მათი განცხადებით, გაერთიანებული წყალმომარაგების ოზურგეთის სერვისცენტრის ხელმძღვანელმა ივანე ტაბატაძემ ქალაქის ცენტრში მდებარე წყლის ონკანი გადაკეტა და უამრავი ადამიანი ქუჩაში სასმელი წყლის გარეშე დატოვა. ივანე ტაბატაძე აცხადებს, რომ მას მისი სურვილით წყალი არ გადაუკეტავს _ ეს იყო ბრძანება სათავო ოფისიდან.
_ ოზურგეთის ცენტრში დასალევი წყალი რომ არ იქნება ამ ზაფხულში, ეგაა ცხოვრება? ამდენი მოხუცი, პატარა ბავშვები მოდიან წყლის დასალევად და წყალი არ არის. გული მოგიკვდება, ისეთი საცოდაობაა! როდის დაკეტეს იცით? აპრილის შუა რიცხვებში _ გამწარდება ხალხი და იძულებული გახდება, “ნაციონალების” აქციაზე წავიდნენო. ამას ხელოვნურად აკეთებენ, რომ თქვან, მოვიდა ახალი ხელისუფლება და წყალს არ გვასმევს ტყუილადო! რა უნდა ვქნათ ამ სიცხეში? ვის აქვს კოკა-კოლას ფული ყველა საათში? ან დასალევი წყალი როგორ უნდა ვიყიდოთ? წყალკანალის უფროსმა ივანე ტაბატაძემ გვითხრა, წყალი იღვრება და ტყუილად ვერ დავაქცევთ, მრიცხველი უნდა დაიდგას, მაგი ჰკითხეთ ახალ გამგებელს შარაშენიძესო! _ ასე გვიპასუხა ტაბატაძემ. წარმოგიდგენიათ? ქალაქის ცენტრში წყალზე მრიცხველი? გაგვაგებინეთ, რა ხდება, ვინ გადაუკეტა წყალი ხალხს?!
_ანუ თქვენ იმის თქმა გინდათ, რომ წყალკანალის უფროსი ივანე ტაბატაძე “ნაციონალია” და საბოტაჟს ეწევა ახალი ხელისუფლების საწინააღმდეგოდ?
_ არაა თუ რა?! ზუსტად მაგის თქმა გვინდა, მასეა. აი, მოვიდა მოხუცი ქალი, სწყურია და წყალს ვერ სვამს, ნახეთ, გადაიღეთ, საცოდაობა არაა? ორი დღის წინ 74 წლის ტაქსისტი დააჯარიმეს 200 ლარით იმის გამო, რომ ცუდად ჩააყენა მანქანა, როდის გადაიხდის მაგის 200 ლარს, გაჭირვებულია, ეგაა სამართალი? _ აცხადებდნენ შეკრებილები.
_ გაერთიანებული წყალმომარაგების ოზურგეთის სერვისცენტრის ხელმძღვანელი ივანე ტაბატაძე “გურია ნიუსთან” აღნიშნავს, სანამ მრიცხველი არ დაიდგმება ონკანზე, მანამ ქალაქში წყალი არ იქნება:
_ კი, ბატონო, ვიცი და წყალი გადაკეტილი ექნებათ მანამ, სანამ არ დადგამს მრიცხველს გამგეობა.
_ ბატონო ვანო, როდის დაიდგმება მრიცხველი და ვინ გადაიხდის მრიცხველის მიერ დაფიქსირებულ თანხას?
_შეთანხმებულია გამგებელთან. აღდგომის შემდეგ კიდევ ერთხელ გავივლით ამ თემას, თანხა უნდა გადაიხადოს გამგეობამ.
_ იქ შეკრებილნი აცხადებენ, რომ თქვენ ხართ “ნაციონალი” და ხელოვნურად ქმნით ასეთ სიტუაციას.
_ მე მასე მიცნობთ, რომ ავდგე ახლა და ჩემი ინიციატივით ჩავჭრა წყალი ქალაქში? მაგის ოფიციალური წერილი არის გამგეობაში ჩემი სათაო ოფისიდან და შეგიძლიათ მოიკითხოთ. სანამ გამგეობა არ დადგამს მრიცხველს, მანამ არ იქნება წყალი, _ გვითხრა ვანო ტაბატაძემ.
ოზურგეთის მუნიციპალიტეტის გამგებლის მოვალეობის შემსრულებელი კოტე შარაშანიძე აღნიშნულ საკითხთან დაკავშირებით ასეთ კომენტარს აკეთებს:
_ ამ ფაქტის შემდეგ, მე მივმართე საქართველოს გაერთიანებული წყალმომარაგების დირექტორს, რომელმაც განმიცხადა, რომ მაისის თვეში აუცილებლად ჩამოვა და გაეცნობა წყალთან დაკავშირებულ პრობლემებს, რამდენიმე დღეში კი მოხდება გაერთიანებული წყალმომარაგების კომპანიის გურიის სამმართველოს ჩამოყალიბებაც. იმედი მაქვს, რომ ეს პრობლემები მალე გადაიჭრება, _ განაცხადა შარაშენიძემ.
