მოსამართლე ამბობს, რომ უჩა ნანუაშვილის მიერ დისციპლინური დევნის აღძვრას ყველაზე საშინელ სიზმარშიც ვერ წარმოიდგენდა.
სახალხო დამცველმა 2012 წლის ანგარიშში ზემოხსენებული სასამართლოს ორი მოსამართლე კანონმდებლობით დაკისრებული მოვალეობის არაჯეროვან შესრულებაში დაადანაშაულა და შესაბამისი განცხადებით იუსტიციის უმაღლეს საბჭოს მიმართა. ლია ორკოდაშვილი ის მოსამართლეა, რომელმაც პრეზიდენტის მიერ გაერთიანებული შტაბის უფროსის თანამდებობაზე დანიშნული გიგი კალანდაძე რამდენიმე საათში გადააყენა. მოსამართლე ამბობს, რომ სახალხო დამცველის კრიტიკა არაობიექტურია.
“გიორგი კალანდაძის თანამდებობიდან გადაყენების გადაწყვეტილების მიღება მოხდა საქმის გამოძიების და არა სასამართლო განხილვის ეტაპზე. პრაქტიკის მიხედვით, რომელიც კანონთან აბსოლუტურ შესაბამისობაშია, მიღებული გადაწყვეტილების აღსრულება ხდება არა სასამართლოს მიერ, არამედ საგამოძიებო ორგანოს მიერ, რომელსაც დავალებული აქვს გამოძიება. სისხლის სამართლის საპროცესო კოდექსშიც პროცედურა , სადაც საუბარია ასეთ ღონისძიებებზე, გაწერილია გამოძიებასთან დაკავშირებულ თავში. ეს რომ ყოფილიყო განაჩენი, რა თქმა უნდა , ჩვენ უნდა აღგვესრულებინა, მაგრამ თქვენ შეგიძლიათ ნებისმიერ მოსამართლეს ჰკითხოთ, თუ კი ის დაინტერესებული არ იქნება და რატომღაც ტყუილს არ გეტყვით, ვერავინ დაგისახელებთ ერთ მოსამართლესაც კი, რომელიც გამოძიების პროცესში მიღებულ გადაწყვეტილებას თვითონ აღასრულებს . გადაწყვეტილების რამოდენიმე პირველი პირი და არა ასლი გადაეცემა კანცელარიას, რომლის მეშვეობითაც ის დადგენილ ვადაში ბარდება იმ გამომძიებელს ან პროკურორს, რომელმაც შუამდგომლობა შემოიტანა და ის სწორედ ის აღასრულებს. რაც შეეხება მეორე ბრალდებას, რომ გადაწყვეტილებაში არ მივუთითეთ ფრაზა, “პრეზიდენტმა აღასრულოსო”, ასეთი რამ განაჩენშიც კი არ იწერება. ეს იყო გამოძიების ეტაპზე მიღებული გადაწყვეტილება, რომლის პირველი პირებიც ჩაბარდა გამომძიებელს ან პროკურორს. ეს მე არ ვიცი, რადგან ჩემგან გადაწყვეტილება შედის თანაშემწესთან და შემდეგ კანცელარიაში. რაც შეეხება ჩემს მიერ მიღებულ გადაწყვეტილებას, მე ვფიქრობ ამის გაჟღერება იმიტომ ხდება, რომ ვიღაც უფრო მართალი გამოვიდეს, ვიღაც მტყუანი,” _ აცხადებს მოსამართლე ორკოდაშვილი.
მოსამართლე ფიქრობს, რომ გიგი კალანდაძის თანამდებობიდან გადაყენება მისი მხრიდან გადადგმული ძალიან თამამი ნაბიჯი იყო, მას არ უნდა დაიჯეროს რომ სწორედ ამ გადაწყვეტილების გამო ხდება მისი სახელის არასასურველ კონტექსტში მოხსენიება: “იმავე საღამოს მთელმა სასამართლომ იცოდა, რომ ეს გადაწყვეტილება მივიღე და გეტყვით რატომ.
ერთ -ერთ ტელეარხზე იმყოფებოდა იუსტიციის მინისტრი თეა წულუკიანი და მას ჰკითხეს სასამართლო გადაწყვეტილებების შესახებ. ეს არ იყო უბრალო საკითხი _ პრეზიდენტმა კაცი დანიშნა და მოსამართლემ რამდენიმე საათში გადააყენა. თავს არ ვიქებ, მაგრამ ვთვლი, რომ ძალიან გაბედული გადაწყვეტილება იყო. წულუკიანმა განაცხადა, ერთადერთი დამოუკიდებელი და გაბედული გადაწყვეტილება კალანდაძის გადაყენება იყოო. ასეთი გაბედული გადაწყვეტილების მიმღებ მოსამართლეს თუ დისციპლინური წესით დასჯა დაემუქრებოდა, ამას ყველაზე საშინელ სიზმარშიც ვერ წარმოვიდგენდი. თუ ვიღაცამ მოიწადინა და მომედავა იმის გამო, რომ ეს პროცედურა კანონში ზუსტად გაწერილი არ არის, შეიძლება ვიღაცამ ცუდი სიზმარი ნახოს. ვფიქრობ, რომ ეს ცუდი სიზმარი მიზანმიმართული იქნება ჩემს წინააღმდეგ, მაგრამ რატომ _ ვერ ვხვდები . სახალხო დამცველი ახალი ხელისუფლების მიერ არის დანიშნული და როგორ შევიტანო ეჭვი?” _ ამბობს მოსამართლე ლია ორკოდაშვილი “გურია ნიუსთან”.
სახალხო დამცველის რისხვა თბილისის საქალაქო სასამართლოს კიდევ ერთმა მოსამართლემ და მთავარი პროკურატურის პროკურორმაც დაიმსახურეს. ამ უკანასკნელის საქმეს იუსტიციის სამინისტროს გენერალური ინსპექცია სწავლობს.
