რომ ნომინალური სასოფლო-სამეურნეო ბარათების ფულად ქცევა არ მოხდებოდა და ამაზე პასუხისმგებელი სამინისტრო იყო:
_ პრინციპული განსხვავება ამ ბარათისა მისი წინამორბედისგან ის არის, რომ ფულად არ გადაიქცევა არავითარ შემთხვევაში. ეს არის მთავრობის მიერ გაწვდილი ხელი გამრჯე ადამიანისადმი, რომ ის დაუბრუნდეს შრომას, _ ამბობდა კირვალიძე.
ყოფილი მინისტრი იმასაც აღნიშნავდა, რომ შექმნილი უწყებათაშორისი ჯგუფი, რომელშიც მონაწილეობს ეკონომიკის, იუსტიციის, სოფლის მეურნეობის და გარემოს დაცვის სამინისტროები მაქსიმალურად გააკონტროლებდა იმ კატეგორიას, რომელთა მიწები რეგისტრაციაში არ იყო გატარებული.
_ ჩვენ მივდივართ დე ფაქტო მფლობელზე, ანუ კეთილსინდისიერ მფლობელზე, რომლის მიწის მფლობელობა დასტურდება ადგილობრივი მმართველობისგან ან რაიმე საბუთით. ეს პროგრამა მაინცდამაინც იმას არ გულისხმობს, რომ მიწა იყოს რეესტრში გატარებული, თუმცა, ახლა მიდის მუშაობა იმაზე, რომ რაც შეიძლება სწრაფად მოხდეს ერთხელ და სამუდამოდ დარეგისტრირება და დაიხუროს ეს საკითხი. ეს ადვილი არ არის, ამიტომ შექმნილია უწყებათაშორისი ჯგუფი, რომელშიც მონაწილეობს ეკონომიკის სამინისტრო, იუსტიციის სამინისტრო, სოფლის მეურნეობის სამინისტრო და გარემოს დაცვის სამინისტრო.
_ ბატონო დავით, არის კატეგორია, რომელსაც არანაირი საკომლო ჩანაწერი არ აქვს, ან იყო ჩაის პლანტაცია და ახლა სარგებლობენ, როგორც საყანე ფართობს და ა.შ. ამ კატეგორიის ადამიანები თუ გყავთ გათვალისწინებული?
_ ეს ყველაფერი ადგილზე იქნება განხილული. დასავლეთ საქართველოში ახლა დაიწყო ეს პროცესი. ამჟამად ბარათების დარიგება მიმდინარეობს იმერეთში, მერე მოყვება გურია, სამეგრელო, აჭარა _ ეს იქნება ტემპის და ზომის მიხედვით, სად უფრო საჩქაროა ხვნის დაწყება. ადგილობრივ წარმომადგენელთან და მოსახლეობასთან ეს საკითხები გავლილი იქნება და თუ ვინმე იქნება დასამატებელი სიაში და ეს იქნება არგუმენტირებულად წარმოდგენილი, მას დაამატებენ აუცილებლად, _ გვეუბნებოდა კირვალიძე.
ჩვენს კომენტარზე, რომ წარსული გამოცდილების თანახმად, ბარათების განაღდება მაინც მოხდებოდა, ყოფილმა მინისტრმა დაზუსტებით გვითხრა, რომ ეს გამორიცხული იყო. თუმცა, როგორც შემდგომმა მოვლენებმა ცხადყო, “არასოდეს უნდა თქვა არასოდეს”.
ჯერ იყო და რამდენიმე მეწარმე ბარათების განაღდების გამო დააკავეს, ხოლო მოგვიანებით გაირკვა, რომ სოფლის მეურნეობის სამინისტროში კორუფციულ გარიგებებს ჰქონდა ადგილი.
