აქციის მონაწილეები გარდაბნის მუნიციპალიტეტის გამგებლის მოვალეობის შემსრულებელს გელა ხუციშვილს “ნაციონალური მოძრაობასთან” და შსს ყოფილ მაღალჩინოსნებთან ალიანსში ადანაშაულებენ. როგორც აქციის ერთ-ერთი მონაწილე ლელა გოგოლაური “გურია ნიუსთან” აცხადებს, სწორედ ამ ალიანსის გამო მოხსნა საკუთარი კანდიდატურა “ქართული ოცნების” პარტიის თავმჯდომარეობიდან გარდაბანის მაჟორიტარობის ყოფილმა კანდიდატმა მამუკა არეშიძემ.
ამასთან დაკავშირებით, “გურია ნიუსთან” ექსპერტი კავკასიის საკითხებში მამუკა არეშიძე აცხადებს, რომ სასაზღვრო ჯარის ყოფილი ხელმძღვანელის ვალერი ჩხეიძის ყოფილი მოადგილე გელა ხუციშვილი “ქართულ ოცნებაში” მისი მიყვანილია და რეგიონული პოლიტიკის საკითხებზე ერთად მუშაობდნენ. არეშიძე გარდაბანის გამგებლის მოვალეობის შემსრულებლის საკადრო პოლიტიკის მიმართ უკმაყოფილებას გამოთქვამს. არც იმას გამორიცხავს, რომ შსს ყოფილ მაღალჩინოსანთან ვაჟა ლილუაშვილთან და “ნაციონალური მოძრაობის” მაჟორიტარ დეპუტატ თემურ ფეიქრიშვილთან თანამშრომლობდნენ.
“გელა ხუციშვილი არის ჩემს მიერ მოყვანილი. იგი სპეცსამსახურების ყოფილი თანამშრომელია. სასაზღვრო ჯარში მსახურობდა. ვალერი ჩხეიძის პერიოდში იყო ხელმძღვანელის მოადგილე, შემდეგ იყო საზღვრის უსაფრთხოების ექსპერტი. ჩემთან, როგორც ექსპერტთან რეგიონული პოლიტიკის საკითხებზე თანამშრომლობდა. დისციპლინირებული, სამხედრო მუშაობის სტილის და მცოდნე ადამიანი იყო… ყოველ შემთხვევაში, მე ასე მომეჩვენა. სწორედ ამიტომ გახდა იგი საარჩევნო შტაბის უფროსი. თუმცა მინდა გითხრათ, როგორც კი დავიწყეთ მუშაობა, მაშინვე მის მიმართ გარკვეული მიუღებლობა გამიჩნდა, რადგან გუნდი, რომელიც მის გარშემო შეიკრიბა, ჩემს ნდობას არ იწვევდა.
აგვისტოს დასაწყისში, როდესაც გარდაბანში ჩავედით, შტაბი უკვე შექმნილი იყო, რომელსაც “რესპუბლიკური პარტიის” წევრი, ბაკურ ზურაბიანი ხელმძღვანელობდა. ამ შტაბში ბევრი ადამიანი არ იწვევდა სიმპათიას, მაგრამ არც დრო გვქონდა იმისი და არც საშუალება, თავიდან შეგვექმნა შტაბი და რამეს გარჩევა დაგვეწყო. ამის შემდეგ, შტაბი გელა ხუციშვილმა ჩაიბარა, ბაკური კი მის მოადგილედ გადავიდა. როგორც გამოცდილი სპეცსამსახურის თანამშრომელი, თვითონ მეუბნებოდა რომ შტაბში შემოგზავნლია. დღეს კი ყველაზე პარადოქსული ის არის, ვიზეც მეუბნებოდა, რომ შემოგზავნილები არიანო, როგორც გამგებელს ისინი ყველა გვერდით ჰყავს! მე ერთ რამეს ვიტყვი და გამგები გაიგებს… მთელი არჩევნების პერიოდში მეუბნებოდა: ერთ-ერთმა შტაბის წევრმა თვითონ გამიმხილა, რომ 28 აგვისტომდე ჩვენი შტაბის მუშაობის ამბები “ნაციონალური მოძრაობის” შტაბში მიჰქონდა… ეს ადამიანი კი გუშინწინ თავის მოადგილედ დანიშნა!”
