როგორც გავარკვიეთ, “ნაციონალი” ჩიტაიშვილი “მეოცნებე” გამგებლებს წესიერად არც კი იცნობს. უფრო მეტიც, ჩოხატაურის გამგებლის მოვალეობის შემსრულებლის, თამაზ ჯინჭარაძის თქმით, გუბერნატორს მხოლოდ ერთხელ შეხვდა და ისიც “ვინუჟდენ” სიტუაციაში.
_ რეგიონული განვითარებისა და ინფრასტრუქტურის მინისტრის მოადგილე, თენგიზ შერგელაშვილი იყო ჩამოსული ოზურგეთში. მაშინ ვნახე გუბერნატორი. ეს იყო “ვინუჟდენი” შეხვედრა. როგორც ვიცი, ბატონი ვალერი დადის ჩოხატაურში, თუმცა, გამგეობის ნაცვლად “ნაციონალური მოძრაობის” ოფისს სტუმრობს, _ აღნიშნა ჩვენთან საუბრისას ჯინჭარაძემ.
იმის გასარკვევად, თუ როგორ მიდის კოჰაბიტაცია და როგორია გუბერნატორის თვალით დანახული ახალი ხელისუფლების შეცდომები, ვალერი ჩიტაიშვილს ვესტუმრეთ:
_ ბატონო ვალერი, დავიწყოთ ყველაზე პოპულარული თემით _ როგორ მიდის კოჰაბიტაცია?
_ საზოგადოებაში კოჰაბიტაციასთან დაკავშირებით არაერთგვაროვანი დამოკიდებულებაა. სამწუხაროდ. ჯერ კიდევ არსებობენ ადამიანები, რომელთათვისაც ოპონენტთან ურთიერთობის ერთადერთი ფორმა სიძულვილის ენაა. ჩვენ რა თქმა უნდა ამას არ ავყვებით და არ შევეჯიბრებით მათ ამაში. ჩვენ ყოველთვის მზად ვართ ყველა იმ ძალასთან თანაარსებობის, ვისთვისაც ძვირფასი სახელმწიფოს და ქვეყნის ინტერესებია და არა უცხო ქვეყნების მტრული დაკვეთა.
_ ორშაბათის ტრადიციული თათბირებს რატომ აღარ ატარებთ?
_ თათბირების ჩატარება ჩვენი თვითმიზანი არასდროს ყოფილა. თათბირები იმართებოდა იმის მიხედვით, რასაც შესაბამისი საკითხების გადაწყვეტა ითხოვდა. მაგალითად, ინფრასტრუქტურული პროექტების, სოფლის პროგრამების მიმდინარეობა, მთავრობიდან მიღებული სხვადასხვა დავალებების კოორდინაცია და ა. შ. მოგეხსენებათ, რომ მაშინ მუშაობის სხვა ტემპები იყო, ახლა კი, ჯერ-ჯერობით, არც ერთი ზემოთ დასახელებული პროგრამა არ დაწყებულა, მაგრამ ეს იმას არ ნიშნავს, რომ მჭიდრო კოორდინაციაში არ ვართ შესაბამის სამინისტროებთან და მუნიციპალიტეტებთან.
_ როგორც გავიგეთ, ჩოხატაურის გამგებელთან “ვინუჟდენი” შეხვედრა გქონიათ… სხვა გამგებლებსაც “ვინუჟდენში” ხვდებით?
_ მართალი გითხრათ, კარგად ვერ გავიგე რას გულისხმობთ “ვინუჟდენ” შეხვედრაში? მაგრამ ისე ცნობისთვის გეტყვით, რომ ჩვენ არავისთან შეხვედრის პრობლემა არ გვაქვს, თუ ამას საქმე მოითხოვს. მით უმეტეს, გურიის რეგიონის რომელიმე მუნიციპალიტეტის გამგებელთან.
_ ქვეყანას ახალი ხელისუფლება ჰყავს, თქვენ კი ძველ ხელისუფლებას წარმოადგენთ. თქვენი აზრით, აქვს თუ არა “ქართულ ოცნებას” შეცდომები გურიის რეგიონში?
