_ ბატონო გოჩა, “გურია ნიუსისთვის” ცნობილი ხდება, რომ თქვენ გაგათავისუფლეს დაკავებული თანამდებობიდან.
_ კი ბატონო, სიმართლეა.
_ როგორც გავიგეთ, ამ საკითხთან დაკავშირებით, ოზურგეთის მუნიციპალიტეტის გამგებლის მოვალეობის შემსრულებელს, კოტე შარაშენიძეს პრეტენზიებით მიმართეთ.
_ არანაირი პრენტეზიები, გამათავისუფლა კაცმა და რა პრენტეზია უნდა მქონოდა. მისი ბრძანებით მოხდა ჩემი განთავისუფლება. მე არ დამიწერია, აბა, განცხადება.
_ რის საფუძველზე გაგათავისუფლათ?
_ თანამდებობრივი უფლებამოსილების გადამეტების გამო და მეტი არაფერი ვიცი. დანარჩენს სასამართლოში გავარკვევთ.
_ ანუ სასამართლოში აპირებთ საქმის გაგრძელებას?
_ აუცილებლად.
_ თქვენი გათავისუფლება ხომ არ უკავშირდებოდა იმ ფაქტს, რომ 2012 წლის არჩევნებში თქვენ “ერთიანი ნაციონალური მოძრაობის” მხარდამჭერთა სიაში ირიცხებოდით.
_ მე არავის ვუჭერდი მხარს, მე “ოცნებასაც” ვუჭერ მხარს. მე ვარ ხელისუფლების წარმომადგენელი სოფელ ბახვში. ჩემი მოვალეობა იყო, რომ სოფლისთვის და ხალხისთვის მიმექცია ყურადღება. ჩემთვის მნიშვნელობა არ ჰქონდა, ოცნება იქნებოდა თუ “ნაციონალური მოძრაობა”, ვინც გააკეთებდა მეტ საქმეს, დამიძახებდა და შემესრულებინა უნდა მათი დავალება.
_ და ბოლოს გავრცელდა ინფორმაცია, რომ თქვენ გუშინ შეხვდით კოტე შარაშენიძეს და მის კაბინეტიდან დაცვის წარმომადგენლებმა გამოგიყვანათ.
_ არა, ბატონო. მსგავს ფაქტს ნამდვილად არ ქონია ადგილი. კაცი ჩემი მოგვარეა და ცუდს რატომ ვაკადრებდი? არანაირი დაცვის წარმომადგენლები იქ არ ყოფილა.
_ ვინ დაინიშნა სოფელ ბახვის რწმუნებულად?
_ აზრზე არ ვარ. მიღება-ჩაბარების აქტით ჩავაბარე უკვე ბეჭედი, დარჩენილი იყო 41 ვაუჩერი და ისიც ჩავაბარე გამგეობის წარმომადგენლებს და წამოვედი სახლში, ყოველგვარი კონფლიქტისა და აურზაურის გარეშე.
ოზურგეთის მუნიციპალიტეტის გამგებლის მოვალეობის შემსრულებელი, კოტე შარაშენიძე ჩვენთან საუბრის დროს ამბობს, რომ სოფელ ბახვს ახალი რწმუნებული ეყოლება და მისი ბრძანებით, გოჩა შარაშენიძე გათავისუფლებული იქნა.
_ ის თავის მოვალეობას ვერ ასრულებდა, როგორც ეს იყო საჭირო, დაკისრებული საქმეები ვერ შეასრულა.
_ როგორც გოჩა შარაშენიძე ამბობს ის სასამართლოში აპირებს საქმის გაგრძელებას, რადგან მისი თქმით, ის თავის მოვალეობას პირნათლად ასრულებდა.
_ ეს მისი გადასაწყვეტია და არავინ ზღუდავს გოჩა შარაშენიძის უფლებებს. _ გვითხრა კოტე შარაშენიძემ.
“გურია ნიუსის” ინფორმაციით სოფელ ბახვის რწმუნებულად იური ვაშალომიძე დაინიშნება.
