იგი საპარლამენტო უმრავლესობის ნაწილს “ნაციონალურ მოძრაობასთან” გარიგებაში ადანაშაულებს და ამბობს, რომ “მიმდინარეობს მოლაპარაკებები “ნაცმოძრაობის” კონტროლირებადი ბიზნესის მშვიდობიან გადანაწილებაზე. იმისთვის, რომ ცოტა ცხვირი “ამათაც” ჩააყოფინონ “ნაცმოძრაობის” 80%-იან კონტროლირებად ბიზნესში.”
“ქართული დასის” ლიდერი ჯონდი ბაღათურია “ნაციონალური მოძრაობის” პოლიტიკურ გადარჩენაში პარლამენტის თავმჯდომარეს დავით უსუფაშვილს სდებს ბრალს.
“ვგულისხმობ იმ ჯგუფს, პარტიას რომ ეძახიან თავისთავს, რომელიც ღიად და აშკარად აცხადებს, რომ მათი ამოცანაა “ნაცმოძრაობის” პოლიტიკური გადარჩენა. თუ პოლიტიკური გადარჩენაა, ეს ავტომატურად ნიშნავს, რომ პასუხისმგებლობიდანაც უნდა გადარჩეს, და ნაქურდალი ქონებაც შეინარჩუნოს. ამას ღიად აცხადებს პარლამენტის თავმჯდომარე.”
_ ბატონო ჯონდი, საკმაოდ რადიკალურ განცხადებებს აკეთებთ…
_ დიახ, მრჩება შთაბეჭდილება, რომ “ქართული ოცნება” გაერთო “ნაციონალურ მოძრაობასთან” კინკლაობით. დაავიწყდა, რომ ბევრი საქმე აქვს გასაკეთებელი. უფრო მეტიც, მე მრჩება შთაბეჭდილება, რომ ეს კინკლაობა სულაც არ არის ისეთი გულუბრყვილობით განპირობებული. ეს არის საჩვენებელი კინკლაობა ხალხის გასართობი და ამის უკან დგას “ნაციონალური მოძრაობის” პოლიტიკურად გადარჩენის სურვილი. რეალურად, ამას არც მალავს პარლამენტის თავმჯდომარე და რაღაც პოზიცია-ოპოზიციონერობანას თამაშს ემსგავსება. “ქართული ოცნება” დღეს არის ხელისუფლებაში და არა ოპოზიციაში.
ჩვენ, ხშირად ვისმენთ პარლამენტისგან რაღაც ქაღალდების აფრიალებას, რომ პრეზიდენტმა თავის რომელიღაც ფავორიტ ქალს, ან კაცს ბიუჯეტიდან “კულონი” უყიდა, სამაჯური უყიდა, ან წაიყვანა დასასვენებლად “საგულაოდ.” მაგრამ ეს შეიძლება გააკეთოს ოპოზიციამ, შენ ხელისუფალი რომ ხარ, საქმე უნდა აღძრა ამის წინააღმდეგ. მეორე წუთში გამოდიან და ლაპარაკობენ, აი ჩვენი პოლიტიკური ოპოზიცია ეს არის და.ა.შ. ამ საჩვენებელი კინკლაობით უმრავლესობის ერთი ნაწილია დაკავებული. მაგრამ, ამან განაპირობა, რომ სრული სტაგნაციაა სოციალურ-ეკონომიკურ სფეროში, ბიზნესი გაჩერებულია. ძირითადად ამას სათავეში პარლამენტის თავმჯდომარე და “რესპუბლიკური პარტია” უდგას.
“რესპუბლიკური პარტია” ნაცვლად იმისა, რომ რამეს აკეთებდეს, დაკავებულია ინტრიგებით ნაცვლად იმისა, რომ პოლიტიკური წნეხი აარიდონ სამართალდამცავ უწყებებს, უმრავლესობის ერთი ნაწილი, მაგალითად ვთქვი “რესპუბლიკელები” თორემ, სხვებიც არიან ამაში ჩართული, ინტრიგების ქსოვით არის დაკავებული.
