ორგანიზაცია “თავისუფალი დემოკრატებმა” შიდა პარტიული შეხვედრა გამართეს, რომელზეც მედიის წარმომადგენლებს თავისუფლად დასწრების უფლება მოგვეცა. შეხვედრის დაწყებამდე, “ქართული ოცნების” წევრი, ნუგზარ ცინცაძე (უმცროსი) უცენზურო სიტყვებით მიმართავდა თავისუფალი დემოკრატების რაიონული ორგანიზაციის თავმჯდომარეს, ელგუჯა ჩხაიძეს, რომელიც მას შეკრებაზე დასწრების უფლება არ აძლევდა. საბოლოოდ, შეხვედრას ნუგზარ ცინცაძე (უმცროსი) არ დასწრებია.
სწორედ ამ შეხვედრამ ცხადყო, რომ კოალიციაში განხეთქილებაა, რის დაფარვას “დემოკრატიული საქართველოს” ხელმძღვანელობა არ ცდილობს.
შეხვედრაზე მიწვეული იყო რაიონის გამგებლის მოვალეობის შემსრულებელი ზაზა ურუშაძე. ელგუჯა ჩხაიძე შეეცადა აეხსნა, თუ რატომ არ იქნა დაშვებული შეხვედრაზე ნუგზარ ცინცაძე (უმცროსი): “აქ პარტიული აქტივია შეკრებილი. ის ადამიანები, რომლებიც თავიდანვე ჩართულნი იყვნენ “ქართული ოცნების” საქმიანობაში, დღესდღეობით ყველა ჩრდილში იმყოფება. ივნისის შემდეგ ასე ხდება _ “ქართულ ოცნებაში” გამოჩნდნენ მედროვეები და თავს მიიჩნევენ “ოცნების” ნამდვილ წევრებად, ჩვენ კი ყველა ჩრდილში აღმოვჩნდით. მომკითხავი არავინ აღმოჩნდა, რომ პარტია დაალაგოს და კოალიციურ რეჟიმში ვიმუშაოთ,” _ თქვა ელგუჯა ჩხაიძემ.
ამის შემდეგ ორგანიზაციის წევრებს ზაზა ურუშაძემ მიმართა: “ძალიან კარგია, რომ ეს გაცნობითი შეხვედრაა. მე ვეთანხმები ბატონ ბიძინას _ არ შეიძლება პატარა რაიონში მსგავსი რამ ხდებოდეს. მე ყველა შეხვედრაზე ვამბობ, რომ უნდა მიდიოდეს კოალიციური მუშაობა, რათა მოხდეს რაიონის მართვა. ისიც ვიცი, რომ თქვენ იყავით პირველი ძალა, ვინც ჩადგა ოპოზიციაში. დღეს ქვეყანაში არსებობს კოალიცია და სწორედ ამ კოალიციის ფარგლებში უნდა მოხდეს საქმეების გადაწყვეტა. ყველა პარტიაში არსებობს შეპარული ხალხი, ამიტომ უნდა ვიყოთ ყურადღებით და ეს ხალხი გამოვხშიროთ. რაც შეეხება წინა შეხვედრას, სადაც ჟურნალისტებს არ უშვებდნენ, მინდა ვთქვა, რომ ჩვენ ჟურნალისტებთან არაფერი არ უნდა დავმალოთ. ჩემთვის, ზაზა ურუშაძისთვის, მთავარია ურთიერთობა გვქონდეს ერთმანეთთან. ვიცი, რომ არის წინააღმდეგობები, მაგრამ ბატონ ელგუჯა ჩხაიძეს მინდა ვთხოვო, რომ იქნებ რამენაირად დავალაგოთ სიტუაცია ამ ხალხთან. პარტიებს შორის უკმაყოფილებას რაც შეეხება, ორი დღის წინ ჯერ ტელეფონით ვესაუბრე და მერე შევხვდი “ოცნების” ერთ-ერთ ლიდერს და ჩავაყენე საქმის კურსში იმის შესახებ, რაც ლანჩხუთში ხდება. მაისის დასაწყისში ჩამოვა ამ პარტიის ხელმძღვანელობა და გაირკვევა ყველაფერი. ეს ვისი ბრალია, ძალიან კარგად ვიცი, მაგრამ მე არც ერთი პარტიის წევრი არ ვარ _ რაიონის გამგებელი უნდა იყოს ამ სიტუაციიდან შორს. მე არავის არ ვანიჭებ უპირატესობას. ამიტომაც ჩავატარეთ პრაიმერები, რომელიც ზოგან სწორად ჩატარდა, ზოგან, შეიძლება, არასწორად, მაგრამ სწორედ ამიტომ მიეცათ რწმუნებულებს სამი თვე, რათა გამოავლინონ საკუთარი თავი.