_ საკითხის ასე დასმა, რომ მე წარმოვადგენ ძველ ხელისუფლებას, არასწორია, რადგან მხარის რწმუნებული არის პრეზიდენტის და მთავრობის წარმომადგენელი და არა ოპოზიციის ლიდერი მხარეში. ხოლო რაც შეეხება დღევანდელი ხელისუფლების შეცდომებს, შეცდომები, რა თქმა უნდა, ჩვენც გვქონდა და მათაც აქვთ. მაგალითად, პოლიტიკური ნიშნით დათხოვნები _ გურიაში ამ ნიშნით 170-მდე ადამიანია გათავისუფლებული. თვითმმართველობის საქმიანობაში უხეში ჩარევა, გართულებული კრიმინოგენური მდგომარეობა, შეჩერებული ინფრასტრუქტურული პროექტები და ა. შ. ამაზე ჩასაფრებულის პოზიციიდან კი არ ვსაუბრობ, არამედ მართლა არ მინდა ხალხს მოლოდინი გაუცრუვდეს და ნაბიჯის წინ გადადგმის ნაცვლად, უკან, წარსულში დავბრუნდეთ.
_ 19 აპრილის აქციისთვის როგორ მიდის მზადება?
_ 19 აპრილის აქციის თაობაზე, რა თქმა უნდა, ჩემთვის ცნობილია, ისიც ვიცი, რომ წასვლის მსურველი ბევრია, თუმცა, საორგანიზაციო საკითხების დეტალები ნამდვილად არ ვიცი. აღნიშნულ საკითხზე შეგიძლიათ მიმართოთ ნაცმოძრაობის ადგილობრივ ორგანიზაციებს
_ ბატონო ვალერი, ის ადამიანები, რომლებიც არც თუ დიდი ხნის წინ თქვენს გუნდს წარმოადგენდნენ, არჩევნების შემდეგ სხვა ბანაკში აღმოჩნდნენ. რამდენად მარტივად გადაიტანეთ ეს და ამ გადასახედიდან “ნაციონალური მოძრაობის” გუნდის “ერთიანობა” იყო თუ არა მხოლოდ და მხოლოდ პიარი?
_ მე ამ საკითხს ორ ასპექტში განვიხილავდი _ პოლიტიკურში და ადამიანურში. პოლიტიკურად, რა თქმა უნდა, უცხო და უცნაური არაფერია იმაში, ადამიანმა სხვადასხვა პოლიტიკური მოტივით, საკუთარი ინტერესებიდან გამომდინარე, შეიცვალოს პოზიციები. ეს მისი პოლიტიკური პასუხისმგებლობის საკითხია. მაგრამ იგივე საკითხს თუ ადამიანურად შევხედავთ, საწყენია, როცა შენი თანაგუნდელი სინამდვილეში იმისთვის, რომ სხვაგან უფრო მეტი სარგებელი ნახოს, უარს ამბობს შენთან ურთიერთობაზე და მის დასაფარად რაღაც გამოგონილ საბაბს და მიზეზებს იგონებს. მე შეგნებულად არ მოვახდენ ამ თემის დრამატიზებას _ მე მგონი, თავად საზოგადოებამ ჯეროვნად შეაფასა ასეთი ადამიანების საქციელი და მეც ადამიანურად თანავუგრძნობ მათ. შესაბამისად, ამის გამო მათთან ადამიანურ ურთიერთობაზე უარს არ ვიტყვი, ხოლო რაც შეეხება პოლიტიკურ თანამშრომლობის საკითხს, მეეჭვება, რომ იმის მერე, რაც მოხდა, მათ ამაში ოდესმე ჩემი დარწმუნება შეძლონ.
_ “ნაციონალები” პოლიტიკურ დევნაზე საუბრობენ. თქვენ, პირადად, განიცდით თუ არა პოლიტიკურ ზეწოლას?
_ პირდაპირ გეტყვით _ გურიის გუბერნატორზე ჯერ-ჯერობით ამ ტიპის ზეწოლა არ ხორციელდება, მაგრამ ეს არ ნიშნავს იმას, რომ სხვა ჩემს კოლეგაზეც არ ხდება. მაგალითად, გუნავაზე, სიბაშვილზე კახეთში და ა. შ. მაგრამ დაბალ დონეებზე ზეწოლა ნამდვილად არის. ჩვენ ვსწავლობთ, ეს ქმედებები ორგანიზებულად ხორციელდება თუ ცალკეული უპასუხისმგებლო საჯარო მოხელეების თვითინიციატივებია. ჩვენ ამის დამადასტურებელი არა ერთი საბუთი გაგვაჩნია და მასმედიის საშუალებებითაც ასეთი არა ერთი ფაქტი გამხდარა საჯარო.
