სხდომის დასაწყისში ამირან გიგინეიშვილი მიწვეულ და “მიუწვეველ” სტუმრებს მიესალმა _ მიუწვეველ სტუმრებში მან ჟურნალისტები გვიგულისხმა და ისიც დასძინა, რომ ნებისმიერი სხდომა საჯაროა და მასზე დასწრება ყველას შეუძლია.
გიგინეიშვილმა საკრებულოს ბიუროს სხდომაზე ბიუროს წევრებს დღის წესრიგით გათვალისწინებული საკითხები გააცნო. საკრებულოს თავმჯდომარის თქმით, გამგეობის სამსახურების რეორგანიზაცია მიმდინარეობს _ წინა სხდომაზე ადმინისტრაციული საქმის წარმოება დაიწყო. ბიურომ უნდა განსაზღვროს კომისია, თუმცა ამ საკითხზე უნდა იმსჯელოს ყველა კომისიამ და ფრაქციამ.
ბიურომ დღის წესრიგში წარმოდგენილი საკითხები განიხილა, რათა გადაეგზავნოს სხვადასხვა ფრაქციებს.
დღის წესრიგი ასეთი იყო: ლანჩხუთის მუნიციპალიტეტის გამგეობის ადამიანური რესურსების მართვის სამსახურის დებულების დამტკიცება; გამგეობის აპარატის დებულების დამტკიცება; გამგეობის ეკონომიკისა და საინვესტიციო გარემოს განვითარების სამსახურის დებულების დამტკიცება; შიდა აუდიტის სამსახურის დებულების დამტკიცება. ასევე, სპორტისა და ახალგაზრდულ საქმეთა სამსახურის, გამგეობის ქონებრივი მართვის სამსახურის, განათლების, კულტურის, ძეგლთა დაცვის, ტურიზმის და ახალგაზრდული სამსახურის, ინფრასტრუქტურის, ურბანიზაციის, არქიტექტურისა და საპროექტო სამსახურის, საფინანსო სამსახურის, შესყიდვებისა და მატერიალურ-ტექნიკური უზრუნველყოფის სამსახურის, შრომის, საზოგადოებრივი ჯანმრთელობის, სოციალური დაცვის, ვეტერანთა, ლტოლვილთა და იძულებით გადაადგილებულ პირთა საქმიანობის სამსახურის და ლანჩხუთის მუნიციპალიტეტის გამგეობის დებულების დამტკიცება.
საკითხში _ “სხვადასხვა”, საკრებულოს ყოფილმა თავმჯდომარემ, რევაზ ჩიტიძემ საშტატო განრიგის პროექტის წარდგენა მოითხოვა: “აუცილებლობად მიმაჩნია შეგახსენოთ, რომ ვინაიდან სტრუქტურული ცვლილებები მიმდინარეობს, ჩვენ არ ვიცით, რომელი სამსახური რა საშტატო განრიგით შემოიფარგლება, ამიტომ ვითხოვ ამ განრიგის პროექტს. ჩვენ გვაქვს უფლება, ეს ვიცოდეთ,” _ განაცხადა ჩიტიძემ. მის წინადადებას ბიუროზე მყოფი დეპუტატებიც დაეთანხმნენ.
_ მე, ჩემი მხრივ ვეთანხმები თქვენს მოსაზრებას, კოლეგავ, ამიტომ მოვითხოვ შტატების სტრუქტურა ოფიციალურად იქნეს წარმოდგენილი, _ თქვა გიგინეიშვილმა.
_ ჩვენ შტატების სტრუქტურა ოფიციალურად გვაქვს, რომელსაც აუცილებლად შემოვიტანთ, _ გამოეპასუხა გამგებლის მოვალეობის შემსრულებელი, ზაზა ურუშაძე.
_ ვადა განუსაზღვრეთ გამგეობას _ ორშაბათამდე შემოიტანოს ეს სია, _ დააკონკრეტა გიგინეიშვილმა.
ილო გვარჯალაძემ, დავით წულაძის განცხადების შესახებ ამცნო დამსწრეებს: “შემოსულია განცხადება დავით წულაძის მიერ. ის მიმართავს კომისიებს ახალ ფრაქციის შექმნასთან დაკავშირებით. ფრაქციას “რეალური თვითმმართველობისთვის” ერქმევა და მას დავით წულაძე უხელმძღვანელებს, ხოლო წევრები გოჩა კილაძე და ქონებრივი მართვის, ბუნებრივი რესურსებისა და აგრარულ საკითხთა კომისიის თავმჯდომარე, გია ორაგველიძე იქნებიან.”
საკრებულოს დეპუტატმა მარინე თურნავამ, ფრაქცია “ქართული ოცნება _ დემოკრატიული ლანჩხუთის” თავმჯდომარემ კიდევ ერთხელ მოთხოვა საკრებულოს თავმჯდომარეს, საკრებულოს განსახილველად წარედგინოს სოფელ ორაგვისღელის საკითხი. როგორც თურნავამ თქვა,“არჩევნებამდე ყოფილმა მთავრობამ სოფელში, საძოვრებისა და საყანე ფართობების შესაღობად, ეკლიანი მავთულები მიიტანა, არჩევნების შემდეგ კი მავთულები უკან წაიღეს. მე ვითხოვ საკრებულომ, განიხილოს, ვინ და რატომ წაიღო ის მავთულები. ხალხიც ითხოვს ამას. მოიკითხეთ, სად წავიდა ის მავთულები,” _ მიმართა დეპუტატმა გიგინეიშვილს.
ამირან გიგინეიშვილის თქმით, აღნიშნული საკითხის მოკვლევა დავალებული აქვს მუნიციპალიტეტის გამგებელს, რომელმაც უნდა წარმოადგინოს თავისი მოსაზრება ამ საკითხთან დაკავშირებით.
ბიუროს სხდომაზე დადგინდა, რომ ამ საკითხების განხილვას ფრაქციები 28 მარტამდე დაასრულებს, ხოლო საკრებულოს სხდომა 5 აპრილს გაიმართება.