რაც შეეხება დასაქმებას, მინდა გითხრათ, რომ ყველას გამგეობაში ვერ დავასაქმებთ. ვფიქრობთ საწარმოოს გახსნას. სოფლის მეურნეობის მინისტრი დამპირდა, რომ რაიონში ერთი წვენების ან საკონსერვო ქარხნის გახსნაზე დაგვეხმარებიან; გაზაფხულისთვის რაღაც მშენებლობებს დავიწყებთ. ასევე, დაგეხმარებით სესხების გაკეთებაში. ეკონომიკური სამსახური, რომელიც ახლა შეიქმნა, ყველას დაეხმარება იმის გარკვევაში, თუ როგორ მოხდება სესხების აღება. სოფლებშიც ჩამოვივლით და ამაში ხალხსაც გავარკვევთ.
რაც შეეხება საკადრო ცვლილებებს _ ძალიან მინდა, რომ ვინც სიტუაციის შეცვლაში მონაწილეობდა, დავასაქმოთ, მაგრამ ეს ასე იოლად არ ხდება _ სტრუქტურული ცვლილებები, რასაც გამგეობაში ვატარებთ, კანონიერია და ეს ცვლილებები გრძელდება.
ვაცხადებ, რომ კოალიციური რეჟიმიდან არ გავალ და ვიმედოვნებ, პარტიებს შორის ურთიერთობა მოგვარდება, რადგან “ნაციონალური მოძრაობა”, რომელიც ჩვენ გვებრძოდა, ისევ “კუდს იქნევს”, _ მიმართავდა შეკრებაზე მისულ ორგანიზაციის წევრებს ზაზა ურუშაძე.
ვახტანგ ზენაიშვილმა, რომელიც ზაზა ურუშაძის მოადგილე და ამავე დროს ორგანიზაცია “თავისუფალი დემოკრატების” პოლიტიკური მდივანია, შეხვედრის დასაწყისში მომხდარ ინციდენტზე ისაუბრა: “მე შორს ვარ იმ აზრისგან, რომ ნუგზარ ცინცაძე (უმცროსი) “ქართული ოცნების” სახეს წარმოადგენს. ეს ასე არ არის. ჩვენ პარტიასთან ჯანსაღი ურთიერთობა გვაქვს. “ქართული ოცნება” რაც უფრო მალე გათავისუფლდება ასეთი “ბალასტისგან”, მით უკეთესია პოლიტიკური პროცესებისთვის. რაც შეეხება კოალიციურ რეჟიმს, ამ რეჟიმის ერთგული დავრჩებით და არ გავალთ არავითარ შემთხვევაში, რაც პროვოკაციებიც არ უნდა მოაწყონ,” _ თქვა ზენაიშვილმა.
ბოლოს შეკრებილებს ისევ ზაზა ურუშაძემ მიმართა: “ცვლილებები რწმუნებულებს შორის სამი თვის შემდეგ აუცილებლად იქნება, რადგან რამდენიმე რწმუნებული საქმეს კარგად ვერ ართმევს თავს. ხანდახან ვიღებთ ისეთ გადაწყვეტილებას და სამსახურში ვნიშნავთ ისეთ კადრებს, ვინც არ იყო “ქართული ოცნების” წევრი, თუმცა, არის საქმის მცოდნე, რაც სწორია და ამის გამო არ მინდა წყენა გაჩნდეს ჩვენს შორის.
ჩემი მხრიდან, პარტიული ნიშნით არავის დავნიშნავ. პირობას გაძლევთ რომ უპირატესობას “ოცნების წევრს” ნამდვილად არ მივანიჭებ. ყველაფერი მოხდება კანონიერად,” _ პირობა მისცა ზაზა ურუშაძემ შეხვედრაზე მისულ ორგანიზაციის წევრებს.