_ სამომავლო გეგმები როგორი გაქვთ?
_ რაც შეეხება ჩემს სამომავლო გეგმებს, ახალ საპრეზიდენტო არჩევნებამდე, პრეზიდენტი და მის მიერ დანიშნული გუბერნატორები აგრძელებენ საქმიანობას. გუბერნატორების დანიშვნის წესის შეცვლა ოქტომბრის ბოლოს, კონსტიტუციის ცვლილებების ამოქმედების შემდეგ ხდება. მანამდე 6 თვეზე მეტია და ქართულ პოლიტიკაში 6 თვეზე დიდი პერსპექტივით დაგეგმო შენი დღის წესრიგი, ძალიან დიდი ფუფუნებაა. შესაბამისად, ამ საკითხზე ჯერ-ჯერობით კონკრეტულს ვერაფერს მოგახსენებთ.
_ რა იყო თქვენი ხელისუფლების და უშუალოდ თქვენი ყველაზე დიდი შეცდომა?
_ შეცდომა იმას არ მოსდის, ვინც არაფერს აკეთებს, მე, მოგეხსენებათ, 4 წელზე მეტია გურიაში სახელმწიფო რწმუნებული ვარ. ამ პერიოდში ბევრი სასიკეთო რამ გაკეთდა. მე არ დავიწყებ მათ ჩამოთვლას, ეს საქმეები ისედაც თვალში საცემია; რა თქმა უნდა, იყო შეცდომებიც. ალბათ, უფრო მეტი ყურადღება უნდა დამეთმო სოციალური პრობლემების მოგვარებისთვის, არამარტო გუბერნიაში უნდა მომხდარიყო მოსახლეობასთან შეხვედრა, არამედ მეტი სიხშირით სოფლებში გასვლა და ადგილობრივი მოსახლეობის პრობლემების შესწავლა. ასევე, უფრო მეტი ძალისხმევა უნდა გამომეჩინა სოფლის მეურნეობის ხელშეწყობის პროგრამების მომზადებისა და დანერგვის კუთხით. მოგეხსენებათ, გურია დიდი ფოლკლორისა და ტრადიციების მატარებელი რეგიონია და ძალიან მწყდება გული, რომ არ მოხერხდა ფოლკლორის ცენტრის შექმნა; ასევე, ალ. წუწუნავას სახელობის ოზურგეთის დრამატული თეატრის რეაბილიტაცია. ამას თვითკმაყოფილი ადამიანის პოზიციიდან კი არ ვსაუბრობ _ ეს გურიაზე შეყვარებული ადამიანის გულისტკივილია.
_ ამ ხელისუფლების მთავარ მიღწევად და მთავარ შეცდომად რას მიიჩნევთ?
_ შეცდომებზე ზემოთ გესაუბრეთ და სწორად არ მიმაჩნია მასზე საუბარს უფრო მეტი დრო დავუთმოთ, ვიდრე მისი აღმოფხვრის გზების ძიებას. ერთი შეხედვით, ყველაზე უფრო პოზიტიური, შესაძლოა, ამნისტია ჩანდეს და ამ ჰუმანური აქტის საწინააღმდეგო არ შეიძლება ადამიანს ჰქონდეს რამე, მაგრამ იმ მასშტაბით და იმ დაჩქარებულ ვადებში, როგორშიც გახორციელდა, არ მგონია, უარყოფითი გავლენა არ მოახდინოს კრიმინოგენურ სიტუაციაზე.
მე დიდი ხანია საჯარო სამსახურში ვარ და გეტყვით, ძალიან ძნელია ერთი ხელის მოსმით მცირე დროში რაიმე ხელშესახები ცვლილებები განახორციელო, ვფიქრობ, ხელისუფლების ცვლილებამდე რა აღმშენებლობის ტემპებიც იყო, იმას თუ შევინარჩუნებთ, ესეც ძალიან კარგი იქნება.
