ენერგოვაუჩერის დარიგება ოზურგეთის მუნიციპალიტეტში ჯერ არ დასრულებულა. ხელისუფლებისგან დღემდე ისმის დაპირება, რომ ვაუჩერის გარეშე არც ერთი ოჯახი არ დარჩება.
ამჯერად განსხვავებულ კურიოზულ ფაქტზე გესაუბრებით: _ არაერთმა ოზურგეთელმა მოქალაქემ გვითხრა, რომ ენერგოვაუჩერზე თანხა დარიცხული არ აღმოჩნდა და მათ ფარატინა ქაღალდი შერჩათ ხელში.
_ ქალაქის რწმუნებულმა კახა მეგრელიშვილმა მითხრა, რომ ვაუჩერი მიიღო ჩემმა ოჯახმა, რომელიც გადმომცეს კიდეც. როგორც წესი, გასანაღდებლად მივმართე ენერგოკომპანიის რაიონულ განყოფილებას. მაგრამ აღმოჩნდა, რომ ვაუჩერზე თანხა დარიცხული არ იყო. ოპერატორმა მირჩია, ამ ეტაპზე ჩვეულებრივ დამეფარა გახარჯული ელექტროენერგიის თანხა. “ენერგო პრო-ჯორჯიას” რაიონულ ოფისში დამაიმედეს, რომ თანხა აუცილებლად დამერიცხება, _ გვითხრა ერთ-ერთმა ოზურგეთელმა ქალბატონმა.
“გურია ნიუსი” შეეცადა, გაეგო, რატომ არ დაერიცხა აბონენტს ვაუჩერზე თანხა და სოციალური მომსახურების გურიის საკოორდინაციო ცენტრის ხელმძღვანელის მოადგილეს ვანო გოგოლაშვილს მივმართეთ, რომელმაც გვიპასუხა, რომ მსგავს შემთხვევას გურიაში ადგილი არ ჰქონია:
_ მსგავს ფაქტს ნამდვილად არ ვიცნობ _ ასეთი ინფორმაციით ჩვენთან არავინ მოსულა. თქვენს მიერ ნახსენებ ქალბატონს ვურჩევ, აუცილებლად მოვიდეს, ელექტროენერგიის გადახდის ქვითარი მოიტანოს და დავეხმარებით ან გაირკვევა, რატომ არ დაერიცხა თანხა. ენერგოვაუჩერების გაცემა ცენტრალიზებულად მოხდა, ამაზე პასუხისმგებელი ენერგოკომპანიაც არის. აბონენტმა, რომელსაც მსგავსი პრობლემები აქვს, ჩვენს სამსახურთან ერთად, ადგილობრივ ენერგოკომპანიასაც უნდა მიმართოს, _ პასუხისმგებლობა ენერგო კომპანიაზეც გადაანაწილა გოგოლაშვილმა.
“გურია ნიუსი” შეეცადა, იგივე კითხვით მიემართა “ენერგო პრო-ჯორჯიას” ოზურგეთის სერვისცენტრისთვის. სამწუხაროდ, სამსახურში პასუხისმგებელი პირი არ აღმოჩნდა.
და ბოლოს, კიდევ ერთი კურიოზის შესახებ: როგორც ჩვენი წყარო ამბობს, გურიაში, ენერგოვაუჩერი 4 წლის წინ გარდაცვლილის ოჯახს მიუვიდა. ოჯახის წევრს გარდაცვლილის პირადობის მოწმობა მოსთხოვეს, ალბათ, გასანაღდებლად!!!
