“გურია ნიუსს” ექსკლუზიურ ინტერვიუ მისცა _ ის ექვსი წლის შემდეგაც ფიქრობს, რომ ყუფარაძის საქმეში კითხვის ნიშნები არ არსებობს.
_ იუსტიციის მინისტრმა თეა წულუკიანმა მოსამართლეებთან შეხვედრის რამდენიმე მოსამართლის გვარი დაასახელა, მათ შორის თქვენიც. იღებთ მინისტრის კრიტიკას?
_ ამას კრიტიკას ვერ დავარქმევდი. მას აქვს თავისი პოზიცია, მე _ ჩემი. ადამიანები იმიტომ ვართ, რომ განსხვავებულები ვართ. აბსოლუტურად მისაღებია მისი პოზიცია. მას, უბრალოდ, ასე მიაჩნია.
_ თქვენ როგორ მიგაჩნიათ, ქალბატონო დალი?
_ მე, რაც მიმაჩნდა, ის ჩემი მიერ გამოტანილ განაჩენში აისახა. დღესაც რომ გამომქონდეს ეს განაჩენი, ზუსტად იგივე იქნებოდა, არ შეიცვლებოდა არაფერი.
_ იუსტიციის მინისტრის მიერ თქვენი გვარის დასახელებას ელოდით?
_ რა თქმა უნდა, არა ერთხელ დასმულა ეს საკითხი ტელევიზიითაც, ბეჭდური მედიითაც. ასე რომ არ გამკვირვებია, როდესაც მინისტრმა ჩემი გვარი დაასახელა. მე სიტყვითაც გამოვედი იუსტიციის მინისტრის წინაშე და ვთქვი ის, რაც უნდა მეთქვა.
_ გვანცა ყუფარაძის საქმეში კითხვის ნიშნები საერთოდ არ გაქვთ?
– ჩემთვის კითხვის ნიშნები რომ ყოფილიყო, არც ერთ შემთხვევაში არ გამოვიტანდი გამამტყუნებელ განაჩენს. ერთი კითხვის ნიშანიც რომ მქონოდა, ეს განაჩენი არ დადგებოდა, რადგან საქმე ეხებოდა ბავშვს, რომელიც იყო 14 წლის და რომელიც იყო გოგონა.
_ ამ საქმეში შეცდომა არ დაგიშვიათ?
_ შეცდომები თუ იყო, ის ზემდგომ ინსტანციაში გამოსწორდა. წინასწარ რომ მცოდნოდა შეცდომას ვუშვებდი, ხომ არ დავუშვებდი? იმიტომ ვარ პირველი ინსტანციის მოსამართლე, რომ ჩემს მიერ დაშვებული შეცდომები გადაისინჯოს ზემდგომ ინსტანციებში.
_ იუსტიციის მინისტრი ხშირად საუბრობს მისი წინამორბედის ხელში პროკურატურის მხრიდან მოსამართლეებზე გახორციელებულ ზეწოლაზე. ცხრა წლის განმავლობაში გრძნობდით ამ ზეწოლას?
_ როგორ შეიძლება ზეწოლაზე იყოს საუბარი? ხმამაღლა შემიძლია ვთქვა, რომ არც ერთ საქმეზე, არც ერთ ეტაპზე, მათ შორის არც გვანცა ყუფარაძის საქმეზე, არანაირი ზეწოლა არ ყოფილა. როგორ შეიძლებოდა იმის დაშვება, რომ 14 წლის ბავშვის საქმეში ყოფილიყო რაიმე სახის ზეწოლა? რა ინტერესი უნდა ყოფილიყო? ყველა არის მშობელი, გინდ პროკურორი იყოს, გინდ მოსამართლე, პირველ რიგში ყველა არის ადამიანი. ამის მტკიცება ფანტაზიის სფეროსაც კი სცილდება. მე ყველა ჩემს გადაწყვეტილებაში, რაც კი მიმიღია ჩემი სამოსამართლეო პრაქტიკის განმავლობაში, ვიყავი აბსოლუტურად თავისუფალი.
