(გურია ნიუსი, ლანჩხუთი) _ ლანჩხუთში, “ეროვნული საბჭოს” მიერ საკუთარი აქტივისტებისთვის ანაზღაურების მიუცემლობის ამბავი უკვე გასცდა გურიის ფარგლებს, “დაიცავი საქართველოს” ლანჩხუთის ოფისისხელმძღვანელი ეკა ალექსაია კი ისევ იბრძვის შეპირებული თანხის მისაღებად.
ჩვენთან საუბარში ალექსაია მორიგ სკანდალურ განცხადებებს აკეთებს: _ მივედი ზურაბ ნოღაიდელის ოფისში და მეუბნებიან საოცარ რამეს: _ შენ რა პროცენტებიც აიღე, ეს არის ლევან გაჩეჩილაძის მხარდამჭერების ხმები და რატომ უნდა გადაიხადოს ამაში თანხა ზურაბ ნოღაიდელმაო. თითქოს ეს ხმები გაჩეჩილაძემ მიიღო, ან საერთოდ მონაწილეობდა “დაიცავი საქართველო” არჩევნებში? ლანჩხუთში ჩვენი ძალისხმევით მიიღეს ხმები და ახლა თანხის გადახდა არ უნდათ! კიდევ ერთი საოცრება: თურმე, ვინც ხმა მოგვცა, ისინი უნდა ყოფილიყვნენ ნოღაიდელის პარტიის წევრები. ანუ არჩევნებზე ადამიანს ის კი არ უნდა უთხრა, ხმა მომეციო, არამედ ჯერ პარტიაში შემოდიო, უნდა დააძალო. ასეთი რამ პირველად გავიგე! რამდენიმეჯერ მივედი ნოღაიდელის პარტიის ოფისში და პასუხის გამცემი არავინაა, ყველა გაქცეულია, ლამის დაეშალა ნოღაიდელს პარტია.
გთავაზობთ იმ ინტერვიუს მცირე ნაწილს, რომელიც ეკა ალექსაიამ გაზეთ “ქრონიკას” მისცა:
_ მე ვეუბნები: გამაგებინეთ კაცურად, როდის გასცემთ ფულს? პასუხი: _ 20 რიცხვის შემდეგ დაგვიკავშირდით. როგორც კი წამოვედი ოფისიდან, მირეკავს ლელა ჩახვაძე და მეუბნება, რატომ მომიწყვე ფარული სატელეფონო ჩაწერა, ახლა არც მემ მომცემენ თანხასო. ვერ მივიღე ვერავისგან პასუხი და ჟურნალისტი ამიტომ ჩავრთე ამ საქმეში,-მეთქი.
_ ვერც ლელა ჩახვაძემ აიღო თანხა?
_ ვერა. დარწმუნებული ვარ, ლელა ჩახვაძე “დაგოიმებული” ჰყავთ. ახლა მაგაზე ტეხავენ ჯოხს, რატომ წავიდა ეკა ალექსაია “ქრონიკის” ჟურნალისტთანო?!
_ ეკა, ვინ იყო ნოღაიდელის პარტიიდან უმაღლესი პირი, რომელიც თანხაზე გელაპარაკებოდათ?
_ ბოჟაძე იყო და ის წავიდა… მე 6 მაისს ზურაბ ნოღაიდელსაც შევხვდი სააკაძის ძეგლთან, აქციის დროს. გავეცანი, ყველაფერი ვუთხარი. ძალიან კარგიო, “დაიცავი საქართველოსთან” თბილი ურთიერთობა გვაქვსო, დიდი მადლობაო. იქ ხომ არ ვეტყოდი, _ ნამდვილად მისცემთ თუ არა ჩემს ხალხს ფულს,-მეთქი? ყველაფერი იცოდა ბოჟაძემ, ასევე ილო კალანდაძემ, კობა აბულაძემ, უშუალო ხელმძღვანელი კი ლელა ჩახვაძე იყო.
_ ნოღაიდელმა ლანჩხუთში თავისი პარტიის იმ წევრებს მაინც თუ მისცა ფული, რომლებიც არჩევნებზე მონაწილეობდნენ?
_ არა, ერთი თეთრიც არავის არ მისცა. მარტო ლანჩხუთი კი არ ჩააგდო მაგ დღეში _ არც ქუთაისში, არც კახეთში, არც ქართლში არ დაურიგებიათ. ხელ-ფეხს დავამტვრევ ამათო, ყვიროდა ნოღაიდელი 29 მაისამდე. ვის ამტვრევდა? დამთავრდა არჩევნები და ხალხი დატოვა მოტყუებული, ხალხს დაამტვრია თავ-ყბა.
ეკა ალექსაია ნოღაიდელს ემუქრება: _ თუ პასუხს არ მომცემს ნოღაიდელი, ბენზინს შევუსხამ იმ 4-სართულიან შენობაში, მერე ითანამშრომლოს სხვა პარტიებთან.