მამუკა არეშიძე “გურია ნიუსთან” აცხადებს, რომ გელა ხუციშვილის მიერ შექმნილი შტაბი არ იწვევდა ნდობას, რის გამოც, მეორე – “მაჟორიტარის შტაბი” შექმნა. თუმცა იქვე დასძენს, რომ საარჩევნო მუშაობის პროცესში, ორი შტაბი ნონსენსია.
“ასე იყო თუ ისე, ეს შტაბი არ იწვევდა ნდობას. ამიტომ, რომ არ ყოფილიყო გაუთავებელი დაძაბულობა ერთმანეთში, კოალიციის შტაბისგან განსხვავებით, შევქმენი მეორე შტაბი. რომელსაც “მაჟორიტარის შტაბი” დავარქვი. საკმაოდ საინტერესო ეპიზოდია იმისთვის, რომ გასაგები იყოს ამ ორი შტაბის მუშაობის წესი. ეს პათოლოგიური შემთხვევაა. საარჩევნო მუშაობის პროცესში, ორი შტაბი არის ნონსენსი. ამას მე ძალიან კარგად ვხვდები, მაგრამ, რადგან ცოტა დრო იყო, სხვა გამოსავალი აღარ გვქონდა.
გარდაბანი უაღრესად სპეციფიკური რაიონია. გარდა იმისა, რომ აქ არის უდიდესი ეთნიკური კუთხური სიჭრელე, მთლიანად ქვემო ქართლი წლების განმავლობაში “სამონეთი” იყო; წინა ხელისუფლება ყველაფერს აკეთებდა იმისთვის, რომ ეს ადამიანები ყოფილიყვნენ დათრგუნულ-სტრესულ მდგომარეობაში, მარტივად სამართავად. ქვემო ქართლის ბოლო უგვირგვინო მეფე, საქართველოს კუდის უფროსის ყოფილი მოადგილე ვაჟა ლილუაშვილი იყო. მას ყველგან თავის აგენტურა ჰყავდა. ადამიანს, რომელიც ოდნავ თავს წამოწევდა, შვილს უპატიმრებდნენ, ან ქონებას ართმევდნენ, ან ციხეში სვამდნენ. რა თქმა უნდა შტაბში ძალიან ბევრი შემოგზავნილი იყო და ინფორმაცია გადიოდა. იმის გამო, რომ არ მომხდარიყო დაპირისპირება, რადგან გარჩევების დრო ნამდვილად არ გვქონდა, შეიქმნა 2 შტაბი. ჩვენ შტაბს პირობითად დავარქვით “მაჟორიტარის შტაბი.” საინტერესო ფაქტები ხდებოდა: ჩვენი შტაბის წევრებს, ერთს მანქანის სამუხრუჭე გადაუჭრეს; მეორეს, ბუბა დვალს, სახეში სითხე შეასხეს, რამაც მისი დაბრმავება გამოიწვია. მესამე _ მოწამლეს. სხვათაშორის, მეც მომწამლეს. ამის გამო სამი დღე ინფექციურში ვიწექი და გადასხმებს ვიკეთებდი… ადამიანი, რომელმაც ბუბა დვალს სახეში ხსნარი შეასხა, ერთ-ერთი კოლონიის უფროსად დანიშნეს, მაგრამ პატიმრებმა 3 დღე გაუძლეს მის იქ ყოფნას და მერე გამოაგდეს.
