რაც სასურსათო ბაზარზე ფასებმა კატასტროფულად იმატა, სოციალური ფონი კიდევ უფრო დამძიმდა. ჩოხატაურის მუნიციპალიტეტში, სადაც მოსახლეობის დიდი ნაწილი ან უმუშევარია, ან მხოლოდ პენსიების და სოციალური დახმარებების იმედადაა დარჩენილი, არსებობა განსაკუთრებით ძნელი გახდა. საქართველოს მთავრობამ “გულთან მიიტანა” მოსახლეობის გასაჭირი, მძიმე ყოფის შესამსუბუქებლად აქცია _ “ვაჩუქოთ ერთმანეთს ვაუჩერი” მოიგონა და ამ ფორმით ხალხის გულის მოგებაც გადაწყვიტა.
თებერვალში დარიგებულ ელექტროენერგიის 20-ლარიან ვაუჩერს, მალე 30-ლარიანი სასურსათო ვაუჩერი მოჰყვა. ვაუჩერების განაღდების პროცესი, მართალია, მძიმე და ხანგრძლივი პროცესი აღმოჩნდა, მაგრამ “ჩიტი ბრდღვნად ღირდა”. მერე რა, რომ ბანკში “საჭმლის ვაუჩერის” განაღდების მომლოდინე ხალხი ჯერ კიდევ ბლომადაა _ ხომ აიღებენ, როცა იქნება?!
იმის გათვალისწინებით, თუ რა ფასებია პირველადი მოთხოვნილების საკვებ პროდუქტებზე, ადვილი მისახვედრია, რამდენ დღეს გამოკვებავს ეს თანხა ოჯახს (ან საერთოდ თუ გამოკვებავს).
მისასალმებელია, რომ აქციაში _ “ვაჩუქოთ ერთმანეთს ვაუჩერები”, მონაწილეობა “გულკეთილმა” ჩინოვნიკებმაც მიიღეს და საკუთარი ვაუჩერი განსაკუთრებით გაჭირვებულ ოჯახებს საჩუქრად გადასცეს.
იმის გასარკვევად, თუ როგორ შეავსებს თითოეული ოჯახის “სასურსათო კალათას” 30 ლარი, კვირას, ჩოხატაურის საკოლმეურნეო ბაზარს ვეწვიეთ და ფასებიც გულდასმით გამოვიკითხეთ _ ჩვენი ანგარიშით, ოჯახი თავის გატანას ორ დღეს მაინც მოახერხებს.
ბაზარში კი ასეთი ფასებია: 1 კილოგრამი კარტოფილი _ 1,50 ლარი; 1 კილოგრამი კომბოსტო _ 1,50; 1 კილოგრამი ლობიო _ 5 ლარი; 1 კილოგრამი ხახვი _ 1,50 ლარი; 1 კილოგრამი ნიორი _ 8 ლარი, 1 კილოგრამი ყველი _ 6 ლარი; 1 კილოგრამი ხორცი _ 7 ლარი.
საქმეში გართულებს, ხანში შესული მამაკაცის ხმა შემოგვესმა: “ეტყობა მთავრობა გვამოწმებს, მათემატიკა თუ იციან კარგადო. რაფერ ვამყოფინო ყველაფერს აი 30 ლარი?!”. “შენ კიდო რა გიჭირს, აგერ მე ვიკითხო, მაი ფული გზაში სიარულს რომ მოვანდომე”, _ გამოეხმაურა ქალბატონი, რომელიც რამდენიმე დღის განმავლობაში, სოფელ კოხნარიდან, ბანკში ვაუჩერის გასანაღდებლად ჩამოდიოდა რაიონში. ზოგი ხუმრობის ხასიათზე დადგა _ “მთავრობა, ალბათ, კიდო მოაყოლებს რაცხას, აბა, ასე ხომ არ დაგვტიებენ გაჭირვებულ ხალხს?!”
გამართლდება თუ არა გურულების ვარაუდი, ამას მომავალი გვიჩვენებს, მანამდე კი ჩვეული იუმორით და ჯერ რომ არ ჩანს, იმ უკეთესი მომავლის იმედით გაიტანენ თავს.
