“ქართული ოცნების” წინასაარჩევნო შტაბის წევრებმა კი გვითხრეს, ადგილობრივი მთავრობა რომ ამბობს, სიმონია “ოცნებიდანაა”, ოდესმე თვალით მაინც გვენახა. სადაური “ოცნების” წარმომადგენელი იყო, ერთხელაც არსად გამოჩენილაო. ისე, ჟურნალისტებმა სურათი მაინც დადეთ სადმე, რომ შეგვხვდეს, ვიცნოთო.
გავითვალისწინეთ რა ხალხის მოთხოვნა, გამგებლის მოადგილეს კაბინეტში ვესტუმრეთ.
– დიდი დაინტერესებაა თქვენი პიროვნების მიმართ. ხალხი ამბობს, საჯარო სამსახურში მუშაობის გამოცდილება არ აქვსო.
– საშუალო სკოლის დამთავრების შემდეგ ჩავაბარე ტექნიკურ უნივერსიტეტში, შემდეგ იყო ასპირანტურა, ამავე დროს პროფკავშირულ ორგანიზაციაში ამირჩია უმაღლესმა სასწავლებელმა. შემდეგ პედაგოგის რანგში იმავე უმაღლეს სასწავლებელში ვმუშაობდი და პარალელურად _ არასამთავრობო ორგანიზაციებში. ეს ყველაფერი დადასტურებული იქნება დოკუმენტურად. ასე რომ, არ დამიწყია ნულიდან, არ მოვსულვარ პირდაპირ ქუჩიდან და შეგიძლიათ კეთილისმსურველებს ყველა ეჭვი გაუფანტოთ. საკმაოდ აქტიურად ვიყავი ჩაბმული ეროვნულ მოძრაობაში, მაგრამ პარტიის წევრი არ ვყოფილვარ. მაშინ ენთუზიაზმი დიდი იყო, რადგან საბჭოთა სისტემის ნგრევა ხდებოდა. თავისუფლების ნიავმა დაბერა _ მონობაში გატარებული ამდენი წლის მერე ეს იყო ის ტალღა, რომელმაც ამოხეთქა. ჩვენ ამ მოძრაობის საკმაოდ აქტიური და ძლიერი ახალგაზრდული ფრთა ვიყავით. საზოგადოება შეიძლება უფრო კარგად იცნობს უნივერსიტეტის პრეს-კლუბს, რადგან მათ მეტი პიარი ჰქონდათ, მაგრამ ძალა, რომელიც ტექნიკურ უნივერსიტეტში იყო, არანაკლებ საქმეს ასრულებდა ეროვნული მოძრაობის წიაღში.
– თქვენ რომ გამგებლის მოადგილედ დაინიშნეთ, ყველა ამბობდა, “ოცნების” კადრიაო, რამაც წინასაარჩევნო შტაბის წევრების პროტესტი გამოიწვია. მათ გვითხრეს, რომ თქვენ არასდროს უნახიხართ შტაბში, მე ვიცი, რომ “კარდაკარის” პროგრამაში იყავით, მაგრამ მერე მართლაც აღარ ჩანდით. რატომ დატოვეთ პროგრამა და სად იყავით არჩევნების დროს?
– მე ვიყავი “ქართული ოცნების” შტაბში, “კარდაკარის” პროგრამის დროს, წარმოიდგინეთ, ფლაერებსაც კი ვარიგებდი სოფელ-სოფელ შტაბის ხელმძღვანელთან, ვაჟა ლიპარტიასთან ერთად. არაფერს ვთაკილობდი. მაგრამ შტაბის უფროსმა ვერ უზრუნველყო შეთანხმება, ამიტომ მე დავემშვიდობე მას და წამოვედი.
– რა შეთანხმებაზე ლაპარაკობთ?
– ვაჟა ლიპარტიამ “კარდაკარის” წევრებს ჩემი თავი გააცნო, როგორც შტაბის უფროსის მოადგილე, მაგრამ მას შემდეგ, რაც რაიონში უკვე მაჟორიტარი კანდიდატის ვინაობა ცნობილი გახდა, თბილისიდან დაბრუნებულმა შტაბის უფროსმა უარი მითხრა მოადგილეობაზე. შეთანხმება, რომელიც გვქონდა მე და “კარდაკარის” შტაბის ხელმძღვანელს ჩემს სტატუსთან დაკავშირებით დაირღვა, მე დავინახე, რომ აღარ ვიყავი შტაბში საჭირო, თუ რატომ, ჩემთვის მიზეზი ბოლომდე დღესაც გაურკვეველია და აბაშის რაიონში შეწყდა ჩემი აქტიურობა, როგორც “ქართული ოცნების” აქტივისტის, თუმცა, ეს მუშაობა სხვადასხვა დონეზე სხვადასხვა რაკურსით გავაგრძელე. მქონდა შეხვედრები ქალბატონ ეკა ბესელიასთან და სხვებთან.
