ბახვი ჰესის მრჩეველთა საბჭოს წევრებმა სამშენებლო მოედანი მოინახულეს

„ნამდვილად არ მეგონა, თუ უკვე ამ დონეზე იქნებოდა წინ წასული, პროფესიულად ძალიან კარგად შესრულებული მშენებლობა. ეს ერთი შეხედვითაც ჩანს, რაც ნებისმიერ დაინტერესებულ ვიზიტორს საკუთარი თვალით შეუძლია ნახოს. ყველაზე მნიშვნელოვანი ისაა, რომ მონაკვეთი, სადაც აქტიური სამშენებლო სამუშაოები მიმდინარეობს, არაა მასშტაბური _ ვშიშობდი, რომ გაცილებით დიდი ტერიტორია იქნებოდა მოცული, მაგრამ მშენებლობას თვალნათლივ ეტყობა, რომ პროექტის მენეჯერები ცდილობენ მაქსიმალურად დაზოგონ გარემო, თავიდან აიცილონ ზიანი ან შეარბილონ ის.

ბევრი რამაა ნაფიქრი და დაგეგმილი ამისთვის პროექტის დასრულების ეტაპზეც. ამ პროცესის მონიტორინგშიც აქტიურად იქნება ჩართული მრჩეველთა საბჭო“, – განაცხადა ია მამალაძემ, “გურია ნიუსის“ დამფუძნებელმა და ბახვი ჰესის მრჩეველთა საბჭოს წევრმა.

„ჩვენი პროგრამა მაქსიმუმი, წლის ბოლოსთვის სამივე პროექტის მშენებლობის დასრულებაა. ბახვი 2 ბ როგორც ნახეთ, დასრულებულია უკვე, ბახვი 2 ა აგვისტოს ბოლოს დასრულდება. დაგვრჩება ყველაზე რთული პროექტი, ბახვი 1 ჰესი, რომელიც ძალიან დიდი სურვილი გვაქვს, რომ დეკემბრის ბოლომდე დავასრულოთ“, – განაცხადა არჩილ ძნელაძემ, ბახვი ჰესის ტექნიკურმა დირექტორმა.

სამშენებლო პერიმეტრის დათვალიერების შემდეგ მრჩეველთა საბჭოს წევრები სოფელ უკანავაში, სამშენებლო ბანაკში დაბრუნდნენ, სადაც გაიმართა სამუშაო შეხვედრა.

გიორგი აბრამიშვილი, კომპანია ბახვი ჰესის დირექტორი:

„ძალიან ვაფასებთ მრჩეველთა საბჭოს თითოეული წევრის ჩართულობას. 2021 წლიდან დღემდე ჩვენ პრაქტიკულად ერთად მოვდივართ. ნაბიჯი არ გადაგვიდგამს თქვენს გარეშე. ერთმანეთს ალბათ ბევრი რამ ვასწავლეთ ამ დროის განმავლობაში. აუცილებლად მინდა მადლობა გადაგიხადოთ სწორედ ამ უანგარო ჩართულობისთვის. მჯერა, სულ მალე, თოთოეულ ჩართულ მხარეს ექნება საშუალება ამაყად თქვას, მე ავაშენე ბახვი ჰესი. მანამდე კი, დღეს, ჩვენ ვამბობთ, რომ ჩვენ, მენეჯმენტმა, შევასრულეთ დანაპირები და ვაშენებთ ისე, როგორც დაგპირდით, ევროპული სტანდარტებით, ვზრუნავთ ბუნებაზე, ვზრუნავთ ადამიანებზე და წვლილი შეგვაქვს რეგიონის განვითარებაში. ჩვენი გარემოსდაცვითი სამოქმედო გეგმა, რომელსაც ზედმიწევნით ვასრულებთ, სოციალური პროექტები, შრომის უსაფრთხოება, მშენებლობის ხარისხი ამისი მაგალითია“.

სამუშაო შეხვედრის ფარგლებში მრჩეველთა საბჭოს წევრები დეტალურად გაეცნენ როგორც მშენებლობის მიმდინარეობას, ასევე, გარემოსდაცვითი და სოციალური პროექტების აღსრულებას, მოისმინეს შრომის უსაფრთხოებისა და ჯანმრთელობის სამსახურის პრეზენტაცია და გამჭვირვალობის, კომუნიკაციის და ჩართულობის ანგარიში.

ბახვი ჰესის პროექტზე დასაქმების კომპონენტის ნაწილში დანაპირები პირნალთლად არის შესრულებული, რაც გულისხმობს ადგილობრივი მოსახლეობის პრიორიტეტულად დასაქმებას. ამჟამად სამ მოედანზე დასაქმებულია 200 – ზე მეტი ადამიანი, საიდანაც 81 არის ადგილობრივი მოსახელე.  კომპანია ასევე, პრიორიტეტს ანიჭებს ადგილობრივებს, როცა ესაჭიროება მძიმე თუ მსუბუქი ტექნიკის ქირაობა, მომსახურების თუ გარკვეული პროდუქტების შეძენა.

მრჩეველთა საბჭოს წლის პირველი სხდომის ფარგლებში, საბჭოს წევრებთან შეთანხმდა მათი 2025 წლის ჩართულობის პროგრამა, რომელიც პირველ რიგში თითოეული საბჭოს წევრის მეტ ინფორმირებულობას ითვალისწინებს.

#ჩვენვასრულებთდანაპირებს