დავით კირვალიძეს თანამშრომლებიც უდანაშაულობის სჯერა და საზოგადოებას მოუწოდებს, არ დაარღვიონ უდანაშაულობის პრეზუმცია:
“მიმდინარე პროცესებში ნებისმიერი სახის ჩარევა, ზეწოლა და მანიპულირება იქნება ძალიან ცუდი. ვაცადოთ შესაბამის ორგანოებს დაადგინონ სიმართლე. რაც მთავარია, გავითვალისწინოთ ერთი რამ _ უდანაშაულობის პრეზუმცია,” _ ეს განცხადება, კირვალიძემ 2 მაისს გაავრცელა.
სანამ შესაბამისი ორგანოები მტყუან-მართალს გაარჩევენ, მანამ ბარათების მიღება-დარიგების და განაღდების პროცესები საკმაოდ რთულ ვითარებაში მიმდინარეობს.
სოფლის მეურნეობის სამინისტრო, ჯერ კიდევ 19 მარტს, ოფიციალურად, საკუთარ ვებგვერდზე აცხადებდა, რომ “ფერმერებს მთელი საქართველოს მასშტაბით დაურიგდათ ნომინალური სასოფლო-სამეურნეო ბარათები, რომლითაც მათ შეუძლიათ მიმდინარე წლის 1 აგვისტომდე შეიძინონ სასოფლო-სამეურნეო დანიშნულების საქონელი და ინვენტარი”
თუმცა, როგორც ირკვევა, ყველა ოჯახს ბარათი არ მოუღია. სოფლის მეურნეობის სამინისტროში ამბობენ, რომ ამის მიზეზი სოფლის რწმუნებულებისგან მიღებული სიებია. თუმცა, რწმუნებულები ამბობენ, რომ მათ სრულყოფილი მონაცემები გააგზავნეს.
ამ ეტაპზე, გურიაში, რამდენიმე ასეული ოჯახი ბარათის გარეშეა დარჩენილი.
სამაგიეროდ, ბარათები 10, 15 და 20 წლის გარდაცვლილი ადამიანების სახელზეც არის მოსული.
ჩვენ კითხვაზე, ამ შემთხვევაში რა ხდება, არაოფიციალური პასუხი ასეთია: სოფლის რწმუნებული ბეჭედს დაგირტყამს, პრობლემა არ არის _ გაანაღდებ.
განაღდება კი, კიდევ ერთი პრობლემაა. სამინისტროში დარეგისტრირებული მაღაზიების უმრავლესობა თითქმის ცარიელია _ ხშირ შემთხვევაში დაკეტილია, ან კიდევ არ არსებობს. მაგალითად, ჩოხატაურში, რამდენიმე მაღაზიაა რეგისტრირებული, თუმცა, როგორც ზემოთ აღვნიშნეთ, სულ ტყუილად.
განსხვავებული სიტუაციაა ოზურგეთში. “გურია ნიუსის” კორესპონდენტის, გიორგი გირკელიძის ინფორმაციით, რეგისტრირებულ მაღაზიებში, მართალია, არჩევანი არც თუ მცირეა, მაგრამ რიგი პრეპარატები არ გააჩნიათ. ამ ეტაპზე გაყიდვაში არ არის ბალახის საცელი აპარატი, რომელზედაც ძალიან დიდი მოთხოვნაა.
აღსანიშნავია, რომ სოფლის მეურნეობის სამინისტროში რეგისტრირებული მაღაზია, რომელიც ოზურგეთში, თაყაიშვილის 28-ში უნდა ფუნქციონირებდეს, საერთოდ არ არსებობს.
ანალოგიური სიტუაციაა ლანჩხუთში. “გურია ნიუსის” კორესპონდენტის, ნინო ონიანის მიერ მოწოდებული ინფორმაციის თანახმად, ყველაზე მოთხოვნადი _ საცელი აპარატი და ბენზოხერხი “დრუჟბა”, არც ლანჩხუთში იყიდება.
მაღაზიების მფლობელები, ამის მიზეზად შექმნილ კრიზის ასახელებენ, თუმცა, არავინ იცის, როდის მოგვარდება ეს კრიზისი.
