იუსტიციის სამინიტროს აზრით, აღნიშნული სოციალური რეკლამების შეჩერება უნდა მოხდეს მხოლოდ მოცემულ საპარლამენტო შუალედურ არჩევნებზე. სამინისტროს აზრით, აღნიშნული რეკლამის შეჩერების ლეგიტიმური საფუძველი არ არსებობს, თუმცა ისინი მოცემულ შუალედურ არჩევნების შემთხევაში იზიარებენ კომისიის სამდივნოს პოზიციას.
“თავისუფალი და სამართლიანი არჩევნებისათვის უწყებათაშორისი კომისიის თავჯდომარე ეხმიანება საქართველოს მთავრობის მიერ საზოგადოებრივი მაუწყებლისა და რამდენიმე კერძო ტელევიზიის ეთერში სოციალური რეკლამის სტატუსით განთავსებულ რამდენიმე ვიდეო რგოლს, რომელიც საარჩევნო აგიტაციად შეიძლება იქნეს აღქმული.
სოფლის მეურნეობის სამინისტროს ვიდეორგოლები შეღავათიანი აგროსესხების შესახებ, ასევე განათლებისა და მეცნიერების სამინისტროს კლიპი 2013-2014 წლებში უფასო სახელმძღვანელოებით უზრუნველყოფის შესახებ მთავრობის მიერ განხორციელებული და მომავალში განსახორციელებელი პროექტების პოპულარიზაციას ისახავს მიზნად.
2012 წლის 1 ოქტომბრის საპარლამენტო არჩევნების წინ, ანალოგიურ ვითარებასთან დაკავშირებით კომისიას სადამკვირვებლო ორგანიზაცია საერთაშორისო გამჭვირვალეობამ მიმართა და საზოგადოებრივი მაუწყებლის ეთერში სოციალური რეკლამის სტატუსით გასული საქართველოს მთავრობის ზოგიერთი ვიდეო რგოლის კანონმდებლობასთან შესაბამისობის საკითხის შესწავლა ითხოვა.
აღნიშნულთან დაკავშირებით 2012 წლის 9 აგვისტოს უწყებათაშორისმა კომისიამ გამოსცა რეკომენდაცია, რომელშიც აღნიშნულია, რომ სახელმწიფო ინსტიტუტების მიერ გაწეული მომსახურების საარჩევნო აგიტაციისაგან გამიჯვნის თვალსაზრისით საარჩევნო კანონმდებლობა მნიშვნელოვან წინაპირობებს ქმნის: საარჩევნო კოდექსის თანახმად, წინასაარჩევნო პერიოდში სოციალურ რეკლამაში საარჩევნო სუბიექტების ან მათი საარჩევნო ნომრის გამოყენება აკრძალულია. კანონმდებლობა ასევე აწესებეს შეზღუდვას სახელმწიფო და ადგილობრივი ბიუჯეტის სახსრებით ისეთი ბეჭდური მასალის დამზადებაზე, რომელშიც ესა თუ ის საარჩევნო სუბიექტი ან არჩევნებში მონაწილეების რიგითი ნომერია ასახული. 9 აგვისტოს რეკომენდაციაში ასევე აღნიშნულია, რომ იმისდა მიუხედავად, რომ წინასაარჩევნო პერიოდში საზოგადოებრივი მაუწყებლის ეთერში გასულ ვიდეო-რგოლებში („ენერგოდამოუკიდებელი საქართველო“, „საქართველოს სტაბილური ენერგომომარაგება“, „დამზადებულია საქართველოში“, „მთავრობის 10 პუნქტიანი სამოქმედო გეგმა“, „30 ახალი საავადმყოფო 30 დღეში“, პროგრამა „ ასწავლე და ისწავლე საქართველოსთან ერთად“) არც საარჩევნო სუბიექტი, არც მისი საარჩევნო ნომერი არ ფიგურირებდა, არსებობდა საფრთხე, რომ სოციალური რეკლამის საარჩევნო აგიტაციასთან გაიგივება მომხდარიყო. სწორედ ამიტომ კომისიამ რეკომენდაციით მიმართა საქართველოს მთავრობასა და საზოგადოებრივ მაუწყებელს, წინასაარჩევნო პერიოდში სოციალური რეკლამის სტატუსით იმ ვიდეო რგოლების განთავსება შეეჩერებინათ, რომლებიც მთავრობის მიერ განხორციელებულ პროექტებს ასახავდა და შესაძლოა საარჩევნო რეკლამად ყოფილიყო აღქმული” _ აღნიშნულია ბოკერიას რეკომენდაციაში.
უწყებათაშორისი კომისიის თავჯდომარის აზრით, სწორედ ანალოგიურ ვითარებასთან გვაქვს საქმე სოფლის მეურნეობისა და განათლებისა და მეცნიერების სამინისტროების მიერ პარლამენტის შუალედური არჩევნების წინ ეთერში განთავსებული ვიდეო რგოლების შემთხვევაშიც.
ბოკერია მოუწოდებს საქართველოს მთავრობას, რომ წინასაარჩევნო პერიოდში შეაჩეროს მედიაში სოციალური რეკლამის სტატუსით იმ ვიდეო რგოლების განთავსება, რომლებიც მთავრობის მიერ განხორციელებულ ან განსახორციელებელ პროექტებს ასახავს და საარჩევნო რეკლამად აღქმის შესაძლებლობას იძლევა.
