საინტერესოა, როგორ აფასებენ და რას ელიან ამ შეხვედრისგან საზოგადოების წარმომადგენლები, როგორია მათი პროგნოზი მოსალოდნელ შედეგებზე.
დავით გიორგობიანი, მსახიობი: “უფლის იმედი მაქვს და არც ერთი ადამიანის და არც არავის შეხვედრებისგან რაიმეს არ მოველი. სამკითხაო ჩემთვის არაფერია, ყველაფერი ისედაც ცნობილია, ესაა, რომ ღმერთის ნებას ცოტა თუ ვინმე ეძიებს და უფლის გარეშე კი ვერავინ გვიშველის.”
ირაკლი ჭიჭინაძე, იურისტი: _ჩემი აზრით შედეგი იქნება ის, რომ ხელისუფლება კიდევ ერთხელ დაანახებს საერთაშორისო საზოგადოებას, თუ რის სანაცვლოდ სურს სააკაშვილს სტაბილურობა ქვეყანაში. სხვა არანაირი შედეგი არ დადგება, კონსესუსი შეუძლებელია, ვინაიდან ივანიშვილი ვერ წავა კომპრომისზე.
– და თუ ეს შეხვედრა შედეგს ვერ გამოიღებს, როგორ ფიქრობთ, შეძლებს უმრავლესობა მარტში საკონსტიტუციო ცვლილებების გახორციელებას?
– კი, შეძლებს, აქამდეც შეძლებდა, უბრალოდ, სააკაშვილის გუნდმა საერთაშორისო დონეზე იმ ტიპის სვლები განახორციელა, რომ ხელისუფლება იძულებული გახდა, მათთან დიალოგის პროცესში ჩართვით მიეღო ის, რისი მიღებაც სურს. ხვალინდელი დღის შემდეგ თუ სააკაშვილი არ წავა კომპრომისზე, ხელისუფლებას ექნება მორალურ-პოლიტიკური უფლება, შესაბამისად არგუმენტთა მთელი წყება დასავლეთისთვის, მიმდინარე თვეში საკონსტიტუციო ცვლილებების გახორციელების კუთხით.
ამირან ბუთურიშვილი, ჟურნალისტი: “ძნელი სათქმელია. სააკაშვილი ერთს ამბობს, მეორეს ფიქრობს და მესამეს აკეთებს. შეიძლება ესეც აპრილამდე დროის გაყვანის ტაქტიკაა და მეტი არაფერი. თუ ბატონი ბიძინა მეტ სიმკაცრეს არ გამოიჩენს ამ გაუწონასწორებელი ადამიანის მიმართ, რომელსაც მითვისებული აქვს ხელისუფლება, საქართველოში არ იქნება სიმშვიდე. ვიცი ადამიანების განწყობა _ ეზიზღებათ ნაცმოძრაობა და მისი ლიდერები, მაგრამ ახალი ხელისუფლება ძალიან ზოზინით მიდის წინ, ხალხი კი იღუპება, ვალებში იხრჩობა, ბანკები სახლებიდან ჰყრიან პანტა-პუნტით. მეტი მიზანმიმართულებაა საჭირო ქმედებაში. არც პროკურატურა მოქმედებს გამართულად. ადრე, გახსოვს თუ არა, არ ვიცი, ქართველ მოჭიდავეს რომ რუსისათვის ეჯობნა, მთელი თავით მასზე მაღლა უნდა მდგარიყო. აქაც ასეა, იციან, რომ მიშას სასამართლოსთან აქვს საქმე და თითქმის მოუმზადებელი საქმეები გააქვთ. თუ ასე არ არის, მაშინ საბოტაჟია პროკურორების მხრიდან და ისინი სპეციალურად იქცევიან ასე, ატყუებენ გენპროკურორს, რომ საქმე გამოძიებულიაო და სინამდვილეში სასამართლოსთან არიან შეკრულები და ნახევარპროდუქტი მიაქვთ იქ, მოსამართლე კი იოლად ადგამს თავს ასეთ საქმეს. დღევანდელი შეხვედრიდან შედეგი ნალკებადაა მოსალოდნელი…”
ინგა ქარდავა, უცხო ენების სპეციალისტი: “დიდი იმედი არ მაქვს, რომ ყველა საკითხზე შეთანხმდებიან, მაგრამ ამ კრიტიკული სიტუაციიდან რაღაც გამოსავალი უნდა მოიძებნოს. მჯერა ბატონი ივანიშვილის _ ის ყველაფერს გააკეთებს, ქვეყანა ჩიხიდან რომ გამოიყვანოს. “ნაციონალური მოძრაობა” ყველაფერზეა წამსვლელი. არ გამოვრიცხავ, რომ ისინი რევანშის აპირებდნენ. დაანონსებული მიტინგისთვის ემზადებიან ყველა რეგიონში თუ რაიონში. მათ აინტერესებთ, რამდენ ადამიანს გამოიყვანენ, ამის მიხედვით იმოქმედებენ.”
