“გარკვეული ძალები ცდილობენ, საკრებულოსა და გამგეობის კომპეტენციაში ჩაერიონ”

რაც 5 აპრილს უკვე მიღებული და დამტკიცებულ იქნა საკრებულოს მიერ. გამგებლის მოვალეობის შემსრულებელს, ზაზა ურუშაძეს ჩვენთან საუბარში არა ერთხელ უთქვამს, რომ მოხდება ცვლილებები, მაგრამ ეს არ იქნება უკანონო და ტოტალური. თუმცა, იმასაც დასძენდა, რომ შეიცვლება თითქმის ყველა სამსახურის უფროსები, გათვალისწინებით მისი გამოცდილებისა.

5 აპრილის შემდეგ, ცვლილებების მოლოდინშია გამგეობა _ ვინ წავა და ვინ დარჩება, ჯერჯერობით, პრესასთან არავინ ამბობს. ჩვენ შევეცადეთ ინფორმაცია გამგებლის მოვალეობის შემსრულებლის მოადგილისგან, ვახტანგ ზენაიშვილისგან მოგვეპოვებინა:

_ ბატონო ვახტანგ, ვიცით, რომ საკრებულომ მიიღო დადგენილება სტრუქტურულ ცვლილებებთან დაკავშირებით. რა ხდება ლანჩხუთის გამგეობაში?

_ პირველი ოქტომბრის შემდეგ მოსახლეობა ელოდებოდა ცვლილებებს და ჩვენ ვალდებული ვართ, ეს გავაკეთოთ. რამდენი პროცენტით და როგორ მოხდება, ამაზე არ ვართ ჩამოყალიბებული, წინასწარ ვერ განსაზღვრავ. ჩვენ არ გვინდა ამ საკითხებში შეცდომა დავუშვათ, არ გვინდა, რომ კადრებზე, რომლებიც არიან გამოცდილები და იციან თავისი საქმე, ხელაღებით ვთქვათ უარი. რაც შეეხება პრესსამსახურს, თითქმის გადაწყვეტილია, რომ ამ საქმეს გაუძღვება მაკა სულაბერიძე. საკრებულოსაც შევუთანხმებთ ამ საკითხებს. მინდა საზოგადოებამ იცოდეს, რომ ჩვენ არ ვართ მარტო ამ საქმეში ჩართული და გადაწყვეტილების მიღებაში საკრებულო და გამგეობა ვთანამშრომლობთ.

_ რა მოხდება აპარატის უფროსის _ ლია იმნაძისა და ფინანსური საკითხების ხელმძღვანელის _ როლანდ ლაშხიას შემთხვევაში?

_ ფორმალურად იქნება ასე _ ყველა იქნება დათხოვნილი და შემდეგ დაინიშნება ახალი კადრები. რა თქმა უნდა, ძველი კადრებიც იქნებიან, რომლებიც მუშაობენ ამჟამად. როგორ წავა საქმე, ეს პროცესში გამოჩნდება. თან ის მომენტია, რომ ბატონი ზაზა არ არის ადგილზე და მე გპასუხობთ მის ნაცვლად _ არ მინდა, იმაზე მეტი ავიღო ჩემ თავზე, რაც მაკისრია. თუმცა, იმაშიც გულწრფელი ვარ, რასაც ვამბობ, რომ გადაწყვეტილი ჯერ არაფერი არ არის.

_ გამგეობის აპარატში დღესაც მუშაობენ ის კადრები, რომლებიც აქტიურად იყვნენ ჩართული წინასაარჩევნო პროცესებში. თქვენ ყველა იმ ადამიანის შესახებ ფლობთ ინფორმაციას. რა ბედი ელით მათ?

_ მე ვფიქრობ, რომ ვინც სახელმწიფო სამსახურს იყენებდა პარტიული მიზნებისთვის, ასეთი ადამიანები თანამდებობებზე არ უნდა დარჩნენ, მაგრამ თუ ვინმე დარჩება, როგორ მოხდება ეს, ხალხი აუცილებლად გაიგებს _ რა ფასად დარჩა და ვისი მხარდაჭერით.

_ ვინმე ხომ არ ერევა გამგეობისა და საკრებულოს კომპეტენციაში?

_ იყო ამის მცდელობები, სხვადასხვა კუთხით. საკრებულო მყავს მხედველობაში. აი, მაგალითად, კახაბერ ასკურავა ზაზა ურუშაძემ გაათავისუფლა დაკავებული თანამდებობიდან. ამ დღეებში ჩემთვის გახდა ცნობილი, რომ საკრებულო ცდილობს, თავშესაფარი მოუძებნოს მას საკრებულოში სპეციალისტად ან მრჩევლად. ახლავე ვამბობ _ საკრებულო თუ ასეთ გადაწყვეტილებას მიიღებს, აგოს პასუხი საკუთარ გადაწყვეტილებაზე. ვგულისხმობ არა იურიდიულ პასუხისმგებლობას, არამედ პოლიტიკურ პასუხისმგებლობას. ლანჩხუთის საზოგადოებასა და ამომრჩევლისთვის არის პასუხი გასაცემი, რომელთა უმრავლესობამ უარი უთხრა ასკურავას.

_ აპირებთ თუ არა ზომების მიღებას ამ შემთხვევაში? გასაგებია, რომ საკრებულოს კომპეტენციაში ვერ ჩაერევით.

_ ჩვენ ამის არანაირი იურიდიული მექანიზმები არ გაგვაჩნია და შეგვიძლია ვთქვათ მხოლოდ ჩვენი აზრი, რომ ეს არის ამომრჩევლისთვის შეურაცხყოფის მიყენება. მე არ მგონია, საკრებულომ ასეთი გადაწყვეტილება მიიღოს, მაგრამ გარკვეული ძალები ცდილობენ, რომ ეს გაიტანონ.

ვინ იგულისხმებოდა გარკვეულ ძალებში, ვახტანგ ზენაიშვილს არ დაუკონკრეტებია.