გასული კვირის ოთხშაბათს, თბილისში, პოლიტიკური გაერთიანება “ეროვნული ფორუმის” მორიგი ყრილობა გაიმართა, სადაც პარტიის ლიდერებმა კახა შარტავამ, გუბაზ სანიკიძემ, ნოდარ ჯავახიშვილმა და რევაზ შავიშვილმა 2008-2011 წლებში გაწეული საქმიანობისა და სამომავლო ამოცანების შესახებ ისაუბრეს.
ოზურგეთიდან პარტიის ყროლობაზე შოთა გოგიბერიძე და პარტიის ადგილობრივი ორგანიზაციის ბიუროს წევრები იმყოფებოდნენ. გოგიბერიძის თქმით, ქართული პოლიტიკურ სივრცეში “ეროვნული ფორუმი” ერთ-ერთ ყველაზე ახალგაზრდა პოლიტიკური პარტიაა, თუმცა, ამ მცირე პერიოდში, ის დამკვიდრდა, როგორც ორგანიზებული, ხალხმრავალი, მაღალრეიტინგული, ეროვნულ ღირებულებებზე დაფუძნებული საყოველთაოდ ანგარიშგასაწევი პოლიტიკური ორგანიზაცია:
_ ყრილობას, ქვეყნის მასშტაბით, პარტიაში გაწევრიანებული 8 000 ადამიანი და პარტიის წევრობის 8 500 კანდიდატი დაესწრო, _ თქვა “გურია ნიუსთან” საუბარში შოთა გოგიბერიძემ, _ მომხსენებლებმა ყრილობაზე ისაუბრეს პარტიის განვლილ ეტაპზე და აღნიშნეს, რომ 2009 წლის 9 აპრილის აქციის ორგანიზატორთა მიმართ, ჩვენი პარტიის თანადგომამ, ხალხმრავლობა და სიმძაფრე შესძინა აქციის მიმდინარეობას. თავისუფლების მოედანზე დაბანაკებული, დისციპლინით, წესრიგითა და ორგანიზებულობით გამორჩეული “ფორუმელების” მიმართ მოსახლეობის სიმპათიებმა განაპირობა ის, რომ იმ პერიოდში თავისუფლების მოედანს “ფორუმის მოედანს” ეძახდნენ. ამ პროცესებიდან მოკლე დროში ,საზოგადოება კიდევ ერთხელ დარწმუნდა ჩვენი ორგანიზაციის ლიდერთა ზნეობრივ სიმართლეში, როცა პრინციპული პოზიცია დაიჭირეს 26 მაისს საქართველოს ეროვნულ სტადიონზე მიმდინარე აქციის მიმართ, სადაც გააჟღერეს მოწოდება აქციის ორგანიზატორთა, მონაწილეთა და მთლიანად მოსახლეობისადმი, რათა საპროტესტო საქმიანობა გაშლილიყო მთელ საქართველოში. მიუხედავად იმისა, რომ სხვა ოპოზიციური პარტიები არ შეუერთდნენ ამ ინიციატივას, რეგიონებში მოსახლეობასთან შეხვედრები მარტო განახორციელეს. ჩვენი აქტივობით შეცბუნებულმა ხელისუფლებამ პარალელური პროცესი წამოიწყო სლოგანით: “ნაციონალი პარლამენტარები _ რეგიონებში.”
დადებითი გამოხმაურება მოჰყვა ჩვენ მიერ ადგილობრივი არჩევნების ბოიკოტირებას, რადგანაც ვითხოვდით რეალურ თვითმმართველობასა და სამართლიან საარჩევნო გარემოს, წინააღმდეგ შემთხვევაში კი, აზრი ეკარგებოდა არჩევნებში მონაწილეობას. მოსახლეობასთან შეხვედრებმა ცხადჰყო, რომ საზოგადოების მთავარი შეკვეთა გახლდათ ქვეყანაში პოლიტიკური ცვლილებების გახორციელება, რისი მიღწევაც შეუძლებელია სამართლიანი საარჩევნო გარემოს გარეშე. ამიტომაც კონსტიტუციის მოთხოვნის გათვალისწინებით, შევაგროვეთ ხელმოწერები საარჩევნო კანონმდებლობის შეცვლასთან დაკავშირებით და საქართველოს პარლამენტში წარვადგინეთ 160 000 ხელმოწერა, თუმცა, იგივე კონსტიტუციით ამისთვის 30 000 ხელმოწერა იყო საკმარისი. შეგახსენებთ, ამ ხელმოწერებში ჩვენი რეგიონის მოსახლეობის 5 000-მდე ხელმოწერაც შედიოდა.
ასე დაიწყო ჩვენი პარტიის ინიცირებით ქვეყანაში, ახალი და როგორც მიგვაჩნია, სწორი პოლიტიკური პროცესი _ ბრძოლა სამართლიანი საარჩევნო გარემოსთვის.
ამომრჩეველთა რეალური რაოდენობის დაფიქსირება, არჩევნების გაყალბების “ნაციონალური” ტექნოლოგიების მაქსიმალური დაბლოკვა, მედიასივრცის გახსნა, სახელისუფლებო რესურსის, ძალოვნების, “ზონდერების” ფაქტორის განეიტრალება საშუალებას მოგვცემს ქვეყანაში სამართლიანი არჩევნების ჩატარებისა და რეალური დემოკრატიული ფასეულობების დამკვიდრებისთვის. ამ მიზნის მიღწევას კი ქართული ოპოზიციური სპექტრის მაქსიმალური ერთიანობა და სამოქალაქო საზოგადოების პასუხისმგებლობით გამსჭვალული ქმედებები ესაჭიროება. ერთიანი ბრძოლა აუცილებლად მოიტანს შედეგს. ჩვენ მიერ უკვე გადადგმულია სერიოზული ნაბიჯები ამ ერთიანობისკენ _ მუშაობს ე.წ. “რვიანი”, 8 პარტიის გაერთიანებული ბირთვი ხელისუფლებასთან მოლაპარაკებებისთვის.
ჩვენ პარტიას შემოუერთდა ტრადიციონალისტთა პარტია და ქალთა პარტია, თუმცა, ამ სამეულმა სახელწოდებად კვლავ “ეროვნული ფორუმი” დატოვა, _ გვითხრა შოთა გოგიბერიძემ.
ყრილობის დასასრულს, ჩატარდა პარტიული არჩევნები, “ფორუმელების” გადაწყვეტილებით, პარტიის თავმჯდომარედ არჩეული იქნა კახაბერ შარტავა _ ის უკვე მეორედ გახდა პარტიის ხელმძღვანელი.
