მან მაშინ მითხრა, ჩემს ფიქრებს და შეხედულებებს პატარა მოთხრობების და ნოველების სახით ვწერ და აუცილებლად მოგაწვდითო.
ამ დილით ბატონმა დავითმა წერილი გამოგვიგზავნა და გვთხოვა, მკითხველამდე მიგვეტანა მისი ფიქრები. იმედია, წერილის ადრესატებიც ამოიცნობენ თავიანთ თავს და ცოტათი მაინც თუ დაფიქრდებიან, მივიჩნევთ, რომ შუამავლის როლი კარგად შევასრულეთ.
ღია წერილი დემოკრატიის მშენებლობით დაკავებულ ცნობად სახეებს!
(მეტი სიამოვნების მიღებისათვის, უმჯობესია, ეს წერილი წაიკითხოთ სიმღერის _ “მიშა მაგარია“, ფონზე, ეროვნულ სამოსში გამოწყობილებმა, ახლადაშენებული პარლამენტის წინ ბუშტებითა და ყანწით ხელში. კარგი იქნება, თუ ქარიან ან წვიმიან ამინდს შეარჩევთ და რაც მთავარია ჩოხაზე ქამარ-ხანჯალის ჩამოკიდება არ დაგავიწყდეთ!).
საქართველო უძველესი კულტურის ქვეყანაა, რომელიც მდებარეობს შავი ზღვის სანაპიროზე და 20 წელია აშენებს დემოკრატიას…
საქართველოს ჩრდილოეთიდან ესაზღვრება რუსეთი, რომელმაც 21-ე საუკუნეში მთელი მსოფლიოს თვალწინ წაგვართვა სამაჩაბლო და აფხაზეთი, მაგრამ ჩვენ მაინც უშიშრად ვაშენებთ დემოკრატიას…
საქართველოში არ არსებობს არც ერთი პარტია, კლასიკური გაგებით, გარდა ბელადების ირგვლივ შემოკრებილი ცნობადი სახეებისა, მაგრამ ჩვენ მაინც ერთგულად ვაშენებთ დემოკრატიას…
საქართველოში ნეპოტიზმი ჩვეულებრივი და საამაყო მოვლენაა და მიუხედავად ამისა, ჩვენ მაინც 20 წელია ცოლისდების, ბიცოლების და ბიძების დახმარებით უანგაროდ ვაშენებთ დემოკრატიას…
საქართველოდან საზღვარგარეთ გარბის ხალხი და უკან არავინ ბრუნდება უნიჭო პოლიტიკოსებისა და დეპორტირებული უიღბლოების გარდა, მაგრამ ჩვენ მაინც მთელი გაგებით ვაშენებთ დემოკრატიას…
20 წელია, ვატარებთ არჩევნებს ისე, რომ 20 წელია არ ვიცით, რამდენი ამომრჩეველი გვყავს და მაინც მათემატიკური სიზუსტით ვაშენებთ დემოკრატიას..
არ ვიცით, ხვალ რომელი “მეგობარი“სახელმწიფო რომელ ტერიტორიას წაგვართმევს, მაგრამ ჩვენ მაინც ოპტიმისტურად ვაშენებთ დემოკრატიას…
მანამ, სანამდე ცოცხების დანიშნულებას სხვაგვარი თვალით არ დაგვანახებენ, ყველაფერს ვითმენთ და დიდი გულმოდგინებით ვაშენებთ დემოკრატიას…
ევროპა ვიზებს არ გვაძლევს, მაგრამ ჩვენ ისევ 20 წელია, ვირული სიჯიუტით და მოთმინებით ვაშენებთ ფასადურ დემოკრატიას…
ნატოში შესვლის შანსი არ გვაქვს, მაგრამ ჩვენ მაინც გვჯერა, რომ მიუხედავად იმისა, რომ ნატო ქალი არაა, ოდესმე მიგვიპატიჟებს და სიყვარულით ვაშენებთ ნატოსთვის დემოკრატიას…
აზრზე არ ვართ, რა არის, ნამდვილი დემოკრატია, მაგრამ ჭკვიანი სახეებით და სწორუპოვარი მზერით მაინც ვაშენებთ ჭეშმარიტ დემოკრატიას…
ბევრი სხვა უბედურებებიც გვჭირს, მაგრამ ჩვენ მაინც არ ვნებდებით და მტრების ჯინაზე ცეკვა-თამაშით და გინებით ვაშენებთ, გასაკვირ დემოკრატიას…
ვაშა ჩვენს გარჯას! ვაშა შენებას! ვაი, ჩვენს პატრონს უბედურს!
თქვენი მიღწევებით აღფრთოვანებული, არაცნობადი სახე დავით კიკვაძე