ნელ-ნელა ინფორმაცია დაგროვდა _ ზუსტად ვიცოდი, შტაბში ვინ _ ვინ იყო. თუმცა მე ვერ ვიტყვი გელა ხუციშვილზე, რომ ის მუშაობდა საწინააღმდეგო ბანაკში. მიუხედავად იმისა, მე მოვიყვანე შტაბში, არჩევნების პერიოდში საჯარო ფიგურად ვაქციე, მან სხვასთან მეგობრობა და თანამშრომლობა არჩია. შემიძლია ვთქვა, გელა ხუციშვილმა პირადად მე მიღალატა. ეს არ იყო პარტიული ან მაჟორიტარის ღალატი. ეს იყო სხვა ტიპის ღალატი. პრინციპში, დღეს მას ჰყავს სამი მოადგილე. აქედან, ორზე ნამდვილად შემიძლია გითხრათ, ისინი შეკრულები იყვნენ “ნაციონალურ მოძრაობასთან” და ამბავი გაჰქონდათ შტაბიდან. მესამე არის აზერბაიჯანელი, ძველი მოადგილე, რომელიც ჩვენ წინააღმდეგ მუშაობდა.”
“გურია ნიუსის” კითხვაზე, პარტია “ქართული ოცნების” ცენტრალურ ოფისში თუ იციან რა ხდება გარდაბანში, არეშიძემ გვიპასუხა: “როგორ არ იციან! ძალიან კარგად იციან. ისეთი შთაბეჭდილება მრჩება, რომ არჩევნების შემდეგ გელა ხუციშვილი დაუახლოვდა დღევანდელ დეპუტატს მჭედლიშვილს. დაბეჯითებით ვერ ვიტყვი, მაგრამ მე არ გამოვრიცხავ, რომ იგი ვაჟა ლილუაშვილთან და მაჟორიტარ დეპუტატ ფეიქრიშვილთან (გულისხმობს “ნაციონალური მოძარაობის” დეპუტატ თემურ ფეიქრიშვილს. ავტ.) შეთანხმებით მოქმედებს.
რატომ შეეკრა გარდაბნის ადგილობრივი ხელისუფლება “ნაცმოძრაობის” კადრებს, ამაზე მამუკა არეშიძეს საკუთარი ვერსი აქვს:
“დაახლოებით ვხვდები, რატომ გადაწყდა ამ ადამიანების ასე ჯგუფურად მისვლა; იქ ძალიან ბევრი სისხლის სამართლის დანაშაულია ჩადენილი _ მიწების უკანონოდ გაყიდვა, მიწების ერთი კატეგორიიდან მეორეში გადაყვანა, მიტაცება, ადამიანებისთვის ქონების წართმევა. ამის საბუთები არსებობს, რომლის “გასუფთავებისთვის“ “ქართული ოცნება” სჭირდებათ. იქ სერიოზული კრიმინალია ჩადენილი და მინდა გითხრათ, თავის დროზე მე ყველა საბუთი წამოვიღე, რომელიც ნათელს ჰფენს კრიმინალურ სურათს. ასე რომ, არაფერი ეშველებათ _ საბუთების დიდი ნაწილი მე მაქვს.”
არეშიძე “გურია ნიუსთან” აცხადებს, რომ გარდაბანში “ქართულ ოცნებაში” პარტიული ნიშნით დისკრიმინაციაა. მისი თქმით, შტაბის ხელმძღვანელი ამბაკო ავალიანი გამოუცდელი ახალგაზრდა კაცია, სინამდვილეში კი, შტაბის ხელმძღვანელი და გამგებელიც გელა ხუციშვილია.
