“თავისუფალი დემოკრატები” არ იქნება ნაციონალების გადასარჩენი ხავსი”

ამ ფაქტმა დიდი მითქმა-მოთქმა გამოიწვია აბაშის საზოგადოების ერთ ნაწილში.

“გურია ნიუსი” მურთაზ ქვილითაიას საკრებულოს ფრაქცია “ქართული ოცნების” კაბინეტში ესაუბრა.

– ბატონო მურთაზ, თქვენ ხართ საკრებულოში ფრაქცია “ქართული ოცნების” თავმჯდომარე, ახლა კი “თავისუფალი დემოკრატების” აბაშის პარტიის თავმჯდომარედ დაინიშნეთ. რამდენადაც მახსოვს, თქვენ ამბობდით, რომ უპარტიო იყავით. მაშინ როგორ მოხდა პარტიის თავმჯდომარედ თქვენი დანიშვნა?

– კი, არასოდეს არც ერთი პარტიის წევრი არ ვყოფილვარ. სულ ახლახანს გავწევრიანდი პარტია “თავისუფალ დემოკრატებში”.

– იქნებ, უფრო კონკრეტულად გვითხრათ, რამდენი ხანია ამ პარტიაში გაწევრიანდით და ვისი რეკომენდაციით?

– 10 დღის წინ ვიყავი თბილისში, პარტიის სათაო ოფისში და გავწევრიანდი. ისე, მინდა გითხრათ, რომ ჩვენმა ფრაქციამ უკვე მიმართა კომისიას და ფრაქციას შეეცვლება სახელი. იქნება ფრაქცია “ქართული ოცნება – დემოკრატები”.

– გამოდის, “თავისუფალი დემოკრატების” წევრი ათი დღეა ხართ. როგორ მოხდა, რომ პარტიის ახალ წევრს რაიონული ორგანიზაციის თავმჯდომარეობა ჩააბარეს? ვიღაცას ხომ უნდა გაეწია რეკომენდაცია, თქვენ სათაო ოფისისთვის უცნობი ადამიანი არ იყავით?

– გაწევრიანების შემდეგ ჩვენ, რაიონული პარტიის წევრებმა შევქმენით გამგეობა და სწორედ ამ გამგეობამ ამირჩია მე. მერე პარტიის თავმჯდომარემ, ირაკლი ქადაგიშვილმა დაგვიბარა და დაამტკიცა გამგეობაც და პარტიის თავმჯდომარეც.

– თქვენ ამბობთ, რომ გამგეობა ახალი წევრებისგან შეიქმნა. აბაშაში ხომ იყვნენ “თავისუფალი დემოკრატების” წევრები? ისინი სად არიან ახლა?

– ვერაფერს გეტყვით. ბევრი ამბობდა “თავისუფალი დემოკრატების” წევრი ვარო, მაგრამ არ აღმოჩნდა მართალი. ქადაგიშვილმა ახლა დააფუძნა ყვარელში და აბაშაში რაიონული ორგანიზაციები.

– გამგეობა რამდენი წევრისგან შედგება?

– გამგეობაში ხუთი წევრია – მე, თამაზ შოთაძე, გიორგი სიმონია, როლანდ კუჭუხიძე და კიდევ ერთი ქალბატონი.

– ვინ არის ეს ქალბატონი?

– სამწუხაროდ ახლა მის სახელს და გვარს ვერ ვიხსენებ.

– ცოტა უცნაურია, გამგეობის წევრია და პარტიის თავმჯდომარემ არ იცის მისი ვინაობა. როდიდან დაიწყება პარტიაში მსურველების გაწევრიანება?

– მსურველი მართლაც ბევრია. გაწევრიანება 4–5 დღეში დაიწყება. ჩვენ გვაქვს სპეციალური ანკეტები, რომელიც უნდა შეავსოს მსურველმა. ამ ეტაპზე ჩამოყალიბების პროცესში ვართ, მიდის მსჯელობა გამგეობის წევრებს შორის წევრობის მსურველებთან დაკავშირებით.

– ბატონო მურთაზ, ხალხი ამბობს აბაშაში “თავისუფალი დემოკრატები” ნაციონალების ყოფილი წევრებისგან კომპლექტდებაო, იმასაც ამბობენ უკვე ბევრი გადაბარგდა ერთი პარტიიდან მეორეშიო.

– საერთოდ არ შეესაბამება სიმართლეს. ჯერ ერთი რომ გაწევრიანება არ დაწყებულა და მეორეც, აბაშა პატარა რაიონია და არაფერი დაიმალება. ყველა ნახავს ვინ იქნება ჩვენი პარტიის წევრი. ჩვენი ფრაქცია გამგებლის არჩევა რომ იყო, იმ სხდომაზეც წინააღმდეგი წავიდა და დღესაც წინააღმდეგი ვართ. პროტესტის ნიშნად არც საკრებულოს სხდომებს ვესწრებოდით, მაგრამ ახლა პარტიიდან გვაქვს მითითება, რომ სხდომებს დავესწროთ და მედიასთანაც ვითანამშრომლოთ. ასე რომ, შემიძლია დავარწმუნო ყველა, “თავისუფალი დემოკრატები” არ იქნება ნაციონალების გადასარჩენი ხავსი.

