საკრებულოს თავმჯდომარემ ალეკო მამეშვილმა პირველ საკითხზე: “ოზურგეთის მუნიციპალიტეტის საკრებულოს გამოკლებული წევრის ადგილმონაცვლის, მიხეილ გოგოტიშვილის საკრებულოს წევრობის უფლებამოსილების ცნობის შესახებ”, _ სიტყვა საკრებულოს წევრ მერაბ მჟავიას გადასცა. ამ უკანასკნელმა დეპუტატებს გააცნო კანონი, რის საფუძველზეც მოხდა გოგოტიშვილის საკრებულოში დაბრუნება, _ იგი ახლახან საკრებულოს გამოკლებულ წევრს პეტრე სალუქვაძეს ჩაენაცვლა.
განსაკუთრებული დავა და კამათი გამოიწვია დღის წესრიგით გათვალისწინებულმა მეორე საკითხმა: “ოზურგეთის მუნიციპალიტეტის 2013 წლის ბიუჯეტის დამტკიცების შესახებ,” ოზურგეთის მუნიციპალიტეტის საკრებულოს 2012 წლის 27 დეკემბრის #40 დადგენილებაში ცვლილების შეტანის შესახებ” _ ოზურგეთის მუნიციპალიტეტის საკრებულოს დადგენილების დამტკიცების თაობაზე, რომელიც საფინანსო-საბიუჯეტო სამსახურის უფროსმა ალექსანდრე ბერიძემ წარმოადგინა.
_ აუცილებლობიდან გამომდინარე, ოზურგეთის მუნიციპალიტეტში სტიქიური მოვლენების შედეგად დაზარალებული მოსახლეობის დასახმარებლად საჭირო თანხების მობილიზაციისთვის, ბიუჯეტში დღეისთვის არსებული რეზერვები უნდა შემცირდეს 150 ათასი ლარით. გარდა ამისა, სხვა მუხლების მიხედვით მოხდა ეკონომიების ჯამის შედგენა, რაც მთლიანად 450 ათას ლარს შეადგენს. აქედან 150 ათასი ლარით უნდა დახმარებოდნენ ადრინდელი სტიქიით დაზარალებულებს, თუმცა, ეს თანხა გაუხარჯავი იყო, რადგან მაშინდელი ზარალი 5 მილიონამდე ლარს უდრიდა. ახლა ეს 150 ათასი ლარი ახლანდელი სტიქიით დაზარალებულებს მოხმარდება და როცა მოხდება ხელახალი შევსება, დაახლოებით, თვენახევარში, შემდეგ დაიწყება ადრინდელი სტიქიის დროს დაზარალებული მოსახლეობის დაკმაყოფილება.
ოპოზიციონერი დეპუტატი ლელა ნაცვალაძე დაინტერესდა, კარგად არის თუ არა დათვლილი ზარალი და საკრებულოს წევრებმა უნდა იცოდნენ, რა მასალით დაეხმარნენ ხალხს: _ მრავალბინიანი სახლები რომ გადაიხურა, ახლა ისევ დაზიანდა. თვეების წინ გადახურული რატომ უნდა დაინგრეს? რას ეუბნებით წინანდელი სტიქიით დაზარალებულებს? ისინი, რახანია, დახმარებას ელიან, _ თქვა ნაცვალაძემ.
_ მე ნაწილობრივ გიპასუხებთ _ წინა ზარალის ღირებულება 4 მილიონზე მეტი იყო, თანხა კი ბევრად ნაკლები გააჩნდათ, ამიტომ იმ გაუხარჯავი თანხიდან 150 ათასი ლარი, ამ სტიქიით დაზარალებულებს მოხმარდება, შემდეგ კი, თვენახევარში, მოხდება იმავე თანხის 450 ათასამდე შევსება და დაიწყება წინა სტიქიით დაზარალებულთა დახმარება, _ განმარტა ბერიძემ.
ფრაქცია “ნაციონალური მოძრაობის” თავმჯდომარე საკრებულოში შალვა თავდიშვილი გაბრაზებული წამოხტა:
_ წინა სტიქიის დროს, ძიმითში, ცხრასულიანი ოჯახი ისე დაზარალდა, აქამდე სხვის სახლში ცხოვრობდა. მერე ის სხვისი სახლიც დაეწვა და ახლა ღია ცის ქვეშაა. რა ვუთხრა ახლა, სამი თვის მერე დაგეხმარებიან,-მეთქი? გავალ გარეთ და იქ დამხვდებიან…
_ სამი თვის ვადა ჩვენ არ გვითქვამს, შენ თქვი ახლა. ერთ თვეში შეივსება ადრინდელი რეზერვი და მოხდება წინა სტიქიის დროს დაზარალებულთა დახმარება, _ შეეპასუხა საკრებულოს თავმჯდომარე თავდიშვილს. უკმაყოფილო თავდიშვილმა სხდომა შედარებით ადრე დატოვა. ლელა ნაცვალაძემ კი დავა კვლავ გააგრძელა:
_ ბოსელში ცხოვრობს ხალხი და თქვენ უაზრო არგუმენტები მოგყავთ. 5 მილიონის ზარალი თუ იყო, 450 ათასს როგორ ამყოფინებთ წინა სტიქიით დაზარალებულებს? ეს არასწორი მიდგომაა, _ თქვა მან, მის უკან მჯდომმა დეპუტატმა კი ჩაილაპარაკა, სწორი მიდგომა რომელია, თქვას, როცა თანხა მეტი არ არისო.
საბოლოოდ, საკრებულოს პოზიციონერ-ოპოზიციონერი მოპაექრე წევრები, მაინც ვერ შეთანხმდნენ, ადრინდელი სტიქიით დაზარალებულებს დახმარებოდნენ ჯერ თუ პირიქით, ახლანდელი სტიქიით დაზარალებულთათვის მიეხედათ. ეს საკითხი საბოლოოდ, მაინც კენჭისყრით გადაწყდა _ ჯერ დაეხმარებიან ახალ დაზარალებულებს, ძველებს კი სულ ცოტა, ერთი თვით მოცდა მოუწევთ. ზოგს კი უფრო დიდხანსაც, რადგან, სად 5 მილიონი და სად 450 ათასი ლარი, რომელიც სარეზერვო ფონდს გააჩნია?
