ადმინისტრაციულ შენობას დღესაც “ქართული ოცნების” დროშა ამშვენებს

შედარებით მაღლა საქართველოს სახელმწიფო დროშაა, მთავარი შესასავლელ კარზე კი “ქართული ოცნებისა” და ჟორდანიასდროინდელი ქართული დროშა ფრიალებს. როგორც საქართველოს ორგანული კანონის _ “საქართველოს სახელმწიფო დროშის შესახებ” პირველი მუხლი გვამცნობს, “აკრძალულია სახელმწიფო დროშად სხვა დროშის გამოყენება. ასევე საქართველოს სახელმწიფო დროშა მუდმივად აღიმართება საქართველოს ადგილობრივი თვითმმართველობის ორგანოთა შენობებზე. აგრეთვე იმ შენობებზე, სადაც ტარდება ამ ორგანოთა სხდომები, სხდომის მთელ პერიოდში.”
ვის ევალება კანონის დაცვა? “საქართველოს სახელმწიფო დროშის დაცვას უზრუნველყოფენ შესაბამისი სახელმწიფო და ადგილობრივი თვითმმართველობის ორგანოები, ხოლო კანონის დარღვევის შემთხვევაში, საქართველოს სახელმწიფო დროშის გამოყენების დადგენილი წესის დარღვევა იწვევს პასუხისმგებლობას საქართველოს კანონმდებლობის შესაბამისად.”
მიუხედავად იმისა, რომ ადმინისტრაციული შენობის კარზე დროშები მიამაგრეს ეგრეთ წოდებულმა “კარვის ხალხმა”, რომლებიც ლანჩხუთში საპროტესტო აქციებს მართავდნენ, ამ პრობლემის მოგვარებაზე პასუხისმგებლობა თვითმმართველობის ხელმძღვანელობას, განსაკუთრებით, კი საკრებულოს ევალება.
ეს რაც შეეხება ორგანულ კანონს. თუმცა, კანონში კონკრეტულად სხვა პარტიული დროშის ადმინისტრაციული შენობაზე აღმართვის აკრძალვა ვერ აღმოვაჩინეთ, რაც დაგვიდასტურა ახალგაზრდა იურისტთა ასოციაციის იურისტმა თამაზ ტრაპაიძემ, თუმცა, მან ისიც აღნიშნა რომ საქართველოს დროშის გარდა, სხვა დროშის აღმართვა ადმინისტრაციული ორგანოს შენობაზე არ შეიძლება, რადგან “საზოგადოებამ უნდა იცოდეს, რომ ის მიდის ადგილობრივი მმართველობის შენობაში და არა რომელიმე პარტიის პოლიტიკურ ოფისში. თუმცა, კანონი კონკრეტულად ამის აკრძალვის შესახებ არ არსებობს.”
ამ თემაზე კომენტარი ლანჩხუთის საკრებულოს თავმჯდომარემ ამირან გიგინეიშვილმა გააკეთა: “ეს ნამდვილად კანონდარღვევაა. აღსანიშნავია, რომ ყველა საპროტესტო აქცია ადმინისტრაციული შენობიდან 20 მეტრის დაშორებით უნდა იყოს, ამ შემთხვევაში 20 მეტრით კი არა, ზედ შენობაზეა მირჭობილი კონკრეტული პოლიტიკური ორგანიზაციის დროშა. ბევრჯერ ვთხოვე იმ ხალხს (იგულისხმება ე. წ. “კარვის ხალხი”. რედ.), ჩამოეხსნათ, მაგრამ უშედეგოდ. უკიდურეს ზომამდე არ მინდა მივიდე _ საკმარისია, ერთი წერილი ძალოვან უწყებებთან და მაშინვე ჩამოხსნიან, თუმცა, ეს ძალიან ეხება ჩემს გულს. მათ ჩვენ მიმართ არანაირი პრეტენზია არ აქვთ, მაგრამ ხომ შეიძლება, ვის მიმართაც აქვთ, სააკაშვილია თუ სხვა ვინმე, ოცი მეტრის მოშორებით გამოხატონ ეს პროტესტი? ერთ კვირაში მარხვა დაიწყება და ამის შემდეგ კატეგორიულად მოვითხოვ, ჩამოხსნან დროშა.”