ფაქტია, რომ ომის დროს ორივე მხარემ დაუშვა ადამიანის უფლებების დარღვევა,” _ ასე შეაფასა ვროკავშირის სპეციალურმა წარმომადგენელმა თომას ჰამარბერგმა დღეს მედია საშუალებებთან შეხვედრის დროს 2008 წლის ომის საკითხს და ყველას ვინც ამ საკითხზე საუბრობს რეკომენდაცია მისცა.
“ყველას, ვინც 2008 წლის აგვისტოს ომის მოვლენებზე საუბრობს, რეკომენდაცია მივცემ, წაიკითხონ ტალიავინის დასკვნა, სადაც გარკვევით წერია, რა მოხდა აგვისტოს ომის დროს.”
ევროკავშირის ექსპერტის აზრით, ომის თემის წამოწევა, საქართველოში ჰააგის სისხლის სამართლის საერთაშორისო სასამართლოს წევრების ჩამოსვლას უკავშირდება.
“ერთი საკითხი მინდა ვახსენო, რომელიც ამ წუთში საკმაოდ მნიშვნელოვანია _ ახლა პრესაში და მასმედიაში წამოიწია 2008 წლის ომის საკითხმა. ამ კონტექსტში რაღაც გაუგებრობაა, არასწორი გაგება. ვფიქრობ, დისკუსია და წამოწევა მას შემდეგ მოხდა, რაც საქართველოში ჩამოსული იყო სისხლის სამართლის საერთაშორისო სასამართლოს წევრები ჰააგიდან.
2008 წლის ომის შემდეგ, ორ თვეში, როგორც ჰააგის სისხლის სამართლის სასამართლოში, ასევე სტრასბურგის ადამიანის უფლებების სასამართლოში, შემოვიდა საჩივრები, რომელიც ომის დროს ადამიანის უფლებების დარღვევას ეხებოდა. არა მხოლოდ სამოქალაქო მოსახლეობის უფლებების დარღვევას, ასევე ეხებოდა ტყვეების უფლებების დარღვევას. სწორედ ამ საჩივრების საფუძველზე ჰააგის და სტრასბურგის სასამართლომ ამ დანაშაულების გამოძიების პროცესი დაიწყო. მაგრამ, ეს დანაშაულები ეხება ადამიანის უფლებების დარღვევას და ასევე, ომის დანაშაულებს. იკვლევენ სიტუაციას. ჰქონდა თუ არა საქართველოში ომის დროს ასეთ დანაშაულს ადგილი და ასევე შესაბამის დეტალებს. ფაქტობრივად, ეს ორი სასამართლო შეისწავლის საკითხს, ჰქონდა თუ არა ეთნიკურ წმენდას ადგილი; ჰქონდა თუ არა წამებას ადგილი; ჰქონდა თუ არა უხეშ და არასათანადო მოპყრობას ადგილი და არამც და არამც არ შეისწავლიან იმ საკითხს, როგორ დაიწყო ომი, ან ვინ დაიწყო ომი. ეს მათ ამ ეტაპზე არ აინტერესებთ და საერთოდ ეს მათი მანდატი არ არის. ეს საკითხები შესწავლილი იქნა ევროკავშირის დავალებით სპეციალური კომისიის მიერ შვეიცარიელი დიპლომატი ქალბატონის ჰაიდი ტალიავინის მიერ. ამიტომ ჩემი რჩევა-რეკომენდაცია იქნება დაუბრუნდეთ ტალიავინის ანგარიშს. ძალიან გთხოვთ, წაიკითხეთ სრული ანგარიშის ტექსტი. ეს არის კომისია, რომელიც საერთაშორისოდ აღიარებულია. ზუსტად აქ არის ნაჩვენები რა გაკეთდა იმისთვის, რომ თავიდან აცილებულიყო ეს ომი. მედიაში, პრესაშიც და სხვა მხარეებსაც მოჰყავთ არასწორი ინტერპრეტაცია,” _ განაცხადა ჰამარბერგმა.
