რამდენიმე წუთის წინ ოზურგეთში, “ქართული პარტიის” ოზურგეთის რაიონული ორგანიზაციის დამფუძნებელი კონფერენცია დასრულდა. პარტიის ლიდერებმა სოზარ სუბარმა, ეროსი კიწმარიშვილმა და სოფიო ხორგუანმა მომავალი გეგმებსა და ხელისუფლების კრიტიკაზე გააკეთეს აქცენტი. შეხვედრაზე ასევე უნდა ყოფილიყო ლევან გაჩეჩილაძე, მაგრამ, მისი თანაპარტიელები თქმით, ის ჯანმრთელობის გაუარესების გამო ვერ ჩამოვიდა გურიაში.
შეხვედრა დღის 2 საათზე დაიწყო. დაწყებამდე ადგილობრივი ჟურნალისტებს პარტიის წარმომადგენელმა გოჩა გორდელაძემ შეგვატყობინა, რომ დასწრების უფლება გვაქვს (?!). მანამდე ჩვენთვის უცნობი იყო, დავესწრებოდით თუ არა კონფერენციას.
ლიდერების გამოსვლა მეტად მძაფრი და ემოციური იყო. მათი თქმით, გაჩნდა ცვლილებების საოცარი წყურვილი, თუმცა, საზოგადოებაში არის შიშის სინდრომი და ნიჰილიზმი: _ დღეს ყველაზე კომფორტული თვითმფრინავი ჰყავს პრეზიდენტს. რაში მიდის ჩვენი ფული, რომელიც ქვეყნის მშენებლობის მაგივრად, მათ კომფორტს ხმარდება, _ თქვა პარტიის ერთ-ერთმა ლიდერმა სოზარ სუბარმა.
მისი თქმით, ქვეყანაში მოისპო განათლება, ჯანდაცვის სისტემა, მოსახლეობის უმრავლესობა უმუშევარია და ხელისუფლება 20-ლარიან ვაუჩერებს ურიგებს ხალხს.
ეროსი კიწმარიშვილმა საუბარი რუსულ-ქართულ ურთიერთობებზე დაიწყო. მისი თქმით, ჯერ კიდევ არსებობს რუსეთთან ურთიერთობის აღდგენისა და რუსული ბაზრის დაბრუნების პერსპექტივა:
_ გპირდებით, მოვახერხებთ ურთიერთობების ნორმალიზაციას და არანაირად არ ვიქნებით რუსების მონები. ყველა რეგიონში, ყველა რაიონში გავაკეთებთ მიკრო საინვესტიციო მოკვლევას და ზუსტად გვეცოდინება, რა უნდა გაკეთდეს ამა თუ იმ სოფელში, _ აღნიშნა თავის გამოსვლაში კიწმარიშვილმა.
ოპოზიციური პარტიის ლიდერებმა უპასუხეს მრავალრიცხოვან შეკითხვებს. დარბაზში ნაჩვენები იყო “ქართული პარტიის” ახალგაზრდული ორგანიზაციის მიერ გადაღებული კლიპიც, რომელშიც 7 ნოემბრის, სანდრო გირგვლიანის, ბუტა რობაქიძის ტრაგედიის ამსახველი კადრები იყო. კლიპს რეფრენად გასდევდა, რომ სააკაშვილის დრო ამოიწურა!
ოზურგეთში, “ქართულ პარტიას” გოჩა გორდელაძე უხელმძღვანელებს.
