაციას, სტაბილურია _ მძიმე დანაშაული არ დაფიქსირებულა, არის წვრილმანი ქურდობები, რასაც ვერ აღმოფხვრი. ამასწინათ ერთ-ერთი ოჯახიდან მოიპარეს “ზინგერის” ფირმის საკერავი მანქანა. ალბათ, ქურდს იპოვიან. არის საქონლის ქურდობის უამრავი ფაქტი _ მოსახლეობა გამოუშვებს საქონელს, რომელიც შედის ნათესებში, სადაც სპობს ყველაფერს და მერე იკარგება. ვის უნდა დავაბრალოთ ან ვინ იპოვის დაკარგულ საქონელს?!