დღეს, ქალაქ ოზურგეთში, სხვადასხვა ლოკაციაზე კანონპროექტის „უცხოური გავლენის გამჭირვალობის შესახებ“ განმარტებითი საინფორმაციო ფურცლები იყო გაკრული. დღის მეორე ნახევარში სამოქალაქო მოძრაობა „თავისუფლებისთვის“ წევრებმა ეს საინფორმაციო ფურცლები ჩამოხიეს და ურნებში ჩაყარეს.
,,ქართველი ხალხის ნებას, გავხდეთ ევროკავშირის წევრი ქვეყანა, წინ ვერაფერი დაუდგება. არა რუსულ კანონს, ჩვენ ვირჩევთ ევროპას, ზუსტად იმიტომ, რომ გამჭვირვალობა და დემოკრატია, ისედაც ჩვენი მთავარი ღირებულება და არჩევანია!’’ _ გვითხრა „თავისუფლებისთვის“ წევრმა ნინე ულუმბელაშვილმა.
როგორც გაირკვა ეს საინფორმაციო ფურცლები ოზურგეთის „ქართული ოცნების“ ახალგაზრდული ორგანიზაციის წევრებმა გააკრეს.
ამ ფაქტის სოციალურ ქსელში გამოეხმაურა ფრაქცია „ქართული ოცნების“ წევრი დიმიტრი სამხარაძე:
„შავი ფულისთვის ბრძოლის ნაცური მეთოდი _ ინფორმაციის განადგურება არგუმენტებით პასუხის ნაცვლად!
ნაცობის, ცენზურის, სიტყვის და გამოხატვის თავისუფლების წინააღმდეგ ბრძოლის მეტი ლუსტრაცია რა უნდა იყოს?
ბრავო „ქართული ოცნების“ ახალგაზრდულ ორგანიზაციას. ინფორმაციის ყველასთან მიტანასთან ერთად ამ ხალხის სრული ლუსტრაციისთვისაც ეს ძალიან ღირდა.
ისე, მართლა რა გადამწარებულები არიან, რას მალავენ ასეთს, გამჭვირვალობა ყოფილა ამათი მთავარი მტერი“, _ წერს დიმიტრი სამხარაძე ფეისბუქზე.
ავტორი