“როდესაც პარტიის ხელმძღვანელის არჩევნების დღე მოვიდა, გელა ხუციშვილმა და მისმა გუნდმა, წინ აიფარა ამბაკო ავალიანი. იგი წინა ხელისუფლების მიერ რეპრესირებული ადამიანია _ 2012 წლის ზაფხულში გაიტაცეს “ნაციონალური მოძრაობის” წარმომადგენლებმა, ლადო ვარძელაშვილის ხალხმა. ყოველ შემთხვევაში, ჩვენ ასეთი ისტორია ვიცით. ამოეფარნენ ავალიანის კანდიდატურას და ეს გარკვეული ტაქტიკური ჩანაფიქრი იყო. ამბაკო ავალიანი ახალგაზრდა გამოუცდელი კაცია და ითვლება, რომ ის არის ხელმძღვანელი.სინამდვილეში კი გელა ხელმძღვანელობს შტაბს, გამგეობასც და ყველაფერს. ჩვენ მიერ შეთავაზებული პარტიის წევრები, რომლებსაც ჩვენ გაუწიეთ რეკომენდაცია, არც ერთი არ გააწევრიანეს პარტიაში. აბსოლუტური დისკრიმინაცია აქვთ პარტიული ნიშნით. მინდა გითხრათ, რომ “ქართულ ოცნებაში” პარტიაში გაწევრიანებული არიან ადამიანები, რომლებიც სხვა პარტიის წევრები არიან. როდესაც პარტიის დამფუძნებელი სხდომა გაიმართა, ერთი იყო ადგილობრივი ფორუმის ორგანიზაციის ხელმძღვანელი. ასევე იყო ადამიანი, რომელიც არჩევნების დღეს იყო სვანეთში და ერთ-ერთ რაიონში ეხმარებოდა “ნაციონალური მოძრაობის” კანდიდატს.
ასევე არიან ქალბატონები, რომლებიც არჩევნების პერიოდში ესპანეთში იყვნენ, ახლა ჩამოვიდნენ და უცებ გახდნენ “ქართული ოცნების” მხარდამჭერები. ადამიანები, რომლებიც წვიმაში და ტალახში სოფელ-სოფელ დადიოდნენ, დამცირებას და შევიწროვებას იტანდნენ, თითქმის 90%, პარტიული სიის მიღმა დატოვეს. 10 ზონის ხელმძღვანელიდან მხოლოდ 3 ადამიანია პარტიის წევრი, დანარჩენი _ 7, ვითომ არც არსებობდა ბუნებაში. ჩვენთან არ ყოფილა ისეთი აქციები და გამოსვლები როგორიც რუსთავში იყო, თუმცა მოსახლეობის გაღიზიანებამ გარკვეულ პიკს მიაღწია. ხალხი რომ არ გაჩერდება, ამას ვერ ხვდება ვერც გელა ხუციშვილი და ვერც მისი მფარველები”.
“გურია ნიუსის” კითხვაზე, რამდენად ეთანხმება, რომ აქციის მონაწილეები მზია ცოფურაშვილი და ლელა გოგოლაური გელა ხუციშვილს უშიშროების აგენტობაში ადანაშაულებენ, მამუკა არეშიძე პასუხობს:
“მე არ შემიძლია ეს დავამტკიცო, მაგრამ, იქ იყო უშიშროების პოლკოვნიკი, რომელიც ახლა დაინიშნა მოადგილედ. ვისთან მიდიოდა, ვისთან მიჰქონდა ინფორმაცია?… იქ არის ქალბატონი, რომელიც შტაბში მუშაობდა და ყოველ საღამოს ადგილობრივი პოლიციის უფროსთან მიჰქონდა ინფორმაცია… გელაზე პირდაპირ არ შემიძლია თქმა, მაგრამ, პრინციპში არის ორი სპეცსამსახურის ოფიცერი, ერთი არის გამგებელი, მეორე _ გამგებლის მოადგილე. კარგად იციან ტექნოლოგია. ავრცელებენ ჭორებს, თითქოს, მამუკა არეშიძემ არჩევნები ფეიქრიშვილს 1 000 000 აშშ დოლარად მიყიდა და “ქართული ოცნებიდან” არის გარიცხული.”
