“სენაკის სასამართლოში ისევ ძველი კადრებია”

დავის საგანი იყო:

1. აბაშის მუნიციპალიტეტის გამგებლის დასანიშნად შექმნილი საკონკურსო-საატესტაციო კომისიის თავმჯდომარის მიერ დისკრიმინაციულ საფუძველზე შელახული ღირსების აღდგენა (დისკრიმინაცია პოლიტიკური შეხედულების გამო) და ბოდიშის მოხდა.

2. აბაშის მუნიციპალიტეტის საკრებულოს თავმჯდომარის ბრძანების #1-005 “აბაშის მუნიციპალიტეტის გამგებლის თანამდებობაზე დანიშვნის შესახებ” ბათილად ცნობა.

ამ პროცესის შესახებ სასაუბროდ “გურია ნიუსს” მოსარჩელე მხარის წარმომადგენელი მარიამ ჩიქოვანი დაუკავშირდა.

მარიამ ჩიქოვანი: _ პროცესი ნახევარი საათის დაგვიანებით დაიწყო ანუ 3:30 წუთზე. მოსამართლემ მოკლედ მოგვახსენა სარჩელის არსი, მხარეების ვინაობა და შემდეგ სიტყვა მოსარჩელე მხარეს გადასცა. ახსნა-განმარტებისთვის დროდ თითოეულ მხარეს 15 წუთი განესაზღვრა. მე, 1 კვირის წინ, შუამდგომლობა მქონდა მიტანილი სასამართლოში, რომლის გადაგზავნაც მოპასუხე მხარისთვის ვერ მოხერხდა, ამიტომაც ნინო კუპრეიშვილი სხვა დროისათვის ითხოვდა მოპასუხე მხარის მიერ ახსნა-განმარტების მიცემას, რაც კანონმდებლობით დაუშვებელია. ის შუამდგომლობა იქვე წავიკითხე. საკრებულოს იურისტს თავისი პოზიციის ჩამოსაყალიბებლად 25 წუთი დასჭირდა. რაც შეეხება საკრებულოს თავმჯდომარის მოადგილეს, მან მხოლოდ ის აღნიშნა, რომ არ ეთანხმებოდა სარჩელს და შემდეგ მოსამართლემ განავრცო მისი სიტყვა. მოპასუხე მხარეს დამატებითი მტკიცებულებები ჰქონდა მიტანილი სასამართლოში, რომელიც მხოლოდ 1 ეკზემპლარად იყო წარდგენილი. დღეს მეორეც მიიტანეს და საღამოს მანდატური მოიტანს ჩვენთან. ეს მტკიცებულებებია: გასაუბრების ეტაპზე გადასული პირების ბიოგრაფიები თანდართული დოკუმენტებით, საკრებულოს ვიდეოთვალის 3 იანვრის ჩანაწერი, საკრებულოს კანცელარიის ჟურნალიდან ამონაწერი.