_ ამბობთ, რომ ამ საქმეში კითხვის ნიშნები არ იყო, მაგრამ გვანცა ყუფარაძეს საზოგადოებამ სოლიდარობა და მხარდაჭერა გამოუცხადა. რატომ გახდა ეს საქმე რეზონანსული?
_ ეს, ალბათ, ყუფარაძის ოჯახის დამსახურებაა, რადგან მათ შეძლეს ეწარმოებინათ მათთვის სასარგებლო კარგი პიარი. მე, როგორც მოსამართლე, პიარს ვერ გავაკეთებდი, ჩემი გადაწყვეტილება არის ჩემი პიარიც. კონკრეტულ საქმეებზე მე განმარტებასაც კი ვერ გავაკეთებდი. ეს განაჩენი სააპელაციო სასამართლოში გასაჩივრდა, რომელმაც ის დატოვა ძალაში, შემდეგ კი იყო უზენაესი სასამართლო.
_ გვანცა ყუფარაძის საქმე სტრასბურგის სასამართლოშია. ელით, რომ თქვენი განაჩენი შეიცვლება?
_ კი ბატონო, მიიღებს სტრასბურგის სასამართლო გადაწყვეტილებას, მაგრამ როგორიც არ უნდა იყოს მისი გადაწყვეტილება, ვფიქრობ, რომ მე ვიყავი მართალი ამ ადამიანის წინაშე.
_ მოსალოდნელია რომ მართლმსაჯულების ხარვეზების დამდგენი კომისია გვანცა ყუფარაძის განაჩენსაც გადახედავს. ხომ არ ფიქრობთ, რომ კომისიის ვერდიქტი თქვენს მიმართ დისცილინური დევნის საბაბი გახდება?
_ არ მგონია, რომ ეს ასე იყოს. მე, როგორც მივხვდი, იუსტიციის მინისტრთან შეხვედრის შემდეგ, კომისია დაკომპლექტდება გამოცდილი, პროფესიონალი იურისტებით და არანაირად არ ველი, რომ ჩემი გადაწყვეტილება შეიცვლება.
_ რა შენიშვნები გაქვთ ხარვეზების დამდგენი კომისიის შექმნასთან დაკავშირებით?
_ სასამართლო გადაწყვეტილება უნდა გადასინჯოს მხოლოდ მოსამართლემ. სხვა მხრივ, იუსტიციის მინისტრთან შეხვედრა იყო ძალიან აქტუალური, ძალიან მისაღები. წინათაც რომ ყოფილიყო მსგავსი შეხვედრები, ალბათ, კარგი იქნებოდა. ყველა პროექტის ირგვლივ რომ მოსამართლეებს საკუთარი აზრის დაფიქსირების საშუალება მისცემოდათ, მოგებული დარჩებოდა მართლმსაჯულება. ეს იყო პირველი პრეცედენტი, როდესაც ყველამ ერთად პუნქტობრივად განვიხილეთ ყველა საკითხი.
_ მიგაჩნიათ, რომ დღეს მოქმედი სისხლის სამართლის კანონმდებლობა მკაცრია და გარკვეულად ზღუდავს მოსამართლის თავისუფლებასაც?
_ კოდექსი იყო და არის საკმაოდ მკაცრი და თავისთავად მოსამართლეები ვალდებული ვართ, მას დავემორჩილოთ. ჩვენ არ ვიღებთ კანონებს. თქვენ იცით, ვინც იღებდა ამ კანონებს და აქედან გამომდინარე, ჩვენ ვასრულებთ. სასამართლო ვერაფერს ვერ იზამს _ ან უნდა გამოიტანოს გამამტყუნებელი განაჩენი ან გამამართლებელი. მხოლოდ ეს ორი გზა აქვს მოსამართლეს.
_ რას ეტყვით გვანცა ყუფარაძეს, რომელიც დღეს უკვე თავისუფალია?
_ არაფერს არ ვეტყოდი გვანცას. უბრალოდ, ვუსურვებ წარმატებულ კარიერას. გვანცა იურისტია და მოხარული ვიქნები, თუ ის გახდება წარმატებული მოსამართლე.
