ჩოხატაურის მუნიციპალიტეტის საკრებულოს გამგეობის და რეგიონული ადმინისტრაციის წარმომადგენლების შეხვედრები ადგილობრივ მოსახლეობასთან გრძელდება. ეს შეხვედრები, როგორც ცნობილია, მიზნად ისახავს სოფლის პროგრამის ფარგლებში გამოყოფილი თანხის მიზნობრივად განაწილებას, პროგრამაში ადგილობრივი მოსახლეობის მაქსიმალურ ჩართულობას, ინფორმირებას და მათ მიერ დასახელებული პრიორიტეტების გათვალისწინებას.
სოფელ ჩხაკაურის მოსახლეობამ, პირველ ეტაპზე, ხელისუფლებას ყოფილი კლუბის აღდგენა მოსთხოვა, რომელსაც თავშეყრისა თუ სხვადასხვა ღონისძიებების ჩასატარებლად გამოიყენებენ. მოგვიანებით მათ ეს გადაწყვეტილება შეცვალეს, რადგან სოფლის ერთ-ერთი უბნის წარმომადგენლებმა სურვილი გამოთქვეს, გაკეთდეს შიდა სასოფლო ხიდი, რომელიც სოფელთან უსაფრთხოდ დააკავშირებს 15 ოჯახს. “ხიდი, რომლითაც დღეს ვსარგებლობთ, საცალფეხოა და ცუდ ამინდებში სიცოცხლისთვის საშიში ხდება. ამ ხიდით ყოველდღიურად სარგებლობენ სკოლის მოსწავლეები, ამიტომ ჩვენი უბანი ითხოვს ხიდის გამაგრებას”, _ აღნიშნეს შეკრებაზე ჩხაკაურელებმა.
საბოლოოდ, მოსახლეობის გადაწყვეტილებით, გაკეთდება ხიდი.
ბურნათის მოსახლეობამ მოითხოვა ადმინისტრაციული შენობის გარემონტება, მაგრამ აქ თავი იჩინა პრობლემამ, რადგან აღნიშნულ შენობაში ადრე სკოლა ფუნქციონირებდა და გაურკვეველია, ვის ბალანსზეა ადმინისტრაციული შენობა. ხელისუფლების წარმომადგენლები მოსახლეობას შეპირდნენ, რომ პრობლემის გარკვევის შემდეგ, მათ შესაძლებლობა მიეცემათ, თანხა მოიხმარონ მათივე გადაწყვეტილების მიხედვით.
სოფელ განახლების მოსახლეობას ადმინისტრაციული შენობის შეკეთება სურს, რომ თავშეყრის ადგილი ჰქონდეთ. შუაგანახლებაში მოსახლეობის ნაწილს საყანე ფართობის შეღობვა უნდა, ნაწილი შიდა გზების მოხრეშვას მოითხოვს, ზოგსაც ტრაქტორის შეძენა სურს. ამიტომ, მოსახლეობამ მოსაფიქრებლად და აზრთა შესაჯერებლად დრო ითხოვა.
კოხნარში სხვა სოფლებთან შედარებით, გაცილებით დიდი აზრთა სხვადასხვაობა წარმოიშვა _ ნაწილმა ადმინისტრაციული შენობის გარემონტების სურვილი გამოთქვა, მეორე ნაწილი ამბულატორიის შერემონტებას ითხოვს, მესამე ნაწილს კი წყლის გაყვანილობის მოწესრიგება მიაჩნია მთავარ პრობლემად, სხვებს სასაფლაოს შეღობვა სურთ. ასევე, გამოთქვა სურვილი, აშენდეს პატარა შენობა საყოფაცხოვრებო მომსახურებისთვის, სადაც განთავსდება საპარიკმახერო, სამკერვალო, მეწაღის ოთახი. საბოლოოდ შეთანხმდნენ, თანხა განაწილდეს და სოფელში შეიღობოს სპორტული მოედანი, მოიხრეშოს შიდა სასოფლო გზები და შეკეთდეს წყლის გაყვანილობის ქსელი.