შემდეგ დაიწყო მხარეთა შორის კითხვა-პასუხის ეტაპი. ამ ეტაპზე სხდომის მდივანი ხელით ახდენდა კითხვა-პასუხის ჩაწერას, რაც დროში გაიწელა. კითხვები პირველად მოპასუხე მხარემ დასვა. მოპასუხე მხრიდან მხოლოდ ნინო კუპრეიშვილი სვამდა ერთი და იმავე კითხვას სხვადასხვა სიტყვებით. 20-მდე შეკითხვა დასვა: გაგესაუბრნენ თუ არა საატესტაციო კომისიის წევრები, დაგისვეს თუ არა კითხვები კონკურსზეო. შემდეგ მოსარჩელე მხარის ჯერიც დადგა. ხაბეიშვილმა დათო კაჭარავას ჰკითხა: “ქართული ოცნების” კოალიციაში 6 პარტია შედიოდა და მისი ერთი წარმომადგენელი მაინც რატომ არ შეიყვანეთ საკონკურსო-საატესტაციო კომისიაშიო, რაზეც მან უპასუხა, შონია ხომ იყო თქვენი წარმომადგენელიო. ჩვენ ვიუარეთ და ვუთხარით, რომ ის არ ყოფილა “ქართული ოცნების” წარმომადგენელი. ამასობაში 6 საათი გახდა და მოსამართლემ იკითხა, დავასრულო სხდომა თუ გავაგრძელოო. მხარეები შევთანხმდით, რომ გაგვეგრძელებინა და ვინაიდან მოსარჩელე მხარის მოწმეები საპატიო მიზეზების გამო ვერ გამოცხადდნენ სასამართლოში, მოწმის სახით დაიკითხა მოპასუხე მხარის მიერ წარმოდგენილი პირი, საკრებულოს აპარატის უფროსი გოჩა ხურცილავა. მან თქვა, რომ იმ დროს, როდესაც რეზო ხაბეიშვილის მიერ კომისიაში მიტანილი იქნა დამატებითი საბუთები კონკურსში მონაწილეობის მისაღებად თავად არ იმყოფებოდა დათო კაჭარავას სამუშაო ოთახში. არადა, კაჭარავამ ახსნა-განმარტების ეტაპზე განმარტა, რომ მის ოთახში იმ დროს ნამდვილად იყვნენ ხურცილავა, შონია და მხეიძე. მერე მეც მომეცა კითხვების დასმის საშუალება და ვკითხე ხურცილავას _ 9 იანვრის სხდომა საკრებულოს მორიგი სხდომა იყო თუ რიგგარეშე, რაზედაც მისი პასუხი იყო, რიგგარეშეო. არადა, საკრებულოს თავმჯდომარეს, დათო თოფურიას ხელმოწერილი პასუხი გვაქვს ჩვენს მიერ შეტანილ განცხადებაზე, რომ იანვარში რიგგარეშე სხდომები არ გამართულა და ეს სასამართლოშიც მიტანილი გვაქვს მტკიცებულებად, როცა ვკითხე, რომელ წყაროს გენდოთ,-მეთქი, ფერები გადაუვიდა სახეზე და მიპასუხა, მე პასუხი გავეცი უკვე კითხვებსო. დაკითხვის შემდეგ რელიგიური ფიცი დაადებინა სასამართლომ. ვფიცავო, თქვა და დაამატა: თუ რამე ტყუილი ვთქვი, უფალი მომიტევებს, მიტევების კვირააო. მისი დაკითხვის შემდეგ შუამდგომლობა დავაყენეთ, რომ მოწმის სახით დაკითხულიყო ასევე საპრეტენზიო კომისიის თავმჯდომარის მოადგილე ზურაბ რუსია. სასამართლომ შუამდგომლობა დააკმაყოფილა.

_ მოსამართლე ვინ არის?

_ ინდირა მაშანეიშვილი.

_ მორიგი სხდომა როდის გაიმართება?

_ შევთანხმდით, რომ მომავალი სხდომა ჩატარდება პარასკევს, 11 საათზე. ალბათ, პარასკევსაც ვერ მოესწრება საქმის დასრულება და კიდევ 1-2 სხდომა იქნება საჭირო.

_ როგორია თქვენი პროგნოზი?

_ არ გვაქვს იმის იმედი, რომ მოსამართლე კანონიერ გადაწყვეტილებას გამოიტანს. სასამართლო ჯერ კიდევ არ არის დამოუკიდებელი და სენაკის რაიონულ სასამართლოში ისევ ძველი კადრებია, მაგრამ ჩვენ მაინც ბოლომდე ვიბრძოლებთ სამართლიანობის აღდგენისთვის კანონიერების ფარგლებში.

ჩვენ დავუკავშირდით სასამართლოზე მოპასუხე მხარის მიერ წარმოდგენილ პირს, საკრებულოს აპარატის უფროსს, გოჩა ხურცილავას.

გოჩა ხურცილავა: _სასამართლო ნამდვილად ობიექტურად მიმდინარეობს. დავიკითხე მოწმის სტატუსით. სხდომა, რომელზეც გამახვილებულია ყურადღება და ამბობენ, რომ გამთენიისას ჩატარდა, სინამდვილეში დილის 10 საათზე დაიწყო და ამას იღებდა ხუთი ტელეკომპანია. საატესტაციო კომისიამ მუშაობა დაასრულა 3 იანვარს, 7 დღის შემდეგ ჩატარდა საკრებულოს სხდომა. ეს იყო ჩვეულებრივი სხდომა.

_ ბატონო გოჩა, მოპასუხე მხარე ამბობს, რომ თქვენ იმყოფებოდით კაბინეტში, როცა კომისიის თავმჯდომარესა და რევაზ ხაბეიშვილს შორის ინციდენტი მოხდა.

_ ვინაიდან მე არ ვიყავი კომისიის წევრი, ჩემი იქ ყოფნა არ იყო მიზანშეწონილი. არასოდეს ჩავრეულვარ კომისიის მუშაობაში. მხოლოდ ორი წუთით შევედი ოთახში ტელეფონის ნომრების შესატანად. ჩვენ, ყველანი _ დათო კაჭარავა, რეზო ხაბეიშვილი, ლევან ჩიქოვანი და მე დიდი ხნის მეგობრები ვართ. ერთი მეზობელიც კია დათოსი. ასე რომ, ჩვენი ნაცნობობა ახლა არ დაწყებულა და წარმოუდგენელია, რამე ინციდენტს ჰქონოდა ადგილი.