რომლის დამფუძნებელი ყველასთვის ნაცნობი სახე, “ვის უნდა 20 ათასის” წამყვანი მამუკა გამყრელიძეა. თავიდან GMG აქცენტს საფეხბურთო არხზე აკეთებს _ ის მაყურებელს ევროპის ექვსი ქვეყნის საფეხბურთო ჩემპიონატის მატჩების ტრანსლაციას სთავაზობს, მათ შორის ინგლისის პრემიერლიგის მატჩებსაც, რომლის ჩვენების უფლება, მაგალითად, პოპულარულ რუსულ HTB-საც არ აქვს.
“გლობალ მედია გრუპის” ლოგოზე ექვსგანყოფილებიანი ფერადი ქოლგაა გამოსახული. თითოეული ფერი კონკრეტულ სეგმენტს შეესაბამება: მწვანე უკვე ნახსენები ფეხბურთის არხია, წითელი _ ზოგადად სპორტული არხის ფერია, ნარინჯისფერი _ ბავშვებისთვის განკუთვნილ არხს ნიშნავს, ცისფერი _ დიასახლისებს ტელესერიალების ყურებისკენ უხმობს, იისფერი _ კინოგურმანებისთვის გაკეთებული არხია, ხოლო ოქროსფერი _ ჰოლივუდური კინოპროდუქციისა.
მართალია, ახალი არხის შესახებ ბევრი რამ არის ცნობილი, მაგრამ ალბათ, ბევრმა არ იცის, რომ “გლობალ მედია გრუპმა” მაუწყებლობა გურიაში დაფუძნებული ტელეკომპანია “მადის” მაუწყებლის ლიცენზიით დაიწყო. ჩვენ ამ საკითხზე “მადის” დამფუძნებელს გოდერძი მდინარაძეს ვესაუბრეთ, თუმცა, ის ინფორმირებული არ აღმოჩნდა, რაც ერთობ გასაკვირია _ როგორ შეძლო “მადის” გენერალურმა დირექტორმა, ავთანდილ დევიძემ დამფუძნებლის გარეშე გაეცა მაუწყებლის ნებართვა სხვა პირზე? მოგვიანებით გავარკვიეთ, რომ დამფუძნებელი წინააღმდეგი არ იყო მათთვის გამოუსადეგარი ნებართვა გაეყიდათ. უბრალოდ, მას არ სურს იმ ლიცენზიის დათმობა, რომლითაც გურიაში აბონენტებს ტელეგადაცემათა პაკეტს სთავაზობს.
_ ეს არც მომხდარა. ჩვენ გვქონდა 4 ლიცენზია. თავიდან ავიღეთ საკაბელო ლიცენზია, თუმცა, მოგვიანებით აღმოჩნდა, რომ ეს ტექნიკურად პრობლემატური იყო, თუნდაც არაგადამხდელი აბონენტების ჩაჭრისას _ იკარგებოდა კაბელები. ამის გამო დავნერგეთ ის სისტემა, რაც დღეს გვაქვს _ ანტენითა და დამჭერი მოწყობილობით. შესაბამისად, ეს ლიცენზიაც ავიღეთ. ერთი ლიცენზია გვაქვს, ქობულეთის რაიონი რომ მოვიცვათ, ხოლო ის, რაც “გლობალ მედია გრუპს” გადავეცით, არის მაუწყებლის ნებართვა. გემახსოვრებათ, ჩვენი მაუწყებლობა გვქონდა, მაგრამ ის წამგებიანი გამოდგა, ვეღარ შევძელით შენახვა და უკვე 4 წელზე მეტია, არ გვიმუშავია. რამდენჯერმე დადგა საკითხი, რომ მარეგულირებელს ჩვენთვის ჩამოერთვა ლიცენზია. ამიტომაც, როცა გასული წლის ბოლოს ჩვენთან ჩამოვიდა მამუკა გამყრელიძე, გადავწყვიტეთ მისი გაყიდვა. “გლობალ მედია გრუპმა” სულ 14 ათასი გადაგვიხადა, აქედან 10 ათასი მარეგულირებლის წინაშე ჩვენი დავალიანება. რომ არ მიგვეცა ეს ნებართვა, არაფერი შეიცვლებოდა _ მის გარეშე იმ საფეხბურთო მატჩებს, რომლის ექსკლუზიური ჩვენების უფლებაც “გლობალ მედია გრუპს” აქვს, მაინც ვერავინ გაუშვებდა. თან ამ ხელშეკრულებით გარკვეული შეღავათები გვექნება, თუმცა, როგორც ბატონმა მამუკამ მითხრა _ გურიაში ჯერ ვერ შემოვლენ და ამას საკმაო დრო დასჭირდება, შესაძლოა, 2-3 წელიც კი, _ ამბობს ჩვენთან საუბარში “მადის” გენდირექტორი.
იმის გათვალისწინებით, რომ “მადის” გენდირექტორი გასული წელს დააპატიმრეს, გაჩნდა ეჭვი _ ხომ არ წაართვეს “მადს” ზემოთ ნახსენები ნებართვა? ამასთან, საყურადღებოა ის ფაქტი, რომ “მადს” დღესაც აქვს ბიუჯეტის დავალიანება _ 25 ათასი ლარი. ეს მაშინ, როცა ხელისუფლებას თავი მოაქვს, ქართულ ტელევიზიებს რამდენიმე მილიონი ჩამოვაწერეთო.
ავთანდილ დევიძე ზეწოლის ფაქტს გამორიცხავს: _ არანაირი ზეწოლა არ ყოფილა. ჩემი დაკავება მოჰყვა იმას, რომ ჩვენთან შემოვიდნენ შესამოწმებლად და აღმოგვიჩინეს 47 ათასი ლარი გადაუხდელი თანხა. ამაზე ჩვენი მოსაზრება გვქონდა, თუმცა, ეს არგუმენტი საკმარისად არ მიიჩნიეს _ ჩვენ გავითვალისწინეთ, მოსახლეობის დაბალი გადახდისუნარიანობა და 80 დოლარად ღირებული აპარატურა მათ თითქმის მესამედ ფასში გადავეცით. გვეუბნებიან, რომ ამის უფლება კანონის მიხედვით, არ გვქონდა. დათქმულ ვადაში ვერ გადავიხადეთ თანხა სრულად და დამაკავეს მანამ, სანამ მთლიანად არ დავფარეთ დავალიანება. ზეწოლაზე ლაპარაკი სისულელეა! მეტსაც გეტყვით _ ოპოზიციონერებმა განაცხადეს, რომ ვაიძულეთ “მადი” თავის პაკეტში “მაესტროც” ჩაესვა, მაგრამ მერე ძალოვნება უარი ათქმევინესო. ეს არის აბსურდი, ამის გამო უხერხულობაში ჩავვარდი, _ ამბობს დევიძე.
ვერ ვიტყვით, აკონტროლებს თუ ვერა “მადს” ხელისუფლება, თუმცა, გასაკონტროლებელიც არაფერია _ რამდენიმე წელია, საკუთარი გადაცემები არ აქვს და მხოლოდ სხვა არხების გაშვებით შემოიფარგლება. თუმცა, “მადის” კლიენტებს “მაესტროს” გადაცემების ხილვის საშუალება არ აქვთ. გენდირექტორის თქმით, ამის მიზეზი ისაა, რომ აღნიშნულ კომპანიას მისთვის არ მიუმართავს თანამშრომლობისთვის. თუმცა, დევიძე იმასაც ამბობს, რომ “მაესტრომ” ამისთვის უნდა გადაუხადოს, რადგან მის გადაცემებს და რეკლამებს მიაწოდებს გურიის მოსახლეობას. ჩვენ მას “რუსთავი-2”-სა და “იმედთან” დადებული ხელშეკრულებები შევახსენეთ, რის შემდეგაც დევიძემ გვითხრა, რომ არ გამორიცხავს “მაესტროც” უფასოდ ჩართოს:
_ “მაესტრომ” მაშინ უნდა გადაგვიხადოს, თუმცა, მას არ გამოუთქვამს ეს სურვილი.
_ “რუსთავი-2” და “იმედი” რომ არ გიხდიან?
_ მათთან ხელშეკრულება მაქვს.
_ გააფორმეთ “მაესტროსთანაც”.
_ მათგან სურვილი არ ყოფილა.
_ თქვენ რატომ არ გაქვთ სურვილი? ამით ხომ მომხმარებელთა რაოდენობა გაიზრდება?!
_ შესაძლოა, პრინციპით _ არც ჩვენ გადავახდევინებთ და არც თავად გადაგვიხადოს. არის არხები, რომლებსაც ვუხდით. ზოგს კი, თუ სურს და ჩვენი ინტერესი არაა, აქეთ უნდა გადაიხადოს. “მაესტროსთან” შეიძლება იგივე გავაკეთოთ, რაც, “რუსთავი-2”-თან და “იმედთან” გვაქვს.
_ ანუ ჩართავთ ამ არხს?
_ ახლა ადგილი არ მაქვს, პაკეტში არხების გადაადგილება მომიწევს. წლის ბოლომდე ვერაფერს გავაკეთებ. უკვე შეთანხმებულ არხს ვერ ამოვაგდებ.
_ თქვენ ხომ ის ადგილები გაგითავისუფლათ, რისი ჩვენების ექსკლუზიური უფლება “გლობალ მედია გრუპს” აქვს?
_ ჰო, მაგრამ გავაფორმებ ხელშეკრულებას და არ იქნება პრობლემა.
_ თქვენ ხომ თქვით, GMG გურიამდე ჯერ ვერ შემოვაო?
მართალია, “მადის” გენდირექტორი დაგვპირდა, შესაძლებლობისა და შეთანხმების შემთხვევაში, “მაესტროს” გადაცემებს ჩართავს და მისი კატეგორიული განცხადებების მიუხედავად, რომ მასა ზეწოლას არ ახდენენ, მაინც ძნელი სათქმელია, გარისკავს თუ არა რეგიონული ტელევიზიის გენდირექტორი ოპოზიციური არხის პაკეტში ჩასმას.
ბოლოს, ფეხბურთის, სპორტისა და კინოს გურული მაყურებლების ინტერესებიც გავითვალისწინეთ და დავინტერესდით, თუ როდის შევძლებთ რეგიონში GMG-ის მაუწყებლობის მიღებას. იმისთვის, რომ GMG-ის არხების მიღების საშუალება გქონდეთ, საქართველოში არსებული რომელიმე საკაბელო ტელევიზიის მომსახურებით უნდა სარგებლობდეთ: “აიეტი”, “გლობალ ტივი”, მეშვიდე არხი, მიმდინარეობს მოლაპარაკება “სილქნეტთან” და მერვე არხთან, აგრეთვე, რეგიონებში არსებულ საკაბელო ტელევიზიებთან, თუმცა, ბათუმში, რუსთავსა და აღმოსავლეთ საქართველოს ზოგ ქალაქში GMG-ს უკვე ჰყავს მაყურებელი. გურიაში მისი რეტრანსლირების უფლებას, როგორც “მადში” გვითხრეს, კი მიიღებენ, მაგრამ იმის გამო, რომ ეს საკმაოდ ძვირადღირებული პაკეტია, სავარაუდოდ, ფასი გაიზრდება:.
_ ეს ჩვენთვის ძალიან მძიმე იქნება. დაგვემატება ხარჯები, რადგან ექსკლუზიურ ჩვენებებს უფასოდ არავინ მოგვცემს. ამ დროს უნდა გავზარდოთ პაკეტის ფასები, რაც, თუ გავითვალისწინებთ გურულების შესაძლებლობებს, ძალიან მძიმე გადაწყვეტილებაა. 2-3 ლარის მომატება (ამჟამად პაკეტები 6,10 და 12 ლარი ღირს) გახდება საჭირო და ეს მომხმარებლებს დაგვიკარგავს. მაქსიმალურად ვეცდებით, მაყურებელს კარგი პაკეტი მივაწოდოთ და ამასთან, გადახდაც შეძლონ, _ ამბობს “მადის” ხელმძღვანელი.
