“გამარჯობა, ქალბატონო თინათინ. ლაშა ბერულავა მე გახლავართ. სანამ ძალიან გაბრაზდებით, იქნებ გამარკვიოთ:
ა) ეს შეხვედრა იქნება თუ “სტრელკა”;
ბ) რა შუაშია ლაშა ბერულავა, როცა საიტზე დევს ოფიციალური განცხადება, რომელიც “ლაზარემ” გაავრცელა და რომელიც, სხვათა შორის, წუხელ “ფეისბუქზეც” ვრცელდებოდა?
ჩემი მხრიდან, გამოვთქვამ მზადყოფნას თქვენთან შესახვედრად, უბრალოდ, იმის გათვალისწინება მოგიწევთ, რომ ფრენა ისეთი უნდა, მე რომ ვიცი. შემიძლია, გასწავლოთ კიდეც”
“გურია ნიუსთან” საუბრისას, ლაშა ბერულავა ამბობს, რომ მისთვის გაუგებარია რატომ აღმოჩნდა ხიდაშელის მიერ მიერ შერისხულთა სიაში:
_ ჩემთვის აბსოლუტურად გაუგებარია, რატომ აღმოვჩნდი ქალბატონ თინას მიერ შერისხულთა სიაში: “ლაზარეს” ეს განცხადება ჩემმა კოლეგამ დარეჯან მეფარიშვილმა გამოაქვეყნა გუშინ “ფეისბუქის” საკუთარ გვერდზე, იქ ვნახე და ვიკითხე კიდეც ამ ინფორმაციის წყარო. როცა ბმული მომაწოდეს, გადავამოწმე, ვნახე, რომ ასეთი განცხადება მართლაც არსებობს და გამოვაქვეყნე, როგორც “ლაზარეს” განცხადება. როგორც რედაქტორმა, გავუკეთე სათაური და ლიდი. ხელიც იმიტომ მოვაწერე, რომ ამით პასუხისმგებლობა ავიღე იმაზე, რომ ეს განცხადება ნამდვილად გავრცელდა. თავდაპირველად გაოგნებულიც კი დავრჩი, როცა ქალბატონ თინას გამოხმაურება ვნახე. მაინც მგონია, რომ თინა ხიდაშელი, უბრალოდ, ვერ გაერკვა სიტუაციაში. ასეთ შემთხვევაში მხოლოდ ვურჩევდი, რომ უფრო დაკვირვებით გაეცნოს მედიასაშუალებებში გამოქვეყნებულ მასალებს და გაერკვეს, ვინაა ავტორი და ვინ _ რედაქტორი. მესმის, რომ ძნელია პოლიტიკოსობის ტვირთი: ვინც უწმაწური სიტყვებით გაგინებს, იმაზე ვერ გაბრაზდები ან რომც გაბრაზდე, საჯაროდ ვერ გამოხატავ, რადგან მილიარდერის რჩეულია. სამაგიეროდ, შეიძლება თამამად გაბრაზდე ჟურნალისტზე და ეს გამოხატო “ფეისბუქზე”, როცა ის ჟურნალისტი შენს შესახებ რომელიღაც ორგანიზაციის მიერ დაწერილ ბრალდებებს სტანდარტის სრული დაცვით გამოაქვეყნებს მედიაგამოცემის გვერდზე… _ აღნიშნავს ჟურნალისტი.
შეგახსენებთ, რომ ცოტა ხნის წინ, თინა ხიდაშელმა, სოციალურ ქსელ ფეისბუქში კომენტარი გააკეთა სააგენტო ნიუპოსტ.გე-ს მიერ გავრცელებულ განცხადებაზე, რომლის ავტორი ჟურნალისტი, ლაშა ბერულავა იყო და რომლის თანახმად “7 აპრილს, ხარება დღეს, უმრავლესობის დეპუტატისა და პარლამენტის თავმჯდომარის მეუღლის თინა ხიდაშელის ხელმძღვანელობით, სპორტის სასახლეში “იეღოველთა მსოფლიო კონგრესის” ჩატარება იგეგმებოდა”
ხიდაშელის თქმით, კიდევ კარგი, რომ თბილისში არ არის:
_ მგონი, ვბრაზდები. მეგონა, ასეთ ამბებზე აღარ ვრეაგირებდი. კიდევ კარგი, რომ თბილისში არ ვარ, მაგრამ დღეს ხომ ჩამოვალ, და ეს ლაშა ბერულავა (სტატიის ავტორი. ნ. გ.) მინდა გავიცნო და ვინმე არ დამეხმარებით?! ისე არა მხოლოდ ბერულავა, თავად ეს “ლაზარე” გამომეხმაუროს, ტელეფონის ნომერი და სახელი და გვარები მინდა ამ დასახელების უკან მდგომი ადამიანების. ისე საღამოობით დავფრინავ ხოლმე და მერიდეთ. ძონძები, ძალიან ვარ გაბრაზებული. აი, ძალიან, ძალიან, ცეცხლებს რომ ყრის ისეთი სმაილიკი, _ წერს ხიდაშელი.
ჩვენ ამ წუთებში ვცდილობთ თინა ხიდაშელთან დაკავშირებას და პასუხის პასუხზე მის კომენტარს მოპოვებისთანავე მოგაწვდით.