– რამდენადაც ჩვენთვის ცნობილია, ვაჟა ლიპარტია არ იყო კოალიცია “ქართული ოცნების” შტაბის ხელმძღვანელი.
– მე “კარდაკარის” პროგრამაზე გეუბნებით.„გურია ნიუსი“ დაუკავშირდა ვაჟა ლიპარტიას, რომელმაც გვითხრა, რომ კომენტარს აუცილებლად გააკეთებს, მხოლოდ სტატიის გამოქვეყნების შემდეგ.
– დღეს უკვე ცნობილია, რომ თქვენ პარტია “თავისუფალი დემოკრატების” წევრი ხართ. არსებობს მოარული ხმები იმის შესახებ, რომ თქვენ “ქართული ოცნების” პარტიის წევრი ხართ, სიმართლეს არ შეეფერება.
– მე არასდროს ვყოფილვარ არც ერთი პარტიის წევრი. “თავისუფალ დემოკრატებში” არჩევნების შემდეგ გავწევრიანდი.
– ამ თანამდებობაზე როგორ მოხდა თქვენი დანიშვნა?
– არსებობდა ვაკანსიები, შემოვიტანე განცხადება, გამესაუბრა აბაშის არსებული ხელმძღვანელობა, მეტ-ნაკლებად იცოდნენ ჩემი წარსული, აქტივობები, გამოცდილებები და დავინიშნე მოვალეობის დროებით შემსრულებლად, ისევე, როგორც ყველა ჩემი კოლეგა, კონკურსამდე დროებით ვასრულებთ მოვალეობებს.
– თქვენს ფუნქცია-მოვალეობებში რა შედის?
– ახლა აღარ არსებობს კლასიფიკაცია _ პირველი, მეორე, მესამე მოადგილე. არის მოადგილეებს შორის ფუნქციონალური გადანაწილება. ჩემს საკურატორო სფეროს შეადგენს განათლება, კულტურა, სპორტი, ახალგაზრდობა, მასმედიასთან ურთიერთობა. მედიასთან ურთიერთობა ყოველთვის კარგია, რადგან იგი არის დემოკრატიისმოდარაჯე ძალა, არის ყველაზე კარგი საშუალება, წარმოაჩინო შენი იდეები, აზრები, მენტალობა და საქმიანობა. მინდა იცოდეს ყველამ, რომ ვარ კოალიციის იდეების გასახორციელებლად მოსული. მინდა ვიყო ტრანზიტი და შევძლო ყველას თანადგომით რაღაც სასიკეთოდ შეიცვალოს აბაშის რაიონში.
– თუმცა, როგორც მოსახლეობის ნაწილი ამბობს, თქვენ იმ გუნდში ხართ, რომელიც უკვე წლებია გამგეობაშია. საზოგადოების ერთი ნაწილის აზრით, აბაშა ერთადერთი რაიონია, სადაც არჩევნების შემდეგ არანაირი ცვლილებები არ მომხდარა და თანამდებობებს ისევ ძველი, ნაციონალური კადრები იკავებენ. რამდენად შეძლებთ ამ გუნდთან ერთად თქვენი იდეების გატარებას?
– მე ვარ თანამდებობაზე აბაშის მუნიციპალიტეტში. გუნდში ვარ თუ არა და საერთოდ არსებობს თუ არა ეს გუნდი, ეს სხვა საკითხია, კიდევ ვიმეორებ, ვიყავი “ოცნების” ერთ-ერთი აქტივისტი.
– დავაზუსტოთ _ თქვენ “კარდაკარის” პროგრამაში იყავით და მერე საერთოდ არ ჩანდით.
– იმ პერიოდში ყველაზე აქტუალური და პირველი ნაბიჯი იყო “კარდაკარის” პროგრამა და მე ვიყავი იქ. ვთვლიდი და ვთვლი, ვარ იმ კურსის მიმდევარი, რასაც ახორციელებს “ქართული ოცნება”, მინდა პატარა ჭანჭიკის როლი შევასრულო იმ დანაპირების შესრულებაში, რაც “ქართულმა ოცნებამ” მისცა ხალხს. თუ ღმერთი მეტს შემაძლებინებს, მადლობელი ვიქნები უფლის და აბაშელი ხალხის.
“გურია ნიუსი” დაუკავშირდა ვაჟა ლიპარტიას, რომელმაც გვითხრა, რომ კომენტარს აუცილებლად გააკეთებს, მხოლოდ სტატიის გამოქვეყნების შემდეგ.
