დავის საგანი იყო:
1. აბაშის მუნიციპალიტეტის გამგებლის დასანიშნად შექმნილი საკონკურსო-საატესტაციო კომისიის თავმჯდომარის მიერ დისკრიმინაციულ საფუძველზე შელახული ღირსების აღდგენა (დისკრიმინაცია პოლიტიკური შეხედულების გამო) და ბოდიშის მოხდა.
2. აბაშის მუნიციპალიტეტის საკრებულოს თავმჯდომარის ბრძანების #1-005 “აბაშის მუნიციპალიტეტის გამგებლის თანამდებობაზე დანიშვნის შესახებ” ბათილად ცნობა.
ამ პროცესზე სასაუბროდ “გურია ნიუსს” მოსარჩელე მხარის წარმომადგენელი ლევან ჩიქოვანი დაუკავშირდა.
ლევან ჩიქოვანი, ადვოკატი: _ სასამართლო პროცესი დაიწყო 12 საათზე მოსარჩელე მხარის მოწმის ნაირა ბენიძის ჩვენებით. მან დაკითხვისას სასამართლოს განუმარტა 2013 წლის 9 იანვრის საკრებულოს სხდომაზე არსებული დარღვევების შესახებ. შემდგომ დაიკითხა მოპასუხე მხარის წარმომადგენელი, საკრებულოს წევრი ბადრი ქობალავა. მან განაცხადა, რომ საკრებულოს სხდომაზე ორჯერ ხელის აწევით მისცა თანხმობა გამგებლად გოჩა ჭანტურიას დანიშვნას. თუმცა კენჭისყრაზე კანდიდატურა ერთხელ იქნა დაყენებული. სასამართლო პროცესზე სულ დაიკითხა 12 მოწმე, აქედან საკრებულოს 11 წევრი, მათ შორის ის პირებიც, ვინც პროტესტის ნიშნად 9 იანვრის საკრებულოს სხდომა დატოვეს.
_ ვინ იყვნენ ისინი, ვინც პროტესტის ნიშნად დატოვეს სხდომა?
_ საკრებულოს ფრაქცია „ქართული ოცნების“ წევრები. აღნიშნულ საქმეზე ეს იყო მე-12 სხდომა. ყოველ პროცესზე მტკიცდება სარჩელის საფუძვლიანობა, ხოლო მოპასუხე მხარის პოზიციები თანდათან სუსტდება.
ჩვენ სხდომაზე მოწმის სტატუსით გამოძახებულ ნაირა ბენიძეს დავუკავშირდით.
ნაირა ბენიძე: “საკრებულოს სხდომაზე დეპუტატებმა გამოცხადება დაიწყეს დილის 6 საათიდან, მაგრამ ვინაიდან საკრებულოს მთავარ შესასვლელთან გამაგრებულები ვიყავით მოშიმშილეები, საკრებულოს წევრებმა და სხდომაზე დასწრების მსურველებმა შენობაში უკანა, სახანძრო კიბის მეშვეობით შეაღწიეს. როგორც კი შევიტყვეთ, რომ მალულად აპირებდნენ სხდომის ჩატარებას, ვცადეთ კანონდარღვევის აღკვეთა და აქედან გამომდინარე, საკრებულოს სხდომა დაიწყო დილის 10 საათზე. საკრებულოს აპარატის უფროსმა გოჩა ხურცილავამ გადათვალა დეპუტატები და განაცხადა, რომ საკრებულოს სხდომას 26 წევრიდან ესწრებოდა 25 დეპუტატი და კვორუმი შედგაო. ამის შემდგომ, საკრებულოს თავმჯდომარემ ყოველგვარი წარდგენისა და ბიოგრაფიის გაცნობის გარეშე განაცხადა, დღეს გოჩა ჭანტურიას ვირჩევთო, რაზედაც ადვოკატმა როლანდი შონიამ უპასუხა, რომ სასამართლოში სარჩელი იყო შეტანილი და სანამ იქედან არ იქნებოდა გადაწყვეტილება მიღებული, არჩევნები ვერ ჩატარდებოდა. ჭანტურიას არჩევაზე ხელის აწევით განაცხადეს დეპუტატებმა თანხმობა. მე გოჩა ხურცილავასთან ერთად დავთვალე იმ დეპუტატთა რაოდენობა, რომლებმაც მისცეს ხმა ჭანტურიას არჩევას და ხმამაღლა განვაცხადე _10-ია, ხალხო, და ვთხოვე ტელევიზიების ოპერატორებს გადაეღოთ არჩევნების შედეგები. ჩემს ამ სიტყვებს დარბაზში ჩოჩქოლი მოჰყვა, ხურცილავა ფეხზე წამოხტა და იყვირა, რას მიშვებით ხალხო, მღუპავთ? თოფურიამ კი კიდევ ერთხელ მოუწოდა დეპუტატებს, ხმა მიეცათ ჭანტურიას გამგებლად არჩევისთვის. განმეორებით არჩევნებზე დეპუტატთა 12 ხმა დაფიქსირდა. ამაზე მე კვლავ განვაცხადე _ ხომ ხედავთ ვერ გადის კანდიდატი,-მეთქი. ისევ ჩოჩქოლი ატყდა დარბაზში და დათო თოფურიამ კვლავ მოუწოდა დეპუტატებს, აქტიურად დაუჭირეთ მხარი ჭანტურიასო. საკრებულოს იურისტი ბესელია ყვიროდა: დროა, დროა, უკვე მოვრჩეთო. ამ დროს ოთხმა დეპუტატმა დატოვა დარბაზი და საბოლოოდ მესამე კენჭისყრაზე დეპუტატების 19 ხმა დაფიქსირდა. მე დავწყევლე ისინი, რის გამოც პოლიციის წესით, მე და საზოგადოების სხვა წარმომადგენლებს, დაახლოებით, 7-8 კაცს , მათ შორის კახა მიქაიას, დაგვატოვებინეს სხდომის დარბაზი და ასე უკანონოდ ჩატარებული არჩევნების შედეგად გამგებლად აირჩიეს გოჩა ჭანტურია.
ძალიან გაიწელა დროში სასამართლო პროცესი, მაგრამ დიდი იმედი მაქვს, მოსამართლე საბოლოოდ სამართლიან გადაწყვეტილებას მიიღებს.”
შემდგომი პროცესი შედგება აღდგომის დღესასწუაულის შემდეგ. თარიღს მხარეებს წინასწარ აცნობებენ.