ყველამ იცის, აჭარაში ღარიბაშვილის წინააღმდეგ რომელი პარტია აწყობდა მიტინგებს. ამიტომ, საზოგადოებამ უნდა იცოდეს, რომ ეს არის “რესპუბლიკური პარტია”, რომელიც ამ კონკრეტულ შემთხვევაში ღარიბაშვილთან არის დაპირისპირებული.
_ თქვენი განცხადება ალბათ “რესპუბლიკური პარტიის” განაწყენებას გამოიწვევს. რატომ მაინცდამაინც ეს პარტია, კოალიციაში დიდ ძალას წარმოადგენენ?
_ არ მგონია სიმართლემ დიდი განაწყენება გამოიწვიოს. თუ მაინცდამაინც ვინმეს რამე ეწყინება, ჩემს კოლეგებს კარგი კაბინეტები აქვთ, მაცივარი ექნებათ, ცივი წყალიც ექნებათ. გამოიღონ დალიონ, დაწყნარდებიან. ვინც აკეთებს, იმაზე ვლაპარაკობ. ჩემი აზრით ამას ჰქვია პოლიტიკური ინტრიგა და მეტი არაფერი. გახსოვთ ალბათ მიტინგი ღარიბაშვილის წინააღმდეგ, იქ მათი ხალხი იდგა. აქციაზე მათი ხელმძღვანელები იდგენენ. ესენი “საიას” აქეზებდნენ.
_ ადრე “ნაციონალური მოძრაობის” ოპოზიციაში იდექით. ახლა “ქართული ოცნების” ოპოზიციაში დგახართ?
_ მინდა გითხრათ, ჩვენთან მწიფდება აზრი, რომ “ქართულმა დასმა” გადაინაცვლოს ოპოზიციაში. ეს განაპირობა პოლიტიკურმა სპეკულაციამ. ჩემი კოლეგების ერთი ნაწილი, ამას ღიად უდგას სათავეში. მაგალითად პარლამენტის თავმჯდომარე, რომელიც ცდილობს, პოლიტიკურად გადაარჩინოს “ნაციონალური მოძრაობა” და ადგილი დაამკვიდრებინოს ოპოზიციაში. ძალიან ბევრი საკითხი დაგროვდა, რომელიც აღარ ითმენს ოპოზიციურ ჩაურევლობას. შემდეგ კვირას მივიღებთ გადაწყვეტილებას, რომელსაც საზოგადოებას გავაცნობთ. პატივისცემას ვინარჩუნებთ პრემიერ-მინისტრის მიმართ. ვხედავთ, რომ ცდილობს საქმე გაკეთდეს. მაგრამ, ერთი კაცი საქმეს ვერ გააკეთებს, თუ მას არ ჰყავს საკმარისი, ქმედითი და ეფექტური გუნდი პარლამენტში და პარლამენტს გარეთაც. ვხედავთ, რომ საქმე უბრალოდ შეიძლება გაფუჭდეს. ჩვენ აქამდე მხარს ვუჭერდით “ქართულ ოცნებას,” მაგრამ განვიხილავთ იმ საკითხს, რომ ჩვენ გადავინაცვლოთ ოპოზიციაში.
_ “ნაციონალურ მოძრაობამ” 19 აპრილს აქცია ჩაატარა. როგორ ფიქრობთ, არის თუ არა მოსალოდნელი შემდეგ აქციაზე 2-ჯერ მეტი მხარდამჭერებით მოვიდნენ?
_ მინდა გითხრათ, რომ “ნაციონალურ მოძრაობას” სამარცხვინო აქცია ჰქონდა. ეს აქცია რომ შემდგარიყო, ხელშეწყობა ხელისუფლებისგან ჰქონდა. მე ამას ვგულისხმობ, როცა ვლაპარაკობ, არის მცდელობა “ნაციონალური მოძრაობა” გადაარჩინონ პოლიტიკურად. ეს ავტომატურად ნიშნავს, რომ თავისი თავიც გადაირჩინონ, პასუხისგებაში არ იქნენ მიცემული და ნაქურდალი ქონების ნაწილი შეინარჩუნონ. მეორე ნაწილს კი, ალბათ თვალის პაჭუნის გზით, თავის გადამრჩენლებს გაუყოფენ.
მაქვს ინფორმაცია, რომ მიმდინარეობს შეთანხმება, “ნაციონალურმა მოძრაობამ” ამათაც გაუყოს ბიზნესი. დღეს ძალიან ადვილია “ნაციონალურ მოძრაობასთან” ოპონირება. როცა რაღაცას ვერ აკეთებ და ვინმე რამეს გააკრიტიკებს, ადვილია უთხრა, გახსოვს შენ რომ ეს გააკეთეო? გავიგეთ, რომ “ნაციონალური მოძრაობა” ცუდია, მაგრამ შენ ვინ ხარ, ეს უნდა გვითხრა. ხომ სწორია არა? ახალმა უმრავლესობამ თვითონ რისი მაქნისია ეს უნდა აჩვენოს საზოგადოებას. ჩვენ რას ვხედავთ, გამოდიან პარლამენტის წევრები, გამოიტანენ რაღაც დოკუმენტებს. ამხელენ პრეზიდენტს, ან პარლამენტის რომელიმე სხვა წევრს კორუფციაში. ამას მე ვაკეთებდი 150-ში ერთი რომ ვიყავი. ოჯახაშენებულო, შენ ახლა ხელისუფლებაში ხარ, პასუხისგებაში უნდა მისცე ადამიანი, რომელმაც ბიუჯეტის სახსრები პირადი მოთხოვნილებებისთვის გამოიყენა. აქ რა ხდება, ვხედავთ რომ მარტო ახალაიაა დაჭერილი. ახალია არ იყო პირველი რანგის პირი. შემსრულებელი იყო. ვიღაცა დავალებას ხომ აძლევდა შესასრულებლად.
_ ანუ თქვენ აქტიურ ოპონირებას გაუწევთ “ქართული ოცნებასაც” და ოპოზიციასაც?
_ იცით რა, ჩვენ ვგეგმავთ “ქართულ ოცნებასთან” ოპონირების რეჟიმში გადავიდეთ. მაგრამ “ნაციონალური მოძრაობა” ოპოზიცია არ არის. ერთმნიშვნელოვნად მინდა გითხრათ, რომ მათი 80% არის კრიმინალური ბანდის დამნაშავეები. ეს არის ჩვეულებრივი დამნაშავეთა ბანდა, რომელიც უნდა იქნას გასამართლებული. მათთან არც ოპონირებას ვგეგმავთ და არც თანამშრომლობას.
“ოცნებასთან,” რა თქმა უნდა, დასაშვებად მიგვაჩნია, რომ თემატურ საკითხებზე ვითანამშრომლოთ. პარლამენტის შიგნით არსებულ კონგლომერატის მიმართ აბსოლუტურად სხვადასხვა დამოკიდებულება მაქვს. არიან წესიერი ადამიანები საპარლამენტო უმრავლესობაში, რომლებსაც აქვთ სურვილი და უნარიც, საქმე გააკეთონ, მაგრამ ასეთ შექმნილ ვითარებაში, ალბათ გაუჭირდებათ მუშაობა და და უჭირთ.
დამნაშავის ადგილი არის სასამართლო დარბაზში. ის აუცილებლად უნდა იქნას გასამართლებული. პირდაპირ გეუბნებით, საპარლამენტო უმრავლესობის ერთი ნაწილი ხელს უწყობს, რომ “ნაციონალურმა მოძრაობამ” ოპოზიციაში ყოფნის მორალური უფლება მოიპოვოს და ქუჩაშიც დაიკავოს ოპოზიციის ადგილი.
ჯონდი ბაღათურიას მიერ დავით უსუფაშვილის და “რესპუბლიკური პარტიის” მისამართით გავრცელებულ ბრალდებებზე “გურია ნიუსი” პარლამენტის თავმჯდომარის პრესსამსახურს ნათია ახალაიას დაუკავშირდა.
“მე ვესაუბრე პარლამენტის თავმჯდომარეს. ჩვენ არ ვაკეთებთ კომენტარს. ანუ პარლამენტის თავმჯდომარე კომენტარს არ აკეთებს. თუ თქვენ გჭირდებათ პარტიიდან რამე, მაშინ პარტიის პრესსამსახურს დაუკავშირდით.” – განუცხადა “გურია ნიუსს” ახალაიამ.