ელა ალავერდაშვილი, დამოუკიდებელი ჟურნალისტი: “ვფიქრობ, იქნება არასრული დათმობა ორივე მხრიდან. როგორც გარეშე თვალით ჩანს, ვაჭრობა ისედაც მიდის და უფრო მიშას სასარგებლოდ. ესეც დასავლეთის ზეწოლით და კიდევ არამონოლითური უმრავლესობის გამო. პატარა შედეგი კი მოსახლეობისთვის უმნიშვნელო იქნება. აუცილებელი გახდება კიდევ ერთი შეხვედრა. ეს ჯერ ნიადაგის მოსინჯვაა, თან მოსახლეობის რეაქციას დააკვირდებიან. არის უკვე დიდი განხეთქილება ბოკერიასა და ვანოს შორის, სწორედ ამან დააჩქარა ეს შეხვედრა! ისე, კიდევ სხვა თემებზეცაა მოლაპარაკება. პირველი დუდაევის გაცვლაა, მეორე კონსტიტუციას ეხება, მესამე ხელშეუხებლობას პოლიტიკოსების ამნისტიის სახით, მეოთხე – პარტია უნდათ ფეხზე დადგეს, განახლებული “ნაციონალური მოძრაობა”. მტკიცებულება ისაა, რომ გუბერნატორებმა რეგიონებში ფულის ხარჯვა დაიწყეს, არასამთავრობოებს ქმნიან ნაციონალური ფრთის ქვეშ.
კიდევ ერთი მიზეზი ნაციონალური მოძრაობის განხეთქილებისა, ესაა თამარ ჩერგოლეიშვილის გუშინდელი სტატუსი: „რატომ საუბრობს მიშა მარტო მე გავაკეთე, როცა გუნდის დამსახურებაა ყველა წარმატება.
ჩემი ინფორმაციით, ჯერ კიდევ ადგილობრივ არჩევნებში არ ენდობოდა ბოკერია ვანოს! გაგვაფრთხილა, ვინც ალასანიას მხარდამჭერები ვიყავით, პოლიციის უნიათობის შესახებ მაცნობეთო. მოარული ხმებით, ამ დროს განხეთქილება პოლიციაშიც იყო უკვე. ბოკერია უფრო დემოკრატიის მომხრე იყო და უფრო გონებამახვილი… მაშინვე სწამდა არჩევნები და ახალი მთავრობა! ბოკერია ფრთხილობს და მოლაპარაკებების მამადაც მოიაზრება. რაც შეეხება პრეზიდენტისა და პრემიერის შეხვედრას, დიდ მოლოდინი არ უნდა გვქონდეს.”
ნიკო ბელიაშვილი, კონსულტანტი, ექსპერტი: “არაფერს არ ველი. ეს იქნება ხალხის კიდევ ერთხელ დაბოლების მექანიზმი, გარკვეული გარიგებები შედგება და გადაინაწილებენ ძალაუფლებას. რაც ხდება ქვეყანაში. ეს კარგად დაგეგმილი და შეთანხმებული თამაშია და სხვა არაფერი. დღევანდელი მოლაპარაკების შემდეგ მივიღებთ ჰიბრიდულ ხელისუფლებას, რომელიც ნაციონალურ ოცნებას წარმოადგენს გარკვეული ჯგუფებისთვის.”
შეგახსენებთ, რომ შეხვედრა გაიმართება მთავრობის კანცელარიის შენობაში და ჟურნალისტებისთვის დახურული იქნება.