– ფრაქცია რომ შექმენით, აღნიშნეთ, რომ ფრაქციის მიზანი იყო ყველა საკითხში ჩაეხედა, ბიუჯეტშიც, დანიშვნა-გათავისუფლების პროცესშიც, მაგრამ როგორც ფრაქციას ჯერ არაფერი გაგიკეთებიათ.

– დიახ, მაგრამ მსვლელობა სხვანაირად წავიდა, რაიონში არეული სიტუაცია იყო, საკრებულო მისი გზით წავიდა და ძველი კურსი გააგრძელა, ჩვენ სხვა გზით წავედით და ერთადერთი რაც შეგვეძლო ბოიკოტი გამოგვეცხადებინდა ამ საკრებულოსთვის. ახლა კი უფრო დიდი ძალა გვაქვს, რადგან ერთი ფრაქცია კი ვიყავით, მაგრამ სხვადასხვა პარტიიდან. ახლა კი ამ ფრაქციაში უკვე სამი წევრი ვართ “თავისუფალი დემოკრატებიდან” . მეოთხე წევრი, გოჩა პატარაია “მრეწველებიდანაა”, როგორც იცით ეს პარტიაც კოალიციის შემადგენლობაშია და ნამდვილად შევძლებთ ჩვენი სიტყვის თქმას.

– ბატონო მურთაზ, თქვენზე და პარტიის ყველა დანარჩენ წევრზე იგივეს ლაპარაკობენ, რასაც აქამდე პარტია “ქართული ოცნება – დემოკრატიული საქართველოს” წევრებზე. კოალიციის წინასაარჩევნო შტაბის წევრები ამბობენ, რომ არასდროს უნახიხართ არც შეხვედრებზე, არც კოალიციის მხარდასაჭერ აქციებზე.

– მე მთელი ოჯახით კოალიციის გვერდით ვიდექი. ტყვირში “ოცნების” კოორდინატორს, თემურ გვალიას მე ვიბარებდი და ვეუბნებოდი, უფრო გააქტიურებულიყო. ლაზიკაში წასაყვანად რომ აგროვებდნენ ნაციონალები ხალს, სწორედ მე მიუვარდი ცენტრში და ყველა ღონე ვიხმარე, რომ ტყვირიდან სპეციალურად ჩამოყვანილი მიკროავტობუსი ცარიელი წასულიყო. არჩევნების დღეს მე საკმაოდ დიდ წინააღმდეგობას ვუწევდი იქ მყოფ ახალაიების კლანის წარმომადგენლებს და მეუბნებოდნენ კიდეც, ხვალინდელი დღის გათენების არ გეშინიაო? ჩვენ გვაქვს იმ ადამიანებთან საუბარი, ვინც შტაბის წევრები იყვნენ, აქტიურობდნენ და ნამდვილად დაიჭერდნენ არჩევნები სხვა შედეგით რომ დასრულებულიყო, გვაქვს შეთავაზებები მათთანაც, “ჩანერგილებად” რომ მოინათლნენ და კიდევ ერთხელ ვაცხადებ, ჩვენი პარტიის კარი ღიაა ყველა იმ ადამიანისთვის, ვინც პარტიის პოლიტიკურ კურსს გაიზიარებს და რაც მთავარია, ვინც ერთგული იქნება, თორემ ძალიან კარგად ვიცით რა ხდებოდა წინასაარჩევნოდ.

– პარტიის ოფისის გახსნას და მუშაობის დაწყებას როდისთვის გეგმავთ?

– ეს დამოკიდებულია ცენტრალურ ოფისზე. მარტის ბოლოსთვის იგეგმება რეგიონალური კონფერენცია და მერე ყველაფერი გადაწყდება.

– მანამდე სად უნდა მოგმართონ პარტიაში გაწევრიანების მსურველებმა, ხომ თქვით 4–5 დღეში დავიწყებთო ახალი წევრების მიღებას.

– მანამდე აბაშელებს ნებისმიერ საკითხზე შეუძლიათ მობრძანდნენ საკრებულოს შენობაში, ჩვენი ფრაქციის ოთახში.

საუბრის დასრულების შემდეგ ჩვენ დავუკავშირდით ტყვირის ყოფილ კოორდინატორს, თამაზ გვალიას, მაგრამ ტელეფონი გამორთული ჰქონდა.

“გურია ნიუსი” აუცილებლად მიაწვდის მკითხველს მის აზრსაც და პარტიის ყოფილი წევრების შეხედულებებსაც